Róóma 13
13
Kansimano lesietká kí ˈdúúw shiiguo
1Máádhat hí les kansimanolle hemuumuritle el gaa iigiro, ˈdaa giri kansimano lesietallá máá éíy taaka hí gáál shieká mán-, Waag hí gáál shiicheká. Gál les met ki ˈgíéllá Waago hí hujichaam kinaallá met ki koyye.#13:1 Gál les met ki ˈgieká har hé Waag hí ma fedinyká gáál kí mureka, kí hát Waag hí feˈdoká el gaa veero. (He Ekeny Gál Alb Fimiká 5:27-29) 2Aaléka, máá kansimano lesietká hemuumuritle điidhoká, hát Waag hí muˈdeká he điđidhma. Gál hé kinaal ekemeyoká ínnallé hol Waag ˈdéé ki iđinyle mé ki kokoo. 3Gál hé ˈdúwaká ekemeyoká hé kansimano hí sierm ma fafiny, gál hé ˈdeđewká ekemeyoká in kansimano siermle ˈgaa. Kúún máá kansimano siermle mánká chegetoká féˈde? Af kinaalka, hé ˈdúwaká eekémesh. Hát kinaallá in gál kansimano ˈgúóllá ko memeye. 4Gál kansimano ˈgúóllá hé Waag hí gedelle hosote, giri gaal hí ˈdeˈdeenká. Tá har hí hé ˈdeđewká ekemeychoka, af kinaalka sierm ˈgáa, ˈdaa giri gaal fargogint gálaat he il ká aargisuoká ˈguoká. Gálallá he gede Waaˈgiet giri gál he ˈdeđeneyoká ˈdéé ki iđimuoká. 5Aaléka, gál kaansúóllá met gaa keekemíe, tá he hé ˈdaa he il ká argisiny kianle tákámle muuniny, he ˈdaa giri hééllá hé taglé onnônyka ki ekemeyoká.
6Hééllá ˈdaalle ˈdugaka, gibíre mangis ki guugusáa. Mangis gállé hí hujich ki nannuo-, gibíre gugusatallá úba he gede Waaˈgiet. 7Hé hemuumurit mangis hí muˈde-, gaalí mangis les ki fafuoká, lúl mangis les ki fáa. Máá mangis gibíre kí shugunoká gibíre gugusatka, mú gibíre shía. Máá kansím ˈguoká ˈdúúw shía, met gaa keekemíe.
Gielmít ˈgany
8Ew hí ˈgayyaká hí tikiˈd tákámle onnoyyo. Hé kinaallá he giri hí hol gielmít aargisichoká. Tá har hí gálaat gielmít aargisichoka, af kinaalka hemuumurit Waaˈgieto hí đuđusicha. 9Hemuumurit hát káána kieye, Haí hol ˈdú burúminy, Ha máádhat chíésiny, Ha buráany, Ha máádhat hélle gajaltle ˈgíiny,#13:9 Yíéˈdími 20:13-15, 17; Hemuumurít ˈDéé Hótlé 5:17-19, 21 héétí hemuumurit éíy taaka úba Waag hí muˈdeká lulle hemurit giri kieye, Máá olkú hát kúún hol gielallá úba géélneb,#13:9 ˈDeemano Gál Levi 19:18 chieká he geer gaa iđa. 10Máá máá olle gielká hé mú ma gáá ˈdeđenen. Hát kinaallá in gielmít hemuumurit Waaˈgiet đuusicha.
Kí hé ˈdeđewká hayo, kí hát Waag hí feˈdoká ká yíéđuo
11Aaléka, ˈdaa giri báral hát ka beeyyeká hí ógká, ram gaa kée, in banáa. Bár ke Kirísto iiy yieká fag, kúlích muí gáá ˈjeˈjeen-, muí muun gáál gaa ririanká ˈjob. 12Chúúre hé ká beeyye, biiy fuan hé ká ˈjobonte. Aaléka, hé ˈdeđew-, gaalí bííy gaa ongʼoˈdeká gaa ekemesetká kí hayo, kí édhum hélle hisat. 13Kí hé midhab-, gaalí bííy kulichká gaa ekemeyoká eekemeyo, ha ke hé ˈdeđew-, hát káána herginy kern mantiká, bersh famíti, herginy gálle hol ma shúúnanká, hé gaa nyakarichká, hol gáá mony mánti, héétí hol oosó, ubaa hinááf ˈgany ha ke ˈgíiny. 14Héél afleka, kí Máá Guđo Yiesu Kirísto húgúmle ˈguo, ha ke balt gaa nyakaridhe-, gonnietká tawunyle ˈgíiny.
Currently Selected:
Róóma 13: dsh
Highlight
Share
Compare
Copy
Want to have your highlights saved across all your devices? Sign up or sign in
Bible Translation and Literacy
