Gal 6
6
Wə̀d mɔʼɔ mɨ yeʼ ə ŋgəʼ, mbə̀ weerɨ əməd
1Mbɨ bɔŋgɔb, wə̀d mɔʼɔ rəbɔʼ nən mɨ ghɨ̀ ənû rɨbɔ̀ŋ, mbə̀n mbe nɨə ghɨ̀ ɨnû mbe nɨ Əzwî ə kəbɨ wɨrɨ ghɨ̀ ni wɨ̀ təm, àyɨə mbə̀ ghɨ əne ənɨ əbɔrəbɔd. Mbə̀ we əwən ɨmbə̀ʼ ə̀kwàʼnɨ̀ ə bə nyɨ ɨgwɨ nən. 2Wə̀d mɔʼɔ mɨ yeʼ ə ŋgəʼ, mbə̀ weerɨ əməd. Mbə mɨ ghɨ̀ əne, njɨ mbə fə nùŋ ɨkə we nɨ Kristo nyaʼa naʼ ɨ na. 3Wə̀d mɔʼɔ mɨ kɔndɨ ni tə yɨ əghɨ ə mɔʼɔ, nɨ ka məd yɨ i əghɨ ə mɔʼɔ, njɨ ɨ wɨə tambɨ i ɨnyod. 4Wə̀d mɔʼ mɔʼ neŋ ti rɨghɨrɨ-ɨnû. Tɨ mɨ bɔ̀ŋ, ɨ we tɨ̀ wɨ̀ goŋ ɨgɔ̂ ni tə wɨə ghɨ ɨchî chɔ̀m, nɨ chəi wɨ̀ berɨ nɨ mɨg i ɨnyod ənɨ ə wə̀d cherə, 5ɨmbə̀ʼ ɨghəm nɨ wə̀d mɔʼ mɔʼ berɨ beʼ i ɨkom.
6Wə̀d mɔʼɔ we nɨ mbɨ chwi ɨŋgam Ŋwiə̀ ɨ bɔ berɨ naʼ əbà tɨ ənɨ ɨghɨ chɔ̀m jìm mbe nɨ wɨ̀ berɨ əmbɨ we nɨ chwi ɨŋgam we ɨ bɔ.
7Tɨ mbə̀ tambɨ ə ɨnyod. Chəi wə̀d nɨ tɨ̀ wɨ̀ baʼrɨ ə Ŋwiə̀. Wə̀d bɨrɨ kwəŋ àmei əghɨ ze nɨ wɨ̀ konɨ. 8Wə̀d mɨ kon əghɨ ze nɨ nyamnyod məd ə feenɨə, əghɨ ze nɨ wɨ̀ bɨrɨ kwəŋ yɨ ɨvɨ. Wɨ̀ mɨ kon əghɨ ze nɨ Əzwî ə kə̀bə̀, əghɨ ze nɨ wɨ̀ bɨrɨ kwəŋ yɨ ɨ̀tènɨ̀ rɨ mì. 9Tɨ rɨ̀ bɔd əwa nɨ ghɨ ɨ̀chɔ̀m. Tɨ̀ mɨ ton bɔd əwa, tɨ̀ bɨrɨ kwəŋ ɨghɨ nɔnɔʼ ənɨ ə nyùmə̀ kuʼu. 10Əne, tɨ̀ mɨ berɨ əpan, tɨ̀ ghɨ ɨ̀chɔ̀m ənɨ ə wə̀d jìm, màànɨ̀ ənɨ mbe nɨ ben ə Kristo.
Ɨpatɨ nɨ sɨ nwìə̀ mbɨ ə̀chàʼrɨ̀
11Mbə̀ zə ɨchî nɨ mə̀ nɨŋ mɨ əbɔ ŋwàʼnɨ̀ ə̀ŋwàʼnɨ̀ zɔ̂ ɨ nən ənɨ əghə ə̀ŋwàʼnɨ̀ nɨ faŋgɨ! 12Bə̂d mbe nɨə kə̀b nyeŋ ni mbɨ ne əwən mbɨə kə̀b chwi əsaŋ əsaŋ ni mbə bɔ̀ŋ. Ɨ mbɨə ghɨ̀ əne ɨmbə̀ʼ tɨ bə̂d nwendɨ ə tɨkyerɨ-ɨwu mɨ̀mə̌d ɨchî nɨ mbɨə ghàə̀ ni àmei ənjìm ɨchî nɨ Kristo nyaʼa kwɨ əzed ə baʼnɨ nɨ tɨ̀ bə̂d jwɨ̀ rəŋgəʼ. 13Ka àbei bə̂d mbe nɨə ghàə̀ ni mbɨ ne bə̂d, chəi mɨ̀mə̌d ə nùŋ rɨ̀kə. Àyɨə ɨ mbɨə kə̀bə̀ ni mbɨ ne əwən ɨmbə̀ʼ mbɨ goŋ ɨgɔ̂ ni mbə fə ghɨ̀ mbɨ nè əwən. 14À yeʼ ɨmbə̀ʼ əmɨ, chəi mə̀ bɨrɨ nɔ goŋ ɨgɔ̂, kɨrɨ ənɨ mə goŋ ɨgɔ̂ ɨmbə̀ʼ ənû ze nɨ ɨvɨ à Ə̀nùŋɨ̀sɨg Yeso Kristo əzed ə baʼnɨ ə nyaʼa ghɨ̌. Ɨchî nɨ Yeso Kristo nyaʼa kwɨ əzed ə baʼnɨ, əne chəi ɨghɨ rɨŋga ɨsɨg wɨrɨ berɨ ənû ə mɔʼɔ nɨ ghɨ̀ mbɨ num. Chəi mə̀ bə berɨ ənû ə mɔʼɔ nɨ ghɨ̀ mbɨ ɨghɨ rɨŋga ɨsɨg. 15Kɨ̀ mbɨ nè wə̀d, kɨ̀ chəi mbɨ ne wə̀d, chəi əze ə berɨ ənû ə mɔʼɔ nɨ ghɨ̀. Ənû ə kyeŋ nɨ yeʼ əŋgu yɨ ni tɨ̀ yɨə sɨə bə̂d fi.
16Ŋwìə̀ zɨ əbɔrəbɔd bə̀ dììrɨ̀ bə̂d mbe nɨ nuŋ ɨkə wɔ̂. Wɨ̀ bə ghɨ əne ɨgun ə bə̂d Ŋwiə̀ mɨ̀jìm.
17Nɔ̀ʼ tɨ rə̀chɔ̀ŋ, tɨ wə̀d mɔʼɔ wɨrɨ chə i əmɨ, ɨmbə̀ʼ ɨghəm nɨ ɨnweenɨ mbɨ ɨgwɨ num nɨ chwi ni mɔ̌ yɨə sɨə wə̀d Kristo.
18Mbɨ bɔŋgɔb, à Ə̀nùŋɨ̀sɨg Yeso Kristo ghɨ ɨ̀chɔ̀m ənɨ ə nən. À yɨ əne.
Currently Selected:
Gal 6: mgo
Highlight
Copy
Compare
Share
Want to have your highlights saved across all your devices? Sign up or sign in
© 2013, Cameroon Association for Bible Translation and Literacy
