He Ekeny Gál Alb Fimiká 11
11
Gál alb fimiká Bétiro ˈdéé ki iđie
1Gál alb fimiká ubaa gál giri nyaaram-, Yiesu Kirísto iiy yie-, lés Yuuˈdia gaa ijeká kidh hát ˈdeeny Waaˈgiet iiy yieká maale. 2Aalé Bétiro Yerúsalem hol ˈdú nadheká gál Yuuˈdi giri Yíésu iiy yieká ˈdáá tikiˈd#11:2 Gál Yuuˈdi Yíésu iiy yieká ˈdáá tikiˈd gál kidhdho Yíésu iiy yeetká gaalí heermisuoká he fede. mú ki lole, 3gaal kieye, Háteka gál ma hermisanká ényle siete-, hí hol af gaa konyéel? gaalí mú yie.
4Aalé Bétiro gáál ˈdéé hát ˈdabaanká ˈgas gaa koy, 5kieye, Yú ˈjien Yooba gaa ije. Kulich tikiˈd Waag chia viviteká, me đo ye húˈd yie. Hé Waag yé gáá ˈdie-, hát đafar ká yaal-, guđo-, gaalí ˈdinnam áfúrle ki ˈgie-, gaalí úr gáá leesie mare yú arge. 6Aalé hé kinaal yú geer gaa dhaayká bine ˈgas hí aafure-, baaˈdietká ubaa guuré, tá kimir kuol ˈgayyoká hí gaa ija. 7Aalé yú ˈdéé hót ye geđicheká a maale, ˈdéé hót kieye, Bétiro, le gaa keʼ, héél áas, he kom, ˈdéé hót hí ye chie. 8Aalé yú ˈdéé hol nie, yú kieye, Máá Guđo, hé hát kinaallá muuniny. Yáá hé gaa nyakarich-, gál chia Yuuˈdi-, hí ma kokonyká kálta af ma gaa naanîny, yú yie.
9ˈDéé hót geđi af ki naamaká úr gáá ˈgite, kieye, Hé Waag hí iiy chie-, hí ko ká shiicheká ha hé gaa nyakarichká chéen, ˈdéé hót hí ye chie. 10Héél af hí seđ yieká he lulle geđi gaalí úr ki eedhdhe.
11Tíkíˈdé kinaal gál seđe gaalí Kaisária ye ali ˈdú gáá fie mare ˈbíl yú gaa ijeká af kí ˈdie. 12Aalé Hím Naasan Waaˈgiet ye geeyche, giri gáál nyí hol egeet-, yú ger totom ma gaa ˈgiˈgisanká. Gál le nyaaramallá úba nyí hol eete, máá gaalí Kornélios yeget mare ˈbílle nyí ki faanne. 13Mu hát máá ˈgasso-, urruká hí ˈbílle geer yé ˈdú gáá ˈdieká nyí geey. Hé máá ˈgasso-, urruká hí mú geeyká kieye, ˈJien Yooba gálaat ali ˈdú faʼ, Símon gaalí Bétiro yegetká gaalí ko kí vie. 14Mu fayam kúún ubaa gálkú lulkícho hí biisichoká haí ˈdu gáá siidha, muí mú yie.
15Aalé yú ˈdéé mé gáá eeyká Hím Naasan Waaˈgiet hát giri héle erkob múún gáál ˈdú gáá leeteká úba gáál ˈdu gáá leete. 16Aalé hé toomeelloʼ Máá Guđoká hí gáál ka geeyká ye táb ká ˈjie, giri mu kieye, Yuána íín bie gálaat gim nie, tá itín Hím Naasan Waaˈgieto Waag hí gim nanniyya, muí gáál yieká. 17Har Waag Hím Naasanle af giri múúni ke Máá Guđo Yiesu Kirísto iiy yieká gáál ka shiicheká úba gaal íín shiicheka, yú mááya Waag gaa điidhanal? Bétiro hí gáál yie. 18Aalé gaal ˈdeenyéél maaleká hol ki fálaam hay, Waag meey, kieye, Taglé, Waag úba hé kidh kár he héllé ˈdeđewká ki haađuo-, gaalí makan ki fafaanká shiiche, giri gaal luolmít aargiroká.
Gál Yíésu iiy yie-, ˈjien Antiok gaa ijeká
19Af giri Estéfan gaalí yies-, manyjasiny gál Yíésu iiy yieká biiy gáá ˈdiiyyeká, gál gaalí manyjasie kinaal ˈbáál bííy he kar ˈdú ˈdane-, he mé đig yieká he lés Foinike, lés Kuburos, tá ˈjien Antiok. Gaal gállé Yuuˈdiká tákáma ˈdeeny Yiesuká geey. 20Aalé gál Yerúsalem kar gaa ˈdane-, Ántiok mé nieká ˈdáá tikiˈd hí gál lés Kuburos, ˈbaal hí gál ˈjien Kurene. Gál kinaallá ˈjien Antiok kí fameká gál kídh Hellen Máá Guđo Yíésu Fayamlé Midhabká úba shie. 21Aalé Waag gáál kúól gaa chirate, gál burnayká ˈdéé iiy yie, gaal Máá Guđo Yíésu gálle yie.
22Aalé fayam galallóól gál Yíésu iiy yie-, Yerúsalem gaa ijeká hí maaleká gaal máállé Barnábas Ántiok ali ˈdú kaay. 23Aalé Barnábas ali ki ˈjie-, Waag gielmitle argeká geer hí gaa meedhe, mu gáál lulle guofsie, giri gaal kasle Máá Guđoká gaa iđimuo-, mú el af ma gaa taaminyká. 24Barnábas íín tuuˈdle he máá ˈdúwa-, Hím Naasan Waaˈgiet hí koch onnoyye-, iiy yeen guđoká ˈgieká, in gál burnayká Máá Guđoká iiy yie.
25Aalé mu Társos sedhe, Sáwul ál kinaal ˈdú ˈgeˈgedhe. 26Aalé mu Sáwul argeká mú Ántiok ˈdu gáá eedhdhe. Gaal hullaalle ubaa gál Yíésu iiy yie-, al Antiok kinaalloká hol war tikiˈd af yíéđie. Gaal gál burnayká fayam Yiesu Kiristo onisie. Ál Antiok kinaallá in erkob gál láliká gaalí gál Kiristo gaa yie.
27Af kinaal gál Waag hí ˈdéé ka shigiche mare Yerúsalem gáá yimie, Ántiok kí fame. 28Gál kinaal mú tikiˈd máá gaalí Ágabos yegie mare les gaa kie, ˈdaa fargogint Hím Naasan Waaˈgietká les lulle hát kuoˈd ˈdeewká hí gáá ˈdeˈdeennoká ˈdiiyime. (Kuoˈd kinaallá af giri Kaláúˈdias giri Káísar léká he máá kansich onnoyká les gáá ˈdiiyye.) 29Gál Yíésu iiy yieká hátlé giri hol he ˈdú ˈgaˈguoká ˈdeemanolle ger ki muumuˈde. Gaal nyaaramlé giri gál Yíésu iiy yie-, lés Yuuˈdia gaa ijeká he ˈdaˈdablé shigieká hol ˈdú shuune. 30Gaal héllé hol ˈdú shuune-, gállé nyaaram-, lés Yuuˈdia gaa ijeká ali ˈdú fafieká Barnábas ubaa Sáwul gíl fie, he gaalí gáál karulle ˈdú sidhe.
Currently Selected:
He Ekeny Gál Alb Fimiká 11: dsh
Highlight
Share
Compare
Copy
Want to have your highlights saved across all your devices? Sign up or sign in
Bible Translation and Literacy
