1 Yokana 4
4
Umwoyo waŋali ni kumwoyo kwe bubeeyi
1Be buulebe bakanwa, mukhafukiilisatsaka buli muundu yeesi uloma ari, ali n'Umwoyo wa Wele ta. Ne ni mutseme Umwoyo uyo khubona nga noola ama isi Wele namwe ta, lwekhuuba baŋoosi be bubeeyi bakali benyukhile aasi, basalaniile mu shiibala. 2Mu shino nimwo mweesi kane mumanyile Umwoyo wa Wele: Umwoyo uyo ubuula ari Yesu Kristo wayiitsila mu mubili, aba ama isi Wele. 3Ne buli muundu uwikaana khubuula aryo khu Yesu, aba s'ali ni Mwoyo uwama isi Wele ta. Umwoyo uyo aba uwa Sitaani, umusiku wa Kristo esi mwawulilakho bari, alikhukhwiitsa, ni na ari ano wayiitsa khaale ali mu shiibala.
4Baana baase, inywe muli babaana ba Wele, luundi mwamala khaale khuuwula baŋoosi be bubeeyi, lwekhuuba Umwoyo uli mus'iinywe uwe kamaani khufuura uyo uuli uwe shiibala. 5Basiku bano nibo bali be shiibala, nashiryo buli sheesi bakanikha shiba she shiibala busa, ni shiibala shibarekeeresa. 6Ifwe khuli ba Wele. Nabuli muundu umanyile Wele akhurekeeresa ifwe. Ne uyo ukhali uwa Wele ta, s'akhurekeeresa ifwe ta. Musaambo yino niyo mweesi khumanyilamo Umwoyo wa ŋali ni mwoyo we bubeeyi.
Wele niye Khuukana
7Bakanwa baase, khakhukanane fwenyene na fwenyene, lwekhuuba khuukana khwaama isi Wele, na buli muundu uli ni khuukana aba wasaalikha ni Wele luundi aba waamanya Wele. 8Buli muundu ukhali ni khuukana, aba ashiili khumanya Wele ta, lwekhuuba Wele niye khuukana. 9Mu shino nimwo mweesi khuukana khwa Wele khwokesewela isi khuli ndi: Wele aarumana umwaana weewe mutweela yenyene mu shiibala ari nio ifwe khunyale khuuba baalamu khuubirira mu niye. 10Khuukana ukhwo nikhwo khuno: akhuba ndi ifwe khukhwakana Wele ta, ne ndi Wele niye aakhukana ifwe, waarumana Umwaana weewe khuuba imboselo ye bibyoonako byeefwe.
11Bebuulebe bakanwa, Wele nga n'akhukana ifwe aryo, nafwe khwaakha khukanane fwenyene na fwenyene. 12#Yok 1.18Mbaawo umuundu yeesi uwabonakho khu Wele ta. Ne ni khuukanana fwenyene na fwenyene, Wele aba ali mus'iifwe, ni khuukana khweewe khwoolelela mus'iifwe.
13Ifwe khwaamanya khuri, ifwe khuli mu Wele, ni Wele naye amenya mus'iifwe, lwekhuuba wakhuwa ifwe Umwoyo weewe. 14Ni nafwe khwabona, luundi khwawakho bujulisi isi babaandi khuri, Paapa arumana Umwaana weewe khuuba Umuwonesi we shiibala. 15N'umuundu yeesi ubuula ari Yesu ali Umwaana wa Wele, Wele aba ali mu muundu uyo, ni naye aba mu Wele. 16Nafwe khwaamanya luundi khwaayiyikamilila khu khukana khweesi Wele ali nakhwo isi khuli.
Wele niye khuukana, na buli muundu yeesi uba mu khukana, aba mu Wele, ni Wele aba ali mu niye. 17Mu shino nimwo mweesi khuukana khwoolelesewela mus'iifwe, nio khunyale khuuba ni kamaani khu shifukhu she khukhalilakho kumusaango, lwekhuuba buulamu bweefwe mu shiibala muno khubumenya nga Kristo n'aba. 18Mu khukana khwa ŋali mbaamo khuurya khwoosi ta, ni khuukana khwelala khurusawo khuurya khwoosi, lwekhuuba khuurya khwiitsa lwe shitaambiso. Umuundu uba ni khuurya s'aba olelela mu khukana ta.
19Ifwe khuli ni khuukana lwekhuuba Wele aanyoowa khuukhukana ifwe. 20Umuundu yeesi n'aloma ari, “Ise ngana Wele,” ne wabiiyila umuundu washe, aba umubeeyi. Lwekhuuba umuundu ukhakana umuundu washe isi abonakho ni tsimoni, s'anyala khuukana Wele isi akhabonakho ni tsimoni ta. 21Likaambila lyeesi Kristo akhuwa nilyo lino ndi: “Buli muundu ukana Wele, aakha khuukana n'umuundu washe naye.”
Currently Selected:
1 Yokana 4: LPE
Highlight
Copy
Compare
Share
Want to have your highlights saved across all your devices? Sign up or sign in
The Bible in Lumasaaba © Bible Society of Uganda, 2016.
1 Yokana 4
4
Umwoyo waŋali ni kumwoyo kwe bubeeyi
1Be buulebe bakanwa, mukhafukiilisatsaka buli muundu yeesi uloma ari, ali n'Umwoyo wa Wele ta. Ne ni mutseme Umwoyo uyo khubona nga noola ama isi Wele namwe ta, lwekhuuba baŋoosi be bubeeyi bakali benyukhile aasi, basalaniile mu shiibala. 2Mu shino nimwo mweesi kane mumanyile Umwoyo wa Wele: Umwoyo uyo ubuula ari Yesu Kristo wayiitsila mu mubili, aba ama isi Wele. 3Ne buli muundu uwikaana khubuula aryo khu Yesu, aba s'ali ni Mwoyo uwama isi Wele ta. Umwoyo uyo aba uwa Sitaani, umusiku wa Kristo esi mwawulilakho bari, alikhukhwiitsa, ni na ari ano wayiitsa khaale ali mu shiibala.
4Baana baase, inywe muli babaana ba Wele, luundi mwamala khaale khuuwula baŋoosi be bubeeyi, lwekhuuba Umwoyo uli mus'iinywe uwe kamaani khufuura uyo uuli uwe shiibala. 5Basiku bano nibo bali be shiibala, nashiryo buli sheesi bakanikha shiba she shiibala busa, ni shiibala shibarekeeresa. 6Ifwe khuli ba Wele. Nabuli muundu umanyile Wele akhurekeeresa ifwe. Ne uyo ukhali uwa Wele ta, s'akhurekeeresa ifwe ta. Musaambo yino niyo mweesi khumanyilamo Umwoyo wa ŋali ni mwoyo we bubeeyi.
Wele niye Khuukana
7Bakanwa baase, khakhukanane fwenyene na fwenyene, lwekhuuba khuukana khwaama isi Wele, na buli muundu uli ni khuukana aba wasaalikha ni Wele luundi aba waamanya Wele. 8Buli muundu ukhali ni khuukana, aba ashiili khumanya Wele ta, lwekhuuba Wele niye khuukana. 9Mu shino nimwo mweesi khuukana khwa Wele khwokesewela isi khuli ndi: Wele aarumana umwaana weewe mutweela yenyene mu shiibala ari nio ifwe khunyale khuuba baalamu khuubirira mu niye. 10Khuukana ukhwo nikhwo khuno: akhuba ndi ifwe khukhwakana Wele ta, ne ndi Wele niye aakhukana ifwe, waarumana Umwaana weewe khuuba imboselo ye bibyoonako byeefwe.
11Bebuulebe bakanwa, Wele nga n'akhukana ifwe aryo, nafwe khwaakha khukanane fwenyene na fwenyene. 12#Yok 1.18Mbaawo umuundu yeesi uwabonakho khu Wele ta. Ne ni khuukanana fwenyene na fwenyene, Wele aba ali mus'iifwe, ni khuukana khweewe khwoolelela mus'iifwe.
13Ifwe khwaamanya khuri, ifwe khuli mu Wele, ni Wele naye amenya mus'iifwe, lwekhuuba wakhuwa ifwe Umwoyo weewe. 14Ni nafwe khwabona, luundi khwawakho bujulisi isi babaandi khuri, Paapa arumana Umwaana weewe khuuba Umuwonesi we shiibala. 15N'umuundu yeesi ubuula ari Yesu ali Umwaana wa Wele, Wele aba ali mu muundu uyo, ni naye aba mu Wele. 16Nafwe khwaamanya luundi khwaayiyikamilila khu khukana khweesi Wele ali nakhwo isi khuli.
Wele niye khuukana, na buli muundu yeesi uba mu khukana, aba mu Wele, ni Wele aba ali mu niye. 17Mu shino nimwo mweesi khuukana khwoolelesewela mus'iifwe, nio khunyale khuuba ni kamaani khu shifukhu she khukhalilakho kumusaango, lwekhuuba buulamu bweefwe mu shiibala muno khubumenya nga Kristo n'aba. 18Mu khukana khwa ŋali mbaamo khuurya khwoosi ta, ni khuukana khwelala khurusawo khuurya khwoosi, lwekhuuba khuurya khwiitsa lwe shitaambiso. Umuundu uba ni khuurya s'aba olelela mu khukana ta.
19Ifwe khuli ni khuukana lwekhuuba Wele aanyoowa khuukhukana ifwe. 20Umuundu yeesi n'aloma ari, “Ise ngana Wele,” ne wabiiyila umuundu washe, aba umubeeyi. Lwekhuuba umuundu ukhakana umuundu washe isi abonakho ni tsimoni, s'anyala khuukana Wele isi akhabonakho ni tsimoni ta. 21Likaambila lyeesi Kristo akhuwa nilyo lino ndi: “Buli muundu ukana Wele, aakha khuukana n'umuundu washe naye.”
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
The Bible in Lumasaaba © Bible Society of Uganda, 2016.