He Ekeny Gál Alb Fimiká 6
6
Gál tiiya gaalí hol gáá waaˈdeká
1Bár kinaal gál láliká ilshandheká, gál lali kinaal gál Yuuˈdi Hellenká gál Yuuˈdi Heberewká ˈdeente, ˈdaa giri bar lulle ˈguom gaalí gálaat eiy gigiseká gáál ˈdeglé híyeská gaalí gíl ˈdeent he ki shigieká. 2Aalé gál giri tomon a naama-, alb fimiká gál Yíésu iiy yie-, láliká lulle hol ˈdu gáá vie, kieye, Nyíín nyí ˈdeeny Waaˈgiet onisinyle gíl sug ki haađicha-, nyí ˈguom gísáchle gaa seseenká hé ma midhanany. 3Nyaaramkúnno, gál ˈdúwa-, tiiya Hím Naasan Waaˈgiet hí koch chie-, ˈdaallellé-, hí ógká hol gáá shuunáa, gáál nyí hújíchallá mé ki koyyo. 4Nyíín dhúrkínyo aalé bar lulle Waag visan ubaa ˈdeeny Waaˈgiet ˈdiiyiminyle nyí mé verenne, gaalí yie.
5Aalé gál láli kinaal lulle hé gál alb fimiká hí hodheká hí ger gaa meey. Gaal Estéfan giri Yíésu hát ˈdabaanká iiy yie-, Hím Naasan Waaˈgiet hí koch onnoyyeká ká eey. Gál éíy taaka úba gaalí ká shuuneká he mú Fílib, Borokóro, Níkanor, Tímon, Bármen, tá Níkola giri Ántiok gáá yimie-, Waag gál Yuuˈdiká iiy yieká. 6Aalé gaal gáál gál alb fimiká ˈdú eey, gál alb fimiká gáál Waag ki vite, gáál gil ˈdú fie.#6:6 Gil ˈdú fím kinaallá he hujich mé ki kony. 7Aalé ˈdeeny Waaˈgiet ˈjien Yerusalem bash ki yie, gál burnayká ˈdéé iiy yie, gaal lali Yiesu yie. Gál burnay-, suoryoká úba fayam Yiesúúl iiy yie, fayám el gaa veere.
Estéfan gaalí ˈgiliˈgay
8Aalé Estéfan giri midhant Waaˈgiet ubaa fargogint Waaˈgiet hí koch onnoyyeká hé gáál súm af ˈdaˈdabsie-, gaalí il ki argeká gálaat hurt gaa eekemey. 9Aalé gáál mé tikiˈd Estéfan ˈdu gáá yimie, mú hol ki falme. Gál kinaallá ˈbíl ˈdiiyiminy-, gálle Gál Gaalí Mé Fureká gaalí yegieká he yé gáá ˈdie. Gál kinaallá ˈdáá tikiˈd ˈjienle he ˈjien Kurene ubaa ˈjien Alekesanđara, tá gáál ˈdáá tikiˈd íín úba lés Kilikia ubaa lés Asia he gáá yimie. 10ˈDaalim Hím Naasan Waaˈgiet Estéfan hí ˈdéé ki hogodheká in fáláám gaalí hol ki fafalme kinaal Estéfan hí gáál kí adhdhe.
11Aalé gál kinaal hát hinyamoká gáál ˈdáá tikiˈd chure, kieye, Estéfan Móshe ubaa Waag chachareká nyáá nyí maalle, yiedhíe, gáál yie. 12Aalé ˈdeeny Estefanallá gálaat ubaa gál káruká tá gál nyatalaamká idhansie, gaal Estéfan ˈgiliˈgay, mú gál arraká met ká eey. 13Gaal gál mú hódho luut kaay mare úba ká shuunne. Aalé gál kinaal kieye, Máállá bar lullé he ˈBíl Waaˈgietallá ubaa hemuumurit Moshééllá fiichila. 14Mú nyí af maalleká, mu kieye, Yíésu Nasaretallá ˈBíl Waaˈgietallá eiy hai ˈgieˈgia, kor nyátál Móshe hí gáál ka shieká úba hollo hol gaa laama, muí yie, gaalí yie. 15Aalé gál giri ál gál arra kinaal gaa ijeká lulle mú gaa dhaay, máá innum hí hol gaa suoyye-, innum hí innum máá ˈgasso-, urruká chieká arge.
Currently Selected:
He Ekeny Gál Alb Fimiká 6: dsh
Highlight
Share
Compare
Copy
Want to have your highlights saved across all your devices? Sign up or sign in
Bible Translation and Literacy
