Róóma 3
3
Waag gál he ˈdeeđeneyká ˈdéé ki iđimichoká taglé
1Aaléka, gál Yuuˈdi meete ˈdúwa gál gál Yuuˈdi muuninyká ˈdú ˈgaa? Hermisan gál Yuuˈdííllá meete midhab he ˈgayya? 2Iiy-hí, gál Yuuˈdi hé gál kidhdhoká hé hé ˈdúwa-, burnayká ˈdú ˈguo. Hé súm ˈdúwa-, gaalí gál kidhdhoká ˈdú ˈgúóllá, he ˈdaa giri gaal íín Waag hí ˈdeenyle gíl geer gaa kaayyeká. 3Tá gál Yuuˈdííllá hé ˈbaal ˈdeeny Waaˈgiet ma chíran. Gáál ˈdéé ma ki yaalintlééllá he in kieye, Waag héllé hotééllá hé tagle muuninyo, he yegedhe? 4Híʼi, he hé hát kinaallá muuniny. Har gálaat lulle úba hođom líítaka, Waag íín hát lullé he ˈdúwa, hát káána ˈDáwuˈd hí Waag geey-, mu kieye, Hé kuuní hogotoká taglé, ˈdeensenkú hé ˈdúwa,#3:4 Warˈgat Arram 51:4 yieká.
5Tá kálmaréel máádhat kieye, Ađaabano kúnnaa ke higilóóllá hé gáál midhant Waaˈgiet aargisuo, tá Waag har múún gáál he il ká aargisichoka, af kinaalka Waag hé ˈdeew, yieka, tá múún háte ke yeedhe? Hééllá hé gáál ˈbaal hí taawuoká yú hogodho. 6Tawuny hat kinaallóóllá Waag hí điito! Waag hé hé níínní ˈdeeneycheká mán. Tá Waag har gál he ˈdeđeneyoká he il ma ká aargisinyka, af kinaalka ˈdéé ki iđinyle hé tagle muuniny.
7Héétí kálmaréel máádhat hatal hai faalma, kieye, ˈDeeny chia hódho-, yú hogodhóóllá hé Waag hát hódho mán-, ˈdúwaká gálaat aargisuo. Tá Waag háteeye geđi ye ˈdeđensete, ye máá ađááb ˈguoká cheedhe? hai yeedhe. 8Tawuny hat kinaallóóllá hé ˈdeew. Gáál ˈbaal úba hé nyí ˈdeem af kaay. Gaal hé hogodhoká kieye, nyiin kerka gálaato nyí geđicha, nyí kieye, Kí hé ˈdeđewká eekemeyo, hé midhabká hí hé ˈdeđew kinaal yé gáá ˈdie, kerka nyí chegedhe, he yegedhe. Gál hééllá hogodhóóllá Waag ˈdéé haí ki iđimicha, hé gaalí hol ki ˈgeˈgedhoká hééllá.
Gál Yuuˈdi hé úba saas ˈguo
9Aaléka, múúni ki gál Yuuˈdííllá, Waag innumleka, hé ke gálaat ˈdú ˈdúwa, ke hol yegedhe? Híʼi, he hé hát kinaallá muuniny. Hé ke hí geeyká kieye, gálaat lulle, gál Yuuˈdi yíekaʼ, gál gál Yuuˈdi muuninyká yíekaʼ, lulle ađaabano he gim gaa ija, muunîny? 10Warˈgat Waaˈgiet kieye,
Biiy hé máá níínní tikiˈde úba saas mánká mán.
11Hé máá níínní ˈdaallé-, Waag hol gaa ˈgeˈgedhoká mán.
12Gálaat lulle hé Waag ˈboiy gaa ˈdie,
gaal lulle hé ˈdúúw ˈdabe.
Biiy hé máá níínní tikiˈde-,
úba hé midhabká ekemeyoká mán.#3:12 Warˈgat Arram 14:1-3; 53:1-3
13Gáál ˈdéé hótle hát úúshích af hí eiy ijo-,
ká kekeenká.
Gáál erble hé hođomká hí yiem gáá ˈdeˈdeme.
Gáál agerle hé hí yiem gáá ˈdeˈdeenká
hát lúabal af heđlé.#3:13 Warˈgat Arram 5:9; 140:3
14Gáál afle ki waaˈgasan ubaa ˈdeem heđeká hí koch.#3:14 Warˈgat Arram 10:7
15Gáál ˈgasle đúla he gaa igira,
giri gálaat fasam okoˈdmuoká.
16Gaal alb he sesemeká hé he ki ˈdeeđeney,
gálaat buony ˈdú iđie.
17Gaal hé naanná ˈgíéríchle muog.#3:17 Yisááya 59:7-8
18Gaal hé Waag kian hé níínni úba ka mánno,#3:18 Warˈgat Arram 36:1
he chie.
19Hééllá hé gaa édhká, hemuumurít gál Waag hí shiiche-, Yuuˈdííllá ˈdaallé he ki taalla, giri gálaat fálaam ká ririat-, gálaat lulle innum Waaˈgietka ˈdeensen ˈguoká. 20Aaléka, hé máá níínní innum Waaˈgietka hemuumurít ki yaalitle ˈdaalleka Waag hí máá ˈdúwaká chegetoká mán. Hemuumurít gálaato hát saas ˈguoká he gáál ká aargisicha.
Innum Waaˈgietka hát ke gál ˈdúwaká yegetká
21Aalé káána Waag hé kár gálaat gál ˈdúwaká ki hođichoká gáál kí edhesiche. He veerit Moshe ubaa he veerit gál Waag hí ˈdeem ka shigicheká kárallá ˈdeenylé he hogodho. Kárallá hé hemuumurít el gaa igiritle ˈdaalle ma ki taaliny. 22Kar ˈdaa Yiesu Kiristo he ki taalla. Gálaat lulle Yiesu Kirísto iiy yeget-, har káána úba gál kídh mákártaká kátaka, Waag saas haí gaa egeyye, innum Waaˈgietka gaal gál ˈdúwaká hai yegedhe. 23Gálaat lulle hé ađaabano hile, muun hé ˈdúwa-, Waag hí gáál gaa feˈdoká hé ke ma ekêny. 24Tá Waag ˈdúˈjímlé guđoká hállééllá he gáál ká argisiche, Yiesu Kirísto ali gáá kaayye, giri gáál ađaabano ubaa nyuogim gim gáá egewká. Aalé ke Yiesu Kirísto iiy yieka, in Waag múún gáál gál ˈdúwaká chegedhe. 25Waag Yíésu ali gáá kaayyééllá, he giri mu suor yeget-, fásle okodmuo-, gál hí iiy yegetká ađaabano ubaa nyuogim gaa egewká. Waag mú ali gáá kaayyééllá, in he hát ˈdúwaká Waag hí gáál ká argisiche. Hé ˈdeđew-, héle gaalí eekemeyká hé muí il er nie. 26Hééllá muí il er níéllá, he ˈdaa giri mu gáál nog ki sesemeká. Tá báralka, suor Yiesúúllá Waag hát he ˈdúwaká gáál ká aargisicha. Héétí gál Yíésu iiy yegetká in Waag hí gál ˈdúwaká chegedhe.
27Aaléka, meete ke ˈgaa, ke hol ki memeye? Gon hé mán. Tá Waag múún gáál gál ˈdúwaká chegetóóllá, he hemuumuríti ke el gaa igire? Híʼi. Hééllá he ˈdaa giri ke Kirísto iiy yieká, in mu gáál gál ˈdúwaká yie. 28Aaléka, máádhat hé hemuumurít ki yaalitle hí máá ˈdúwaká ma hođiny, iiy yeen muí Yiesu Kirísto iiy yieká in innum Waaˈgietka mú máá ˈdúwaká hođicha.
29Waag íín he Waag gál Yuuˈdi tákáma? Hé úba gál gál Yuuˈdi muuninyká Waagle muuniny? Iiy-hí, Waag úba he Waag gál gál Yuuˈdi muuninyká. 30Waag íín tikiˈde biiy gaa iđoká. Gál Yuuˈdi yíekaʼ, gál gál Yuuˈdi muuninyká yíekaʼ, máálle Kirísto iiy yieka, in Waag hí máálle hođisata. 31Aaléka, ˈdaa giri ke Kirísto iiy yíéllá, he hemuumurit Waag hí gál Yuuˈdi ka shiichééllá kí gadho, ke yeedhe? Híʼi, he hé hát kinaallá muuniny. Hemuumurít hélle ha ke đuusia.#3:31 Hééllá hé kieye, muun hemuumurit Waag hí gál Yuuˈdi ka shiicheká ke gim gaa ija muuniny. He kieye ke Hím Naasan Waaˈgiet atimle el gaa igiroka, in ke hé Waag hí feˈdoká ekemeye.
Currently Selected:
Róóma 3: dsh
Highlight
Share
Compare
Copy
Want to have your highlights saved across all your devices? Sign up or sign in
Bible Translation and Literacy
