Ɨ̀fàʼì 26
26
Pɔ̂l nyaʼa ghàm ɨmbə̀ʼ chɨ ɨnû rɨ ɨgwɨ ni ɨfě Agripà
1Agripà nyaʼa ghà əmbɨ Pɔ̂l ni, “Nɨŋ əpan zɔ̂ ghà ənû ze nɨ à berɨ nɨ ghà.” Ənɨ wɨ̀ nyaʼa gha əne, Pɔ̂l nyaʼa nɔ əbɔ, kɔ gham ɨmbə̀ʼ chɨ ɨnû rɨ ɨgwɨ ni. Wɨ̀ nyaʼa ghà ni:
2“Ɨfɔ̂n Agripà, mə zə ni mɨ ətu ə kaŋ bɔ̀ŋ rə̀chɔ̀ŋ ni à yɨ ənɨ e ɨfě nɨ mə bɨrɨ ghàm ɨmbə̀ʼ chɨ ɨnû jìm mbe nɨ mɨ̀Jû zɨ ɨgwɨ num, 3ɨmbə̀ʼ ɨghəm nɨ mə̀ kyerɨ ni à kàŋ jeŋgɨ kyerɨ mɨchî mɨ̀Jû mɨ̀jìm bə̀ kyerɨ ɨnû mbe nɨ mbɨə tàŋ rɨ ɨgun. Əne mə wɨə buʼ ɨbɔ ɨ ne ni à yim fîŋ zwetɨ ənû ze nɨ mə bɨrɨ ghà.
4“Mɨ̀Jû mɨ̀jìm kàŋ kyerɨ ɨchî nɨ mə nyaʼə chub ɨŋga mɨ əbeŋ bə̀ fɔrɨ ə Jèrusalèm tɨ ənɨ mə nyaʼə wan kwa. 5À mɨ yeʼ nɨ mbɨ ghaʼ nɨ gha rəsìʼ, njɨ mbɨ fə kyerɨ ə nɔ̀ʼ tɨ rəŋwe ni mə yɨə Farisiî. Mɨ̀Farisiî yɨ ɨfɔtɨ we nɨ jeŋgɨ kàànɨ̀ ɨŋga a ənû ə ŋwiə̀. 6Mə təm əgha rɨ̀nîn ni mbɨ saʼ əmɨ ɨmbə̀ʼ ɨghəm nɨ mə̀ nuŋ ɨkɔndɨ wòm ənû ze nɨ Ŋwiə̀ nyaʼa kaʼ əmbɨ mba mɨ̀mbǎʼ rəŋwe. 7Mba ɨnəbɨ mbe wum chɔ̀b rɨ̀be tɨə wòm ənû ze nɨ Ŋwìə̀ nyaʼa kaʼi. Ɨ mbɨə ghɨ̀ əne ɨchî nɨ mbɨə wumnɨ əməd ənɨ tə fîŋ rɨjìm əziə mbɨ ɨzimɨ. À yɨ ɨmbə̀ʼ ənû zɔ̂ nɨ mɨ̀Jû zɨ ɨsaʼi ɨgwɨ num, kyɨ ɨfɔ̂n! 8Zɨə kɨə kàŋə̀ chèə̀ wə̀d mɔʼ mɔʼ rəbɔʼ nən nɨ ben ni Ŋwìə̀ wɨə zwemnɨ ɨvɨ bə̂d ɨmbə̀ʼ ə ye ə?
9“Mə nyaʼa kàŋ kɔndɨ ni mə we tɨ̀ mə ghɨ̀ ɨnû nɔnɔʼ nɨ chəkɨ ɨkum Yeso we rɨ ə Nazàret. 10Mə wɨə nyaʼə ghɨ̀ əne ə Jèrusalèm. Bə̂d kyeŋ mbe rɨ ə mbàn Ŋwìə̀ nyaʼa nàʼ ɨka ɨ num ni mə wupɨ bə̂d Kristo nɔnɔʼ ə nəb ndəŋ. Ənɨ mbɨ nyaʼa sob ni mbɨ zwiirɨ mɨ̀mə̌d, mə nyaʼa bə̀ benɨ. 11Mə wɨə nyaʼə chəə mɨ̀mə̌d ɨghəm nɔnɔʼ ɨŋga nəb ə̀kàtɨ̀ rɨjìm. Mə wɨə nyaʼə kəb ghɨ̀ ni mbɨ zɔm ə Yeso. Mə nyaʼa kàŋ jeŋgɨ sə ɨtəm əbɔʼ mɨ̀mə̌d, əne mə nyaʼa wò ɨŋga ɨsɨ rɨsɔ̀ʼɔ̀ ɨmbə̀ʼ nwendɨ tɨkyerɨ-ɨwu mɨ̀mə̌d.
Pɔ̂l ghà ɨchî nɨ Kristo nyaʼa beŋ əwi
(Ɨ̀fàʼì 9.1-19; 22.6-16)
12“À yɨ ɨmbə̀ʼ ənû zɔ̂ nɨ bə̂d kyeŋ mbe rɨ ə mbàn Ŋwìə̀ nyaʼa naʼ ɨka ɨ num bə̀ tom əmɨ ə Dàmaskɔ̀s. 13À nyaʼa əzi ə ka əni ze nɨ mə̀ nyaʼə wòə̀, kyɨ ɨfɔn, mə nyaʼa zə ɨzeŋɨ zeŋɨ nɨ nyaʼa rɨkaŋ nɨ nyaʼa te chè ə nyumə̀. Ɨzeŋɨ zeŋɨ we nyaʼa te kad əmɨ bə̀ kad mbaŋə̀ te nɨ nyaʼa mbɨ num. 14Tɨ̀ nyaʼa feŋgɨ ə si mba mɨjìm. Əne mə nyaʼa zu gɨ̂ nɨ nyaʼa gham ɨ num ənɨ ɨŋgam Hibrù ni, 'Sɔ̂l, Sɔ̂l, à kɨə nwèndɨ̀ tum rɨkyerɨ-ɨwu ɨmbə̀ʼ ə yè ə? Zɨə bɨrɨ tɔ e ɨchî nɨ zɨə tɔ rɨkun ze nɨ te mbàŋ mbǎʼ məd.' 15Mə nyaʼa biirɨ ni, 'Àwɔ̀ kɨə we, Ə̀nùŋɨ̀sɨg ə?' Ə̀nùŋɨ̀sɨg nyaʼa ghà ni, 'Mɔ̌ yɨə Yeso we nɨ àwɔ̀ ə nwèndɨ̀ tɨkyerɨ-ɨwu məd. 16Nɔʼɔ təm, mə fə jwɨ̀ ənɨ e ɨfě, ɨmbə̀ʼ chɔʼ əwe ni à faʼ ɨ num, ghà ɨnû mbe nɨ à zə ɨmbə̀ʼ əmɨ bə̀ ghà mbe nɨ mə̀ bɨrɨ chwi ɨ ne. 17Mə bɨrɨ chɨ əwe rɨŋga rɨkyerɨ-ɨbɔ mbe bə̂d bə̀ chɨ̀ rɨŋga rɨkyerɨ-ɨbɔ bə̂d mbe nɨ kaʼi mɨ̀Jû, nɨ yeʼ bə̂d mbe nɨ mɨə tom əwe əsɨ mɨ̀mə̌d 18ni à fiʼ əghə mɨ̀mə̌d ɨmbə̀ʼ mbɨ jwɨ rɨŋga ɨsɨ firɨ wò ɨŋga ɨzeŋɨ zeŋɨ, bə̀ jwɨ̀ rɨ əsɨ ze nɨ Satàn ə tùmbɨ̀ə̀ wo əsɨ ə Ŋwiə̀. Mbɨ mɨ ghɨ̀ əne, Ŋwìə̀ bɨrɨ waʼ ɨnû rɨbɔ̀ŋ mɨ̀mə̌d bə̀ nùŋ mɨ̀mə̌d əkaʼ bə̂d mbe nɨ wɨ̀ fə zeŋnɨ ɨmbə̀ʼ ɨchî nɨ mbɨ nuŋ tə fîŋ ɨgwɨ num.'
19“Əne kyɨ Ɨfɔ̂n Agripà, chəi mə̀ nyaʼa ton nɨ ghɨ ənû ze nɨ Ə̀nùŋɨ̀sɨg nyaʼa gha ɨ num ɨŋga rɨ̀taanɨ njə̀m. 20Mə nyaʼa bè kɔ gha ɨŋgam Ŋwiə̀ ə Dàmaskɔ̀s, beenɨ ə Jèrusalèm, beenɨ ɨŋga ɨsɨ jìm mbe rɨ ə Jùdeyà bə̀ fɔrɨ əkaʼ bə̂d nɨ kaʼi mɨ̀Jû. Mə wɨə nyaʼə ghàə̀ ni mbɨ beŋ tə fîŋ beenɨ əbɔʼ ə Ŋwiə̀, Mə wɨə nyaʼə bə̀ ghàə̀ ni mbɨ ghɨ ɨnû mbe nɨ chwi ni mbɨ fə bèŋ tə fîŋ. 21À yɨ ɨmbə̀ʼ ənû zɔ̂ nɨ mɨ̀Jû nyaʼa gywɨ əmɨ ɨŋga mbàn Ŋwìə̀ kə̀b zwiirɨ. 22Ɨ pè rəchɔ̀ŋ, Ŋwìə̀ fə wèèrɨ̀ əmɨ. Əne mə təm əgha ɨ gha ɨmbə̀ʼ ə Kristo əmbɨ ə bə̂d mɨjìm, əne yɨ əmbɨ mbɨ kwa bə̀ fɔrɨ əmbɨ mbɨ kyeŋ. Mə wɨə ghà àmei ɨnû mbe nɨ bə̂d ɨ̀kə̀n Ŋwiə̀ mbɨ Mose nyaʼa gha ni mbɨ bɨrɨ nɨ ghɨ̀. 23Mbɨ nyaʼa ghà ni Wə̀d we nɨ Ŋwìə̀ zɔʼɔ berɨ zə ŋgəʼ. Mbɨ nyaʼa bə̀ ghà ni ɨchî nɨ məd yɨ wɨ rɨtu nɨ zwemə, wɨ̀ bɨrɨ gha ɨnû ɨmbə̀ʼ ɨzeŋɨ zeŋɨ əmbɨ mɨ̀Jû bə̀ ghà əmbɨ bə̂d nɨ kaʼi mɨ̀Jû.”
24Ɨchî nɨ Pɔ̂l nyaʼə ghàmə̀ ɨmbə̀ʼ chɨ ɨnû rɨ ɨgwɨ ni, Festùs nyaʼa ghà ənɨ ə gɨ̂ nɨ kǎ ni, “Pɔ̂l, à wɨə beə! Ə̀ŋwàʼnɨ̀ ze nɨ à kwembɨ əku fə ghɨ̀ à sɨə beə!”
25Àyɨə Pɔ̂l nyaʼa wììrɨ̀ ni, “Chəi məə beə, kyɨə wə̀d kyeŋ Festùs. Mə wɨə ghàə̀ yeʼ ɨnû rəsìʼ. 26Əton nɨ mɨə ghà ɨnû mbɔ̂ ɨ ne nɨ chəi mɨə bɔə, kyɨ ɨfɔ̂n, yɨ ni à fə kyerɨ e ɨnû mbɔ̂ jìm, ɨmbə̀ʼ ɨghəm nɨ chəi mbɨ nyaʼa ghɨ ɨnû rəŋgu ɨbu əsɨ ə mɔʼɔ. 27Ɨfɔ̂n Agripà, à ben ɨnû mbe nɨ bə̂d ɨ̀kə̀n Ŋwiə̀ nyaʼa ŋwàʼnɨ̀ ə? Mə kyerɨ ni à benɨ!”
28Agripà nyaʼa biirɨ əmbɨ Pɔ̂l ni, “À kɔndɨ ni à we tɨ̀ à nɨŋ àmei ɨkə nyumə̀ bèŋ əmɨ ənɨ wə̀d Kristo ə?”
29Pɔ̂l nyaʼa wììrɨ̀ ni, “Mɨ ə̀kɔ̀ŋgɨ̀ əmbɨ ə Ŋwiə̀ yɨ ni àwɔ̀ mbɨ ə bə̂d mbɔ̂ nɨə zu ɨnû mbɔ̂ nɨ mɨə ghà rə̀chɔ̀ŋ mbɨ yeʼ ɨghabɨ ə mɔ̌, kɨ̀ à kɨ ənɨ ɨkə nyumə̀ kɨ̀ ənɨ ə nyùmə̀ se. Àyɨə tɨ mbɨ yeʼ ə bə̂d ndəŋ ɨghabɨ ə mɔ̌.”
30Ənɨ wɨ̀ nyaʼa gha əne, ɨfɔ̂n, gɔmnà, Benis mbɨ ə bə̂d mɨjìm mbe nɨ nyaʼa chubɨ mbɨ mɨ̀mə̌d nyaʼa nɔ̀ʼ rətiə. 31Ənɨ mbɨ nyaʼə jwɨ̀ə̀, mbɨ nyaʼa ghà mbənə mbənə ni, “Chəi mbaŋə̀ zɔ̂ ghɨ ənû ə mɔʼɔ nɨ tɨ̀ mbɨ zwiirɨ əməd, kɨ̀ nɨ tɨ̀ mbɨ zɨ̀ əməd ə ndəŋ.” 32Agripà nyaʼa ghà əmbɨ Festùs ni, “Àbu ɨchî nɨ mbaŋə̀ zɔ̂ fə chà i ɨsaʼi əmbɨ Kaisà, njɨ à kə̀ʼ chɨ̀ əməd saŋɨ.”
Currently Selected:
Ɨ̀fàʼì 26: mgo
Highlight
Copy
Compare
Share
Want to have your highlights saved across all your devices? Sign up or sign in
© 2013, Cameroon Association for Bible Translation and Literacy
