Buraambi 21
21
Paulo atsya i Yerusalemu
1Ne ni khwamala khukhwawukhana ni nabo, ifwe khwenjila mu meeri, khwawamba intsila intsalaafu khwatsya i Kosi. Shifukhu shishelakho khwoola i Rodesi. Ni khwama iyo khwatsya i Patara. 2Ibweene iyo khwanyoolayo i meeri nga itsya i Foyinisiya, khwenjilamo khwatsya. 3Ne ni khwembiiyisa shiriimba she Kupulo, khwashilekha khu mukhono kumunyeletsi, khweloosela khwatsya i Siriya, khweemakho i Tulo lwekhuba abe bibiindu bye mu meeri bili ni khurusiwilakho ibweene iyo. 4Ni khwamala khunyoola baleekelwa ibweene iyo, khwamenyayo bifukhu musaafu. Nga baraangililwa n'Umwoyo Umukhosefu, bareewula Paulo bari, akhatsya i Yerusalemu ta. 5Ne bifukhu byeefwe bye khumenyayo ni byawakho, khwarurayo khwatsya. Baleekelwa b'eyo boosi ni bakhasi baawe, ni babaana baawe boosi bakhuroonjesa khukhwoolesa ni khwarura mu shiriimba. Ne ni khwoola mu lukyeewa lulubotokhelele inyaantsa, khwafukhama asi khwaloomba 6Ni khwamala khusibulana, ifwe khwaniina mu meeri khwatsya, ne nibo bakobolayo ingo waabwe.
7Khuryo khweloosela ni lukyeendo lweefwe khukhwaama i Tulo khwoola i Potolemesi. Khwakyeniyilakho be buulebe babaaba iyo, khwaba ni nabo khumala shifukhu shitweela. 8#Bur 6.5; 8.5Ni bwasha kumutikhinyi, khwarurayo, khwatsya i Kayisaliya. Khwenjila mungo mwa Filipo, abe uboolela babaandu Kamakhuuwa Kamalayi, uwaba mutweela khu baandu musaafu, khwamenya ni naye. 9Filipo aba ali ni babaana beewe bakhaana bane tsindungubaasi busa, babaaboola bye buŋoosi bwa Wele.
10 #
Bur 11.28
Nga khushimenya ibweene iyo, umuŋoosi isi balaanga bari Agabo weetsa khukhwaama i Yuda. 11Ne n'etsa isi khwaba, wabukula lukhoba lwa Paulo lweesi ebowa mu shikuute, wabowa bikyele byeewe ni kamakhono keene, waloma ari, “Umwoyo Umukhosefu aloma ari, ‘Bayudaaya be mu Yerusalemu balibowa umweene uwe lukhoba luno, bamuwaaneyo mu buwuli bwe Banaambo.’ ”
12Ni khwawulila bino, ifwe ni babaandu b'eyo, khwekontselela Paulo khuri alekhe khuutsya i Yerusalemu ta. 13Kila Paulo elamo ari, “Shiina kila mulikho mukhola muryo? Shiina kila mulikho mulila nalundi muumalamo ise kamaani mu mwoyo? Lwekhuba ise siindi mwirekefu lwe khubowebwa khwonyene ta, ne indi mwirekefu akhaba ni khufwila i Yerusalemu khulwe lisiina ly'Omukasya Yezu.”
14Ne ni khwakhasikha khumuwooyawooya lundi, khwamulekha nga khuloma khuri, “Khayo sheesi Umukasya akana shikholebwe.”
15Lwanyuma lweebyo, khwerengekharengekha khwatsya i Yerusalemu. 16Batweela khu baleekelwa babaama i Kayisaliya baatsya ni nafwe. Baryo bakhuyila mungo mwa Munasoni, uwe Kupulo, uwaba mutweela khu baleekeli babanyoowa, abe isi khuutsya khukona.
Paulo akyeniyila Yakobo
17Khuryo ni khwoola i Yerusalemu, be buulebe bakhwikhoyela naabi. 18Khu shifukhu shishelakho, Paulo watsya ni nafwe isi Yakobo, ni basakhulu boosi b'eyo babaayo. 19Aryo Paulo n'amala khubasheesa, wabasontsoola buli shitweela khu biindu byeesi Wele akholela Banaambo khubirira mu buraambi bweewe.
20Ne ni bawulila shino, baruuya Wele. Lwanyuma balomela Paulo bari, “Uwe buulebe waboone, kimikaanda mikali kye Bayudaaya bekyelile bafukiilisi, nalundi boosi batsiinikhila naabi kamakaambila ka Musa. 21Bamala khaale khubaboolela byoosi bibikhuwamba khwiiwe, bari uleekela Bayudaaya boosi babamenya mu Banaambo uri bakhalondelela bya Musa ta, nga ubaboolela uri bakhakheba babaana baawe ta, namwe khuwamba kimisilo kye Bayudaaya ta. 22Ari, ifwe kane khukhole khuryeena? Lwekhuba ilala banawulila bari weetsile ino. 23#Bala 6.13-21Nashiryo n'ukhole sheesi khukhuboolela. Ifwe khuli ano ni basaani bane babamala khaale khukhwitsubisibwa. 24Ari n'utsye ni nabo, wipyeluuse wamweene atweela ni nabo, lwanyuma wisasulile isi bali. Shino kane shikile babekekho litsuune lyaawe. Shino kane shireerere babaandu boosi khumanya bari abe byeesi bakhuwulilakho iwe sibilimo itsamu ta, ne akhali ndi iwe wamweene witsililisa nga uwamba kamakaambila ka Musa. 25#Bur 15.29Ne khu luwande lwe Banaambo babekyela bafukiilisi, khwamalile khaale khubaronela burume bububaboolela khukhalawo khweefwe khuri, bakhalyatsaka isho shoosi sheesi bawongeele bifwaani ta, bakhalyatsaka kamalasile ta, bakhalyatsaka shishaayo sheesi bakokile busa ta, nalundi khuri bakhakhola buyeyani ta.”
26Shiryo shifukhu shishelakho, Paulo watsya ni basaani tsana bano, waatsya wepyeluusa umweene atweela ni nabo. Lwanyuma wenjila mu Lisaayilo Likhulu, nga atsya khulaalikha shifukhu khweesi khukwalaasibwa khulyoolelesebwa, ni lweesi shiwaanwa shiliwaanibwayo khu lwa buli mutweela khu nibo.
Khuwambibwa khwa Paulo
27Nga bifukhu musaafu ibyo bili ambi khuwakho, Bayudaaya khukhwaama i Asiya, babona Paulo mu Lisaayilo Likhulu, benyusa shisaayumba mu baandu boosi. Kila bawamba Paulo, 28nga bayokesela angaaki bari, “Ba Isiraeli ni mukhuyeete. Umuundu yuno niye wutsya nga aleekela babaandu buli andu osi ari balekhe khulondelela kamakaambila ka Musa ta, nalundi ari bakhesamo lukoosi shiifwo shino ta. Ni khuminyisila ilala, wareera Bayonaani mu Lisaayilo Likhulu, ni naye umweene wakholile she kumusilo mu shifwo shikhosefu.” 29#Bur 20.4Lwekhuba abe makiboole baboone Paulo nga ali ni Tulofimu uwe mu Efeso nga ali mu shiriimba, bambaasa bari Paulo wetsile ni naye mu Lisaayilo Likhulu.
30Shiryo shiriimba shoosi shakyemukha, babaandu batima babusana. Baryo bafwakhila Paulo, bamukhwekhweesa bamuyila ibulafu we Lisaayilo Likhulu. Khaangukho bekalawo bilibwa byoosi. 31Ne ni baaba nga bakhakakho khukhwiira Paulo, tsilomo tsyoolela umukhulu we liye lye basilikhale, bari Yerusalemu yetsuulemo shisaayumba. 32Lubaluba umusilikhale umukhulu yuno umweene, ni basilikhale atweela ni babaraangilila, batima beekha isi babaandu baaba. Baryo banashisaayumba ni babona umukhulu we liye atweela ni basilikhale, balekhelawo khukhupa Paulo.
33Abweene awo umukhulu we liye wesyeenda ambi wawamba Paulo, walakila ari bamubowe kiminyololo kibili. Kila areeba ari “Naanu uyu, nalundi wakholile shiina?” 34Kila babaandu mu lituuli bayokesela angaaki nga buli batweela baloma bibyaawe, ni babaandi bibyaawe busa. Aryo umusilikhale n'abona nga s'anyala wekura bulayi byeesi balikho baloma ta khu lwe liyoombo likali, walakila ari bayile Paulo mu lumako lwe basilikhale. 35Ne Paulo n'aatabula khu biniinilo bye lumako, basilikhale bamusuta busa khu lwe shisaayumba sha wanamundu. 36Nga baloondilekho inyuma, nga bayokesa bari, “Ni mumwiire!”
Paulo umweene elomakho
37Basilikhale ni baaba nga bakana khukhwinjisa Paulo mu lumako lwe basilikhale, kila areeba umukhulu we basilikhale ari, “Unyala wafukiilila nabakho ni sheesi ikhuboolela?”
Umukhulu yuno kila areeba Paulo ari, “Wamanya Luyonaani? 38Iwe s'uli niye umu Misiri uyo, mu bifukhu bibikhali bye aleeyikho ta, uwarakikhisa shisaayumba nalundi waraangilila banabumiinyi biikana bine, mwatsya mu mubiimbi?”
39Paulo welamo ari, “Ise indi Umuyudaaya, khukhwaama i Taruso, shishiili mu Kilikiya, indi umwikhali we mu shiriimba shishimanyikhaane. Nakhwikontseleele, n'ufukiilise inganikhekho isi babaandu.”
40Ne umusilikhale n'amuwa lukusa khukanikha isi babaandu, Paulo weema khu biniinilo, wenyusa kumukhono angaaki, babaandu basila lutweela. Aryo kila abakanikhayo mu lulimi Luheburaniya, nga aloma ari:
Currently Selected:
Buraambi 21: LCE
Highlight
Copy
Compare
Share
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.
Buraambi 21
21
Paulo atsya i Yerusalemu
1Ne ni khwamala khukhwawukhana ni nabo, ifwe khwenjila mu meeri, khwawamba intsila intsalaafu khwatsya i Kosi. Shifukhu shishelakho khwoola i Rodesi. Ni khwama iyo khwatsya i Patara. 2Ibweene iyo khwanyoolayo i meeri nga itsya i Foyinisiya, khwenjilamo khwatsya. 3Ne ni khwembiiyisa shiriimba she Kupulo, khwashilekha khu mukhono kumunyeletsi, khweloosela khwatsya i Siriya, khweemakho i Tulo lwekhuba abe bibiindu bye mu meeri bili ni khurusiwilakho ibweene iyo. 4Ni khwamala khunyoola baleekelwa ibweene iyo, khwamenyayo bifukhu musaafu. Nga baraangililwa n'Umwoyo Umukhosefu, bareewula Paulo bari, akhatsya i Yerusalemu ta. 5Ne bifukhu byeefwe bye khumenyayo ni byawakho, khwarurayo khwatsya. Baleekelwa b'eyo boosi ni bakhasi baawe, ni babaana baawe boosi bakhuroonjesa khukhwoolesa ni khwarura mu shiriimba. Ne ni khwoola mu lukyeewa lulubotokhelele inyaantsa, khwafukhama asi khwaloomba 6Ni khwamala khusibulana, ifwe khwaniina mu meeri khwatsya, ne nibo bakobolayo ingo waabwe.
7Khuryo khweloosela ni lukyeendo lweefwe khukhwaama i Tulo khwoola i Potolemesi. Khwakyeniyilakho be buulebe babaaba iyo, khwaba ni nabo khumala shifukhu shitweela. 8#Bur 6.5; 8.5Ni bwasha kumutikhinyi, khwarurayo, khwatsya i Kayisaliya. Khwenjila mungo mwa Filipo, abe uboolela babaandu Kamakhuuwa Kamalayi, uwaba mutweela khu baandu musaafu, khwamenya ni naye. 9Filipo aba ali ni babaana beewe bakhaana bane tsindungubaasi busa, babaaboola bye buŋoosi bwa Wele.
10 #
Bur 11.28
Nga khushimenya ibweene iyo, umuŋoosi isi balaanga bari Agabo weetsa khukhwaama i Yuda. 11Ne n'etsa isi khwaba, wabukula lukhoba lwa Paulo lweesi ebowa mu shikuute, wabowa bikyele byeewe ni kamakhono keene, waloma ari, “Umwoyo Umukhosefu aloma ari, ‘Bayudaaya be mu Yerusalemu balibowa umweene uwe lukhoba luno, bamuwaaneyo mu buwuli bwe Banaambo.’ ”
12Ni khwawulila bino, ifwe ni babaandu b'eyo, khwekontselela Paulo khuri alekhe khuutsya i Yerusalemu ta. 13Kila Paulo elamo ari, “Shiina kila mulikho mukhola muryo? Shiina kila mulikho mulila nalundi muumalamo ise kamaani mu mwoyo? Lwekhuba ise siindi mwirekefu lwe khubowebwa khwonyene ta, ne indi mwirekefu akhaba ni khufwila i Yerusalemu khulwe lisiina ly'Omukasya Yezu.”
14Ne ni khwakhasikha khumuwooyawooya lundi, khwamulekha nga khuloma khuri, “Khayo sheesi Umukasya akana shikholebwe.”
15Lwanyuma lweebyo, khwerengekharengekha khwatsya i Yerusalemu. 16Batweela khu baleekelwa babaama i Kayisaliya baatsya ni nafwe. Baryo bakhuyila mungo mwa Munasoni, uwe Kupulo, uwaba mutweela khu baleekeli babanyoowa, abe isi khuutsya khukona.
Paulo akyeniyila Yakobo
17Khuryo ni khwoola i Yerusalemu, be buulebe bakhwikhoyela naabi. 18Khu shifukhu shishelakho, Paulo watsya ni nafwe isi Yakobo, ni basakhulu boosi b'eyo babaayo. 19Aryo Paulo n'amala khubasheesa, wabasontsoola buli shitweela khu biindu byeesi Wele akholela Banaambo khubirira mu buraambi bweewe.
20Ne ni bawulila shino, baruuya Wele. Lwanyuma balomela Paulo bari, “Uwe buulebe waboone, kimikaanda mikali kye Bayudaaya bekyelile bafukiilisi, nalundi boosi batsiinikhila naabi kamakaambila ka Musa. 21Bamala khaale khubaboolela byoosi bibikhuwamba khwiiwe, bari uleekela Bayudaaya boosi babamenya mu Banaambo uri bakhalondelela bya Musa ta, nga ubaboolela uri bakhakheba babaana baawe ta, namwe khuwamba kimisilo kye Bayudaaya ta. 22Ari, ifwe kane khukhole khuryeena? Lwekhuba ilala banawulila bari weetsile ino. 23#Bala 6.13-21Nashiryo n'ukhole sheesi khukhuboolela. Ifwe khuli ano ni basaani bane babamala khaale khukhwitsubisibwa. 24Ari n'utsye ni nabo, wipyeluuse wamweene atweela ni nabo, lwanyuma wisasulile isi bali. Shino kane shikile babekekho litsuune lyaawe. Shino kane shireerere babaandu boosi khumanya bari abe byeesi bakhuwulilakho iwe sibilimo itsamu ta, ne akhali ndi iwe wamweene witsililisa nga uwamba kamakaambila ka Musa. 25#Bur 15.29Ne khu luwande lwe Banaambo babekyela bafukiilisi, khwamalile khaale khubaronela burume bububaboolela khukhalawo khweefwe khuri, bakhalyatsaka isho shoosi sheesi bawongeele bifwaani ta, bakhalyatsaka kamalasile ta, bakhalyatsaka shishaayo sheesi bakokile busa ta, nalundi khuri bakhakhola buyeyani ta.”
26Shiryo shifukhu shishelakho, Paulo watsya ni basaani tsana bano, waatsya wepyeluusa umweene atweela ni nabo. Lwanyuma wenjila mu Lisaayilo Likhulu, nga atsya khulaalikha shifukhu khweesi khukwalaasibwa khulyoolelesebwa, ni lweesi shiwaanwa shiliwaanibwayo khu lwa buli mutweela khu nibo.
Khuwambibwa khwa Paulo
27Nga bifukhu musaafu ibyo bili ambi khuwakho, Bayudaaya khukhwaama i Asiya, babona Paulo mu Lisaayilo Likhulu, benyusa shisaayumba mu baandu boosi. Kila bawamba Paulo, 28nga bayokesela angaaki bari, “Ba Isiraeli ni mukhuyeete. Umuundu yuno niye wutsya nga aleekela babaandu buli andu osi ari balekhe khulondelela kamakaambila ka Musa ta, nalundi ari bakhesamo lukoosi shiifwo shino ta. Ni khuminyisila ilala, wareera Bayonaani mu Lisaayilo Likhulu, ni naye umweene wakholile she kumusilo mu shifwo shikhosefu.” 29#Bur 20.4Lwekhuba abe makiboole baboone Paulo nga ali ni Tulofimu uwe mu Efeso nga ali mu shiriimba, bambaasa bari Paulo wetsile ni naye mu Lisaayilo Likhulu.
30Shiryo shiriimba shoosi shakyemukha, babaandu batima babusana. Baryo bafwakhila Paulo, bamukhwekhweesa bamuyila ibulafu we Lisaayilo Likhulu. Khaangukho bekalawo bilibwa byoosi. 31Ne ni baaba nga bakhakakho khukhwiira Paulo, tsilomo tsyoolela umukhulu we liye lye basilikhale, bari Yerusalemu yetsuulemo shisaayumba. 32Lubaluba umusilikhale umukhulu yuno umweene, ni basilikhale atweela ni babaraangilila, batima beekha isi babaandu baaba. Baryo banashisaayumba ni babona umukhulu we liye atweela ni basilikhale, balekhelawo khukhupa Paulo.
33Abweene awo umukhulu we liye wesyeenda ambi wawamba Paulo, walakila ari bamubowe kiminyololo kibili. Kila areeba ari “Naanu uyu, nalundi wakholile shiina?” 34Kila babaandu mu lituuli bayokesela angaaki nga buli batweela baloma bibyaawe, ni babaandi bibyaawe busa. Aryo umusilikhale n'abona nga s'anyala wekura bulayi byeesi balikho baloma ta khu lwe liyoombo likali, walakila ari bayile Paulo mu lumako lwe basilikhale. 35Ne Paulo n'aatabula khu biniinilo bye lumako, basilikhale bamusuta busa khu lwe shisaayumba sha wanamundu. 36Nga baloondilekho inyuma, nga bayokesa bari, “Ni mumwiire!”
Paulo umweene elomakho
37Basilikhale ni baaba nga bakana khukhwinjisa Paulo mu lumako lwe basilikhale, kila areeba umukhulu we basilikhale ari, “Unyala wafukiilila nabakho ni sheesi ikhuboolela?”
Umukhulu yuno kila areeba Paulo ari, “Wamanya Luyonaani? 38Iwe s'uli niye umu Misiri uyo, mu bifukhu bibikhali bye aleeyikho ta, uwarakikhisa shisaayumba nalundi waraangilila banabumiinyi biikana bine, mwatsya mu mubiimbi?”
39Paulo welamo ari, “Ise indi Umuyudaaya, khukhwaama i Taruso, shishiili mu Kilikiya, indi umwikhali we mu shiriimba shishimanyikhaane. Nakhwikontseleele, n'ufukiilise inganikhekho isi babaandu.”
40Ne umusilikhale n'amuwa lukusa khukanikha isi babaandu, Paulo weema khu biniinilo, wenyusa kumukhono angaaki, babaandu basila lutweela. Aryo kila abakanikhayo mu lulimi Luheburaniya, nga aloma ari:
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.