Esita 7
7
Podho pa Haman
1Ameno kere gi Haman jokadho i kalima pa Esita. 2Munyo jomadho vini i kalima mar'ario, kere doko openjo Esita ni, “Esita nyamicala, aŋo m'ikwayo? Abino miyin. Aŋo m'imito? Makada nende bedi ni adec ma ker paran, abino ketho i kare.”
3Cipa kere Esita odwoko ni, “K'inen kere winjo kodan maber, aka anwaŋo wor wok bongi kere, kwo paran am'akwayo, aka kwo pa ji paran am'amito. 4Otana an gi ji paran ŋey worey wan woko, woneki wan, aka wotoŋ wan. Kabedi nende oyido otana wan paka ŋecin nyaka, mon gi cwo, dinyo aliŋ m'ongoye wac m'owok i dhokan; to ongoye jakwor pa kere manyalo culo go i waŋ nyekirok me.”
5Kere Aritakises openjo Esita nyamicala ni, “Meno obedo ŋa? Nikune ŋat'ocano timo gime?” 6Esita odwoko ni, “Jakwor mawan, aka ŋat'odak wan obedo jacwo marac me Haman.” Haman obwok swa ruwaŋ kere gi nyamicala. 7Aka kere oay malo gi nge, oweyo vini pere to wok i diedipo ma peco pere. Kome Haman odoŋ cen ywak ri Esita wonyali botho kwo pere rupiri go oyido otieko niaŋ paka kere nyalo reyo go woko. 8I wickwot Haman oriere piny i tiendi Esita kama Esita oyido obedo cemo. Kenyo won ama kere bende odwoko wok i diedipo pere to donjo i ot kam'oyido jomedh'iye. Kere oywaki gi dwonde ma malo ni, “Imito cayo nyamicala gi peco paran ka, ruwaŋan won!”
Mafodi wac k'opodho i dhok kere, ŋecin pa kere jotweyo waŋ Haman ma nyutho gike pere. 9Acel kwoŋ ŋecin pa kere ma lur m'ilwoŋo ni Harbona owaco ni, “Haman omedere kiri to geto kanek ma fut piero abirio g'abic i diedipo pere ma ŋawo Modekay, ŋat'obotho kwo pa kere ndir m'oyido imito neko kere.”
To kere waco ni, “Ŋaw win go i kanek no.”
10Oŋaw Haman i kanek ma fut piero abirio g'abic to nyaka nge pa kere kwe.
Currently Selected:
Esita 7: DHOPE
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.