Mɨ̀h 1
1
Ŋwìə̀ fə chè ənjìm i Wan ghàm əmbɨ ə bə̂d
1À nyaʼa əŋwe, Ŋwìə̀ nyaʼa chè ənjìm mbi bə̂d ɨ̀kə̀n ghàm əmbɨ mba mɨ̀mbǎʼ rəŋwe. Ɨ wɨə nyaʼə ghɨ̀ əne ɨghəm nɔnɔʼ bə̀ fɔrɨ ənɨ mɨchî nɔnɔʼ. 2Àyɨə ɨŋga nyùmə̀ wɔ̂ nɨ sɨ nwìə̀, wɨ̀ fə ghàm ɨ na ənjìm i Wan we nɨ wɨ̀ nyaʼa nuŋ ənɨ əjɨnəb ɨgwɨ ɨghɨjìm. Wɨ̀ nyaʼa bə̀ chè ənjìm məd tekɨ ɨsɨg. 3Wan we wɨə chwi ɨchî nɨ ɨzeŋɨ zeŋɨ Ŋwìə̀ ə teə. Ɨnû jìm ɨmbə̀ʼ əməd mbɨə chwi ɨchî nɨ Ŋwìə̀ ziə yeʼ ə. Ɨ wɨə ghɨ̀ə̀ ni ɨsɨg chub ɨchî nɨ wɨ yeʼ ə. Ɨ wɨə ghɨ̀ əne ənjìm ɨka we nɨ yeʼ ənɨ ɨŋgam məd. Ənɨ wɨ̀ nyaʼa fə ghɨ̌ Ŋwiə̀ waʼ ɨnû rɨbɔ̀ŋ bə̂d, wɨ̀ nyaʼa chub əbà əbɔ ə jɨg ə Məd we nɨ berɨ ɨka jìm.
Wan Ŋwìə̀ ə dabə
4Ŋwìə̀ nyaʼa ghɨ ni Wan məd dabə chè mbɨ̀aŋgɨrə̀, ɨchî nɨ ɨkum we nɨ wɨ̀ nyaʼa naʼ ɨ bɔ bə chè wɨ mɨ̀mə̌d. 5À kɨ əmbɨ aŋgɨrə̀ wi nɨ Ŋwìə̀ nyaʼa kweʼ gha ɨ bɔ ni,
“Àwɔ̀ yɨ mɨ Wan,
tə̀chɔ̀ŋ mə fə sɨ e Mbǎʼ ə”?
Kɨ̀ à kɨ̀ əmbɨ aŋgɨrə̀ wi nɨ wɨ̀ nyaʼa gha ɨ bɔ ni,
“Mə bɨrɨ yeʼ Mbǎʼ məd,
məd bɨrɨ yeʼ mɨ Wan ə”?
6Ənɨ Ŋwìə̀ nyaʼa cha i wan fə̀d ɨŋga ɨsɨg, wɨ̀ nyaʼa ghà ni,
“Mbɨ̀aŋgɨrə̀ Ŋwìə̀ mɨ̀jìm berɨ wumnɨ əməd.”
7Wɨ̀ nyaʼa ghà ɨmbə̀ʼ mbi mbɨ̀aŋgɨrə̀ ni,
“Wɨ̀ ghɨ̀ ni mbi mbɨ̀aŋgɨrə̀ yeʼ ɨghabɨ ɨfə,
bə̀ ghɨ̀ ni mbi bə̂d ə̀fàʼì yeʼ ɨghabɨ mɨnemɨ ɨwid.”
8Àyɨə wɨ̀ nyaʼa ghà ɨmbə̀ʼ i Wan ni,
“À bɨrɨ chub ɨgun e ətən ɨfɔ̀n koŋ koŋ, kyɨə Ŋwiə̀.
À wɨə tùmbɨ̀ə̀ mbe bə̂d ɨchî nɨ kuʼnɨ.
9À wɨə ghaʼə ɨnû nɨ kuʼnɨ bə̀ bànə̀ mbe nɨ chəi mbɨ kuʼnɨ,
əne Ŋwìə̀, e Ŋwìə̀ fə zɔʼ e
ənɨ mɨwud ɨmbə̀ʼ ɨghaʼi swi ɨŋga e fîŋ.
Wɨ̀ fə zɔʼ e chè ɨchî nɨ wɨ̀ zɔʼ mbe bɔŋgɔb.”
10Wɨ̀ nyaʼa bə̀ ghà ni,
“Àwɔ̀ Ə̀nùŋɨ̀sɨg, nyaʼa tekɨ si tɨ ənɨ ɨkɔ.
À nyaʼa tekɨ ɨkaŋ ənɨ mbe ɨbɔ.
11Si mbɨ ɨkaŋ bɨrɨ nim, àyɨə à bɨrɨ tènə̀.
Si mbɨ ɨkaŋ bɨrɨ chə̀ə̀rɨ̀ ɨghabɨ ə ngywɨ̌.
12À bɨrɨ gwiʼ si bə̀ gwiʼ ɨkaŋ ɨchî nɨ mbɨə gwiʼ ə ngywɨ̌.
Si mbɨ ɨkaŋ bɨrɨ kwepɨ ɨchî nɨ mbɨə kwepɨ ə ngywɨ̌.
Àyɨə à wɨ e ɨchî.
Chəi mbe ɨghəm ɨwu bɨrɨ nɔ mì.”
13À kɨ əmbɨ aŋgɨrə̀ wi nɨ Ŋwìə̀ nyaʼa kweʼ ghà ni,
“Chub ənɨ mɨ əbɔ ə jɨgɨ
pè ənɨ mə baŋ mbe bə̂d pə̀n
əne ghɨ̀ ni mbɨ yeʼ ɨghɨ nɨ à bɨrɨ teerɨ mbe ɨwu ɨgun ə”?
14Ɨmbə̀ʼ mbɨ̀aŋgɨrə̀ mɨ̀jìm yɨ ɨzwî nɨə fàʼə̀, nɨ Ŋwìə̀ nyaʼa tom ni mbɨ weerɨ bə̂d mbe nɨ bɨrɨ jwɨ̀ rəŋgəʼ ə?
Currently Selected:
Mɨ̀h 1: mgo
Highlight
Copy
Compare
Share
Want to have your highlights saved across all your devices? Sign up or sign in
© 2013, Cameroon Association for Bible Translation and Literacy
