He Ekeny Gál Alb Fimiká 25
25
Báulo Káísar hí ˈdéé ki iđimuoká fede
1Aalé Fésitos lés Yuuˈdia kansimle eedhdheká, mu ˈjien Kaisaria ram seđ gaa rafe, đo kie, Yerúsalem mé nie. 2Ál kinaal gál guguđo-, suoryoká ubaa karu Yuuˈdiká mú ˈdú kie, gaal Báulo ˈdeenyle mú ˈdú eedhdhe. 3Gaal Fésitos súm gil ki efe, giri muí af veveet-, Báulo muí Yerúsalem ká egewká. Tá gaal íín ˈdeenylé he tág nanateká Báulo met higilo-, mú le hurt ki yegeská he fede. 4Aalé Fésitos gáál ˈdéé hol ˈdú nie, kieye, Báulo Kaisária gaalí ki hiigidhe. Yú úba rám gáá ˈjóbká ál kinaallá hol ˈdú naadha. 5Gál kíchia káruká ˈbaal ka báa, gáál nyí hol eete, gaal hé mu héllé mákárta-, ˈdeeđeneyká hí ál kinaallá gáá huogodho, muí yie.
6Mu rám síet ubaa tomon nyuoˈdoká ál kinaal gaa rafeká, đo kie, Kaisária hol ˈdú nadhe. Mu bííy éíy taaka ka biˈdeká karullé gálaat ˈdeem ki iđimuoká hol af ká yíéđie, gáál geey, giri Báulo gaalí met ka egewká. 7Aalé Báulo he ali kí ˈdieká, gál Yuuˈdi giri Yerúsalem gáá yimieká mú lag ki ˈdie, mú héllé mákárta burnay-, ˈdeđew-, muí ekemeyká huogodhe. Gaal héllé mú ˈdú huogodhe kinaal geđi el met mán. 8Aalé Báulo hol ˈdéé ˈdú huogodhe, kieye, Yáá hemuumurit Yuuˈdi hé níínní gaa ˈdeeneyká mán. Yáá úba ˈBíl Waaˈgiet ubaa máá guđo Káísar hé níínní ki ˈdeeneyká mán, yie.
9Aalé Fésitos ˈdaa giri gál Yuuˈdi hí memeyo-, fedeká, Báulo yiete, kieye, ˈDeenyéél ˈdugaka Yerúsalem seseen-, ál kinaal ye met ki ˈdeen-, yú ko ˈdéé ki iđimuoká kó feˈdo? muí yie. 10Aalé Báulo mú ˈdéé hol ˈdú nie, kieye, Yú ˈdaaka ál ye lé-, hemurit Kaisar hí ye ˈdeem ki iđimichoká yaalla, giri kuun ye ˈdéé ki iđimichoká. Kuun dhúrkú gál Yuuˈdi hát yú he ma ki ˈdeenênyká kó tág óg. 11Har yú hé mákárta-, máádhat hí gaa kufunanká ˈdeeneyka, af kinaalka yáá kúfach ma điin. Tá hé gál Yuuˈdííllá hí ye luut kaayallá he hódho kátaka, af kinaalka hé máá níínní ye gálallá gíl geer gaa kakawká mán. Ye Káísar dhúrle ˈdú ée, mu hé ˈdeeny chiallá eiy nuo! yie.
12Aalé Fésitos gállé káruká hol ˈdeenyéél geeyká, mu Báulo geey, kieye, Káísar ye ˈdú ée, chíéllá, aaléka Káísar ha ˈdú seenne, Fésitos hí mú yie.
Fésitos Agiríba giri kansichká ˈdeeny Báulo geey
13Aalé ram hol ki sieteká máá kansich Agiríba ubaa nyaarlé Berníke Kaisária ki fame, Fésitos naa ˈdú sidhe. 14Aalé gaal ál kinaal ram ki kaadhdheká, Fésitos Agiríba fayam Baulo geey, kieye, Állá máá Felíki hí ˈbíl hiiginká kí hay mare hí gaa ija. 15Aalé af giri yú Yerúsalem sedheká gál guguđo-, suoryoká ubaa gál Yuuˈdi káruká ye mú ˈdeenyle ˈdu gáá eedhdhe, giri yú mú ˈdéé ki iđimuo-, ubaa mú ˈdéé điidhanká. 16Hé yú gáál geeyká, yú kieye, Hééllá hé hát nyátál Rooma muuniny. Máá Rooma ˈdaab gállé hí ˈdéé af kaayká metle hol ˈdéé ma ˈdú húógonká hé máá hí he ki ekemeyoká mán, yú yie. 17Aalé gáál nyí hol állá ˈdu gáá eeteká yáá ˈdéé ram ma ki ráfiny. Kúlích nyí gáá faanneká nyí rayye, biiy ká biˈdeká karuchú yú hol ˈdú gáá vie. Aalé yú Báulo gáál ali ˈdú fie, giri mú gaalí nyí met ká kokuoká. 18Aalé mú gállé giri hí ˈdéé af kaayká les gaa kieká gaal hé ˈdéé hót ˈdeew-, yú af ki raradheká ma ka hôn. 19Gáál ˈdeemlé kinaallá gáál nyátál Waaglé-, ubaa héétí máá kufe-, gaalí Yíésu yeget-, Báulo íín kieye, Hé luol, muí yeget mare, ˈdaallé he ki yaalla.
20ˈDeenyééllá ˈgíéríchlé ke eiy ki nannuoká yú af ˈdabeká, yú mú heete, har mu Yerúsalem seseen-, yú ál kinaal mú ˈdéé ki iđimuoká muí fedoka. 21Aalé Báulo kieye, Ye Káísar ˈdú ée, yieká, in yú ˈdéé mure, giri ˈdaab yú mú Káísar ali ma ˈdú káanyká mú yuoy hí ˈbíl hiiginká ki chiiratká, Fésitos hí Agiríba yie. 22Aalé Agiríba Fésitos geey, kieye, Yú dhúrchú máállá af nee kokuoká fede, yie. Aalé Fésitos kieye, Beríka mú af nee ha kooyyo, muí mú yie.
Báulo gaalí Agiríba met eey
23Aalé bííy éíy taaka ka biˈdeká Agiríba ubaa Berníke tá nyésébích guđo-, hol ki fadhdheká hol ká eedhdhe, ˈbíl guđo-, ˈdeeká ká hile. Nyésébích kinaallá ˈbaal hí gál guguđo-, yuoy met ki ˈgieká. Gáál ˈdáá tikiˈd hí gál guguđo-, ˈjiennoká. Aalé Fésitos kieye, Báulo ˈbíl gáá káa, yieká, Báulo đo gaalí ˈbíl gaa kaay. 24Aalé Fésitos kieye, Máá guđo Agiríba ubaa it lúl hí ál iđáállo, it máállá argiyyâ? Máállá he máá gál Yuuˈdi lullé giri ˈjien Yerusalem ubaa ˈjien Kaisaríállá gaa ijoká hí ye yiete-, gaalí kóˈdle ˈdoy-, gaal kieye, Máállá hé máá les ˈdug ˈdú ijoká muuniny, gaalí ye yieká. 25Máállá hé ˈdeew-, he ˈdeeney-, yú gaa arge-, hí kúfach mé ki kokuoká mán. Tá ˈdaa giri mu kieye, Ye Káísar ˈdú ée, muí yieká, in aalé yú kieye, Mú Róóma yú ali ˈdú kakaa, yú yie.
26Tá yáá hé ˈdúwa-, mú ˈdaalleka ˈguo-, máá guđo Káísar ˈdú verenoká mán. Aaléka, yáá hí mú lulkícho met ká eey, tá súm kó guđo Agiríba lééllá, giri ˈdeenyéél ke hát ˈdabaanká ˈgas eeyka, yú máá kúnnaa guđoká hé ˈdú verenoká ˈguoká. 27ˈDaachúka, máá hiigin gaa ijoká ke máá kúnnaa guđo Káísar ali ˈdú kaay-, kor héllé mákárta ˈdeew he ˈdeeđeneyká ke mú ma ˈdú veerinyka, hé kinaallá hé tagle muuniny, Fésitos hí Agiríba yie.
Currently Selected:
He Ekeny Gál Alb Fimiká 25: dsh
Highlight
Share
Compare
Copy
Want to have your highlights saved across all your devices? Sign up or sign in
Bible Translation and Literacy
