He Ekeny Gál Alb Fimiká 28
28
Báulo koro Melite ki ˈjie
1Aalé nyí kar ˈdoyye-, nyí baaˈd yé ki ˈdiiyyeká, kóro meenylé nyí maalleká, Melíte. 2Koro kinaal gálle nyí ˈbule. Gaal ˈdaa giri les ir hí gaa tutune-, ali ˈdéeny ˈgayyeká, gaal ˈjiet iđie, nyí ká vie, nyí ˈjiet ˈbuusate. 3Aalé Báulo ˈguor ká shuunne-, ˈguor ˈjiet fieká, ˈjiet kúlkúlle reew ˈguor yé gáá ˈdeeyche, reew mú gíl ˈdáˈdáb chie. 4Gál giri koro kinaalloká mú reew hí gíl gáá rereenne-, argeká hol af ki helie, kieye, Máállá gon máádhato he yies. Har úba bás kúfáchle kar gáá ˈdoyka, nyúógích kinaallá ađaable hé hí chiesalâm! gaalí yie. 5Aalé Báulo gíl hurgufe, reew ˈjiet les gaa ˈdoyye, tá mu íín hé ál níínní hí gaa kulnayyeká mán. 6Gál giriká mú ˈdeey, máá igitaw-, ubaa kufach hí saaro-, sidh hí ˈgiitoká egese. Gaal súm yíéđieká mu hé níínní hí ki ˈdeđenet mán argeká, gaal héllé taawue kinaal hay, kieye, Waagam waag tikiˈd hí máál máámaʼ? hol yie.
7Ál nyí ki ˈdiiyyééllá koro kinaal máállé hí mé ki yiel-, gaalí Bobílyo yegie mare léslé gaa ˈbasiyyo mare bala. Máá kinaallá nyí ényle ˈdú eedhdhe, nyí ˈbule, énylé kinaal nyí seđ gaa rayye. 8Aalé Bobílyo ˈjaallé báásh ˈgie-, geer hí ˈjie mare úba ény kinaallá he gaa ije. Báulo ˈbíl muí gaa iifeká hile, mú gil ˈdú fie, mú Waag ki vite, mu bie. 9Koro kinaal gálle héél maaleká gál giri basham ˈgieká lulle ká yimie, úba bie. 10Koro kinaal gálléká nyí hát lulle les gaa eedhdhe. Aalé he nyí síé yieká shokodaam nyí mannayyeká nyí ká shie.
Báulo Róóma ki ˈjie
11ˈGuiyam seđ nyí koro Melite kinaal ˈdú đufeká kádích Alekesánđara gáá yimie-, af niesiet kinaal ál kinaal gaa yiel mare nyí hille, nyí koro kinaal gaa kiiyye. Kádích kinaallá waagam hol manđaana-, gaalí Kasitóra ubaa Bulúkisa yegie mare mé bala ká ˈgie. 12Aalé Súrakos nyí ki faanne, ál kinaal nyí seđ gaa ˈguolle. 13Ál kinaal nyí gaa kiiyyeká nyí Région ki faanne, nyí gaa rayye. Biiy ka biˈdeká wááních fargogoká ˈdaa urru gáá ˈdoy, đo nyí kiiyye. Kúlích ki naamaká nyí Botíólo ki faanne. 14Ál kinaal nyí gál nyaaram-, Yíésu iiy yieká hol gaa argiyye, gaal nyí ényle ˈdú eedhdhe, gáál nyí hol ram tiiya af rayye. Ál kinaal nyí gaa kiiyyeká, nyí Róóma mé niiyye. 15Gál nyaaram Yíésu iiy yie-, Roomaká hát nyí ˈgierich gaa igiˈdoká maaleká, nyí agim ká nadhe. Gaal ál gaalí Gabaaya Abiyu yegetká ubaa ál gaalí Súg Seđeká yegetká alble nyí gáá hile. Báulo gáál argeká geer hí gaa meedhe, Waag meey. 16Aalé nyí Róóma ki faanneká Báulo gaalí hay, giri mu ˈbíl eiy tákámle gaa yíéđian-, máá yuoyo tikiˈd hí ˈbíl kinaal álle gaa ˈdeˈdeenká.
Báulo gál Yuuˈdi Róóma gaa ijeká ˈdeeny Yiesu ki ˈdiiyime
17Báulo ram hí Róóma seđ ki chieká gál Yuuˈdi guguđo-, al kinaalloká hol ˈdu gáá vie. Gaal hol ˈdu gáá yimieká Báulo gáál geey, kieye, Nyaaramchú, har káána yú hé níínní gálkúnno ubaa nyatalaam eshim eshimkúnno ki ˈdeeneyká manítaka, yáá gaal ye Yerúsalem gaa ˈgiliˈgay, gaal ye mángís Rooma gíl gaa kaay, 18gál Rooma ye ˈdéé gaa eedhdhe. Aalé ˈdaa giri hé níínní ˈdeew yú ekey-, ye kúfach mé ki kokoy-, gaalí ye gaa arge-, mánká gaal ye haađieká he fede. 19Aalé gál Yuuˈdi furitchú điidheká, yáá hát éíy taaka ˈgieká mán, in yú kieye, Ye Káísar ˈdú ée, yú yie, har úba yú hé ˈdeew-, gál chia Yuuˈdi yú Káísar met gaa hogodheká mannayka. 20Hé kinaallá ˈdugaka in yú hí ká vie, giri ke hol aargiroká. He ˈdaa máá giri gál Yisirayel hí egeso-, gáál ririanká ˈdaalle ˈdugaka in yú nyárugééllá ye ki ˈgiiyya, Báulo hí gáál yie.
21Aalé gál Yuuˈdi kinaal mú ˈdéé hol ˈdú nie, kieye, Nyiin nyáá nyí warˈgat hé kua ˈdeđewká huogote-, gál Yuuˈdi hí nyí ˈdu gáá veereká mán. Héétí úba gál nyaaram ál ka yiimieká hé máá tikiˈde nyí fayamkú ˈdu gáá sidhe-, ubaa hé kua ˈdeđew-, nyí ka geeyká mán. 22Aalé hé geer kua nyí mamalla. Biiy lulle hé tág gál ˈgíéríchallá el gaa igiroká af ki eete, gaalí Báulo yie.
23Aalé gaal rám éíy taaka geđo Báulo hol gaa aargiroká hol ki chiˈde. Aalé kúlích kinaal ali kí ˈdiiyyeká gál burnayká ˈbíl Báulo hí gaa ijeká a midhab ká yimie. Báulo gáál Guch Waaˈgiet ˈdeenyle geey. Mu hemuumurit Waag hí Móshe ka shiicheká warˈgasamle ubaa warˈgasam gál Waag hí ˈdéé ka shigicheká alblé giri ˈdeeny Yiesu hogoteká gáál af gaa koy. Mu hatal gáál ˈdeeny Yiesu ki ˈdiiyime, gáál ˈdéé net ˈdú gadhe, ˈjíig biiy gelga chie. 24Gáál ˈdáá tikiˈd ˈdeeny Waaˈgiet Báulo hí huogodheká hí ger hile, gáál ˈdáá tikiˈd íín ˈdéé điidhe. 25Aalé gaal hol af ká điidhe. Kor gaal hátlé giri eiy ma kíinyká Báulo ˈdeenylé biiy el ˈdaˈdká gáál geey, kieye, Hím Naasan Waaˈgiet hé ˈdúwaká eshim eshimkícho geeyche, giri Yisááya geeyche-, kieye,
26Gálallá ˈdú sí, hatallá gáál géesh, kúún kieye,
Itín taalle ˈdéé haí mamalla,
kor it ˈdee hí mé ma ki seseminy.
Itín taalle he haí dhaˈgasanna,
kor ití he ma kiimisan, hatallá gáál áat.
27Hééllá he ˈdaa giri gálallá met guogo-,
ubaa hol nee rie-, tá hol in rieká.
Har onnônyka hát kinaal muuninyka,
gaal hé in fuore, he arge, nee hí he maale,
ubaa hol ˈdéé mé gaa eedhdhe,
ye hol ˈdu gáá nadhe, yú bisie,#28:27 Yisááya 6:9-10
Hím Naasan Waaˈgiet hí mú chieká, Báulo hí gáál yie.
28Báulo geđi gáál geey, kieye, Aaléka, onnóo! Waag hé fayam rubachietallá kidh ali ˈdú kaayye. Kidh kinaallá fayám nee hai kokoo, muí gáál yie. 29[Báulo ˈdéé beete. Aalé gál Yuuˈdi eiy keekeme-, eiy gagaleká tákámle hol súm ki faafalme.]#28:29 Gárallá hé warˈgasam heleká ˈbaal gaa mán.
30Aalé Báulo warram naam ˈbíllé he bíre les gaa fafieká gaa yíéđie. Mu gáláát giri hí ˈdú gáá yimieká lulle hol geeđie. 31Mu gálaat hát ˈdabaanká Guch Waaˈgiet ubaa Máá Guđo Yiesu Kirísto ˈdeenyle onisie. Mú hé máá níínní úba hí ˈdéé huogon ká ridhdheká mán.
Currently Selected:
He Ekeny Gál Alb Fimiká 28: dsh
Highlight
Share
Compare
Copy
Want to have your highlights saved across all your devices? Sign up or sign in
Bible Translation and Literacy
