Ɨ̀fàʼì 24
24
Gɔmnà Felìz nyaʼa saʼ ə Pɔ̂l
1Ənɨ ɨni nyaʼa chè ɨtân, ətu ɨgwɨ ə bə̂d mbàn Ŋwìə̀ nɨ nyaʼə Ànàniàs mbɨ ə bə̂d kyeŋ mɔʼɔ rɨŋga əbeŋ mɨ̀Jû mbɨ wə̀d mɔʼɔ nɨ nyaʼa kyerɨ tɨkə, nɨ ɨkum məd nyaʼə Tètulùs, nyaʼa swiʼi wo ə Kàisàriyà. Mbɨ nyaʼa wò pè ghà ɨsaʼi we nɨ mbɨ berɨ mbɨ Pɔ̂l əmbɨ gɔmnà Felìz. 2Ənɨ mbɨ nyaʼa tɔŋ ə Pɔ̂l wɨ̀ yeʼe, Tètulùs nyaʼa kɔ ɨsaʼi ɨgwɨ məd ghà ni:
“Wə̀d kyeŋ, Felìz, tɨ̀ fə chub ənɨ əbɔrəbɔd əton ne əgha ə sê. Ɨwe we nɨ à berɨ fə ghɨ̀ ni ɨnû nɔnɔʼ kwepɨ ɨŋga əbeŋ zɔ̂. 3Tɨ̀ ben ɨnû jìm mbe nɨ à ghɨ̌ ənɨ ɨnə̂njɨ̀ jìm bə̀ fɔrɨ ɨŋga ɨsɨ jìm. Tɨ̀ wɨə nàʼə̀ məben-əwe ɨ ne ənɨ ta fîŋ rɨ̀jìm. 4Chəi mə̀ kə̀b nɨ chəkɨ e nyùmə̀, àyɨə mə wɨə buʼ ɨbɔ ɨ ne ni à nɨŋ fîŋ chɔ̀m zwetɨ ənû ze nɨ tɨ̀ berɨ nɨ gha ɨ ne ənɨ əkwirɨ ɨŋgam. 5Tɨ̀ fə zə ni mbaŋə̀ zɔ̂ yɨə wə̀d nɨə kə̀b ɨsaʼi. Ɨ wɨə bə̀ bù əchɔb əkaʼ mɨ̀Jû mɨ̀jìm ɨŋga ɨsɨg. Məd yɨ ətu ɨgwɨ ɨfɔtɨ we nɨ mbɨə tɔŋ ənɨ ɨfɔtɨ Nazarîn. #24.5Ɨfɔtɨ Nazarîn yɨə bə̂d Kristo. 6Wɨ̀ nyaʼa kə̀b ni njɨ tə tìbrɨ̀ mbàn Ŋwìə̀, àyɨə tɨ̀ nyaʼa gywɨ̀ əməd. [Tɨ̀ nyaʼa kə̀b saʼ əməd ɨchî nɨ ta rɨkə chwiə. 7Àyɨə Lisiàs nɨ yeʼ ətu ə kyeŋ ɨgwɨ mɨ̀sɔgyɨ̀ nyaʼa yeʼe nɨŋ əməd rɨŋga ta rɨkyerɨ-ɨbɔ ənɨ ɨkǎ. 8Wɨ̀ nyaʼa ghà ni mbaŋə̀ te nɨ zɨ ɨsaʼi ɨgwɨ məd yeʼe ənɨ e ɨfě.] #24.8Chəi əsɨ ə̀ŋwàʼnɨ̀ zɔ̂ ɨŋga ɨ̀ŋwàʼnɨ̀ ənun mɔʼɔ. À mɨ nwèndɨ̀ əməd àwɔ̀ àwɔ̀, à bɨrɨ kwembɨ ɨnû rɨ bɔ ɨmbə̀ʼ ɨnû jìm mbe nɨ tɨ̀ zɨ ɨgwɨ məd.”
9Mɨ̀Jû mbe nyaʼa bə̀ fɔtɨ əbɔʼ Tètulùs zɨ̀ ɨsaʼi ɨgwɨ ə Pɔ̂l ghà ni ɨnû jìm mbe nɨ wɨ̀ ghǎ yɨ ɨnû rəsìʼ.
Pɔ̂l nyaʼa chɨ ɨnû rɨ ɨgwɨ ni ɨfě gɔmnà Felìz
10Ənɨ gɔmnà we nyaʼa ghɨ ənweenɨ ənɨ mbi ɨbɔ ni Pɔ̂l ghàmə̀, wɨ̀ nyaʼa ghà ni:
“Mə kyerɨ ni à fə saʼ əbeŋ zɔ̂ ɨghəm ɨwu nɔnɔʼ, əne mə kàŋ ghaʼ nɨ təm ənɨ e ɨfě ɨmbə̀ʼ chɨ̀ ɨnû mbe nɨ mbaŋə̀ tɔ̂ zɨ ɨgwɨ num. 11Nwendɨ ɨchî chɔ̀m, à bɨrɨ zə ni chəi ɨni kɨrɨ chè wum chɔ̀b rɨ̀be nɨ mə nyaʼa kɔʼɔ wò ə Jèrusalèm ɨmbə̀ʼ wumnɨ ə Ŋwiə̀. 12Chəi mə̀ nyaʼa taŋɨ mbɨ wə̀d mɔʼɔ, kɨ̀ bè no ɨnɔ̂n bə̂d ɨŋga mbàn Ŋwìə̀, kɨ̀ ɨŋga nəb tɨ ə̀kàtɨ̀ kɨ̀ ɨŋga Jèrusalèm. 13Chəi ənɨ tɨ̀ mbɨ chwi ɨ ne ni ɨnû mbe nɨ mbɨ zɨ ɨgwɨ num yɨ ɨnû rəsìʼ. 14Àyɨə mə ben ɨ ne ni mə wɨə wumnɨ ə Ŋwìə̀ mba mɨ̀mbǎʼ rəŋwe ɨchî nɨ mɨə beenɨ əbɔʼ Ɨnə̂njɨ̀ we nɨ Kristo nyaʼa chwiə, nɨ mɨ̀mə̌d ə tɔŋə ni à yɨ ɨfɔtɨ mɨghab. Mə bə̀ ben ɨnû jìm mbe nɨ Mose nyaʼa ŋwàʼnɨ̀ ɨŋga ə̀ŋwàʼnɨ̀ ə rɨkə bə̀ ben mbe nɨ bə̂d ɨ̀kə̀n Ŋwiə̀ nyaʼa ŋwàʼnɨ̀. 15Mə wɨə nùŋ ɨkɔndɨ wòmə̀ wə̀d we nɨ Ŋwiə̀ nyaʼa kaʼi, ɨchî nɨ mɨ̀mə̌d ə bə̀ wòmə̀. Ɨkɔndɨ we yɨ ni bə̂d mbe nɨ ɨnû mɨ̀mə̌d kuʼnɨ mbɨ mbe nɨ chəi ɨnû mɨ̀mə̌d kùʼnɨ̀ bɨrɨ zwemə. 16Əne mə wɨə kywɨ ənywɨ ɨ zə ni mɨ fîŋ zeŋ ɨfě Ŋwiə̀ bə̀ zeŋ ɨfě bə̂d.
17“Ənɨ ɨghəm ɨwu nyaʼa fə chè nɔnɔʼ, mə nyaʼa wɨrɨ wò ə Jèrusalèm ɨmbə̀ʼ naʼ ɨkab əmbɨ ə bə̂d ɨkwaŋ mbe nɨ yeʼ ɨŋga mɨ əbeŋ bə̀ nàʼ ɨghɨ ə̀fà əmbɨ ə Ŋwiə̀. 18Ənɨ mə nyaʼə ghɨ̀ ənû zɔ̂, mbɨ nyaʼa zə əmɨ ɨŋga mbàn Ŋwìə̀ ənɨ mə̀ nyaʼa fə zeŋnɨ mɨ ɨnyod. Chə nyaʼa i ɨnɔ̂n bə̂d əbɔʼ num, chəi əchɔb ə nyaʼa bə gù. 19Àmei mɨ̀Jû mɔʼɔ nɨ nyaʼa rɨ ə Esià nyaʼa əŋgu. Mbɨ mɨ berɨ ənû ə mɔʼɔ mbɨ num, mbɨ yeʼe zɨ ɨsaʼi ɨgwɨ num ənɨ e ɨfě. 20Ɨchî nɨ chəi mɨ̀mə̌d əgha, bə̂d mbɔ̂ sɨ ghà ənû ze nɨ mə̀ nyaʼa gǔ ənɨ mə̀ nyaʼa ɨfě mə̀saʼ əbeŋ, 21kɨrɨ ənɨ à yɨ ənû zɔ̂ ə mɔʼ nɨ mə nyaʼa təm əkaʼ mɨ̀mə̌d kyeŋ rɨkǎ ghà ni, 'Mbə̀ mbɨə saʼ əmɨ rə̀chɔ̀ŋ ɨmbə̀ʼ ɨghəm nɨ mə̀ ben ni bə̂d bɨrɨ zwemə.'”
22Felìz nɨ nyaʼa jeŋgɨ kyerɨ Ɨnə̂njɨ̀ we nɨ Yeso nyaʼa chwiə, nyaʼa chà ɨsaʼi we ɨmbì, ghàə̀ ni, “Ənɨ Lisiàs nɨ yeʼ ətu ə kyeŋ ɨgwɨ mɨ̀sɔgyɨ̀ swiʼi yeʼe, mə bɨrɨ sob ɨsaʼi wɔ̂.” 23Ənɨ wɨ̀ nyaʼa gha əne, wɨ̀ nyaʼa ghà əmbɨ ətu ɨgwɨ mɨ̀sɔgyɨ̀ ɨkɨ fibɨ̀ ni wɨ̀ nɨŋ ə Pɔ̂l wò nəŋgɨ əməd, àyɨə wɨ̀ naʼ əpan ɨ bɔ ni wɨ̀ ghɨ ɨnû mbe nɨ wɨ̀ ghaʼi, fɔrɨ ni wɨ̀ saŋə ni mɨ̀sə̀ʼ məd yeʼe nàʼ ɨghɨ mbe nɨ wɨ̀ kwaŋɨ.
Pɔ̂l nyaʼa gham əmbɨ Felìz mbɨ Drùsilà
24Ənɨ ɨni mɔʼɔ nyaʼa chě, Felìz nyaʼa yeʼe mbɨ i ɨwi nɨ ɨkum məd nyaʼə Drùsilà. Ɨwi məd yɨə nyaʼə Jû. Wɨ̀ nyaʼa yeʼe əne, chà mbɨ tɔŋ ə Pɔ̂l, əne zu ɨnû mbe nɨ wɨ̀ nyaʼə ghà ɨmbə̀ʼ ɨchî nɨ tɨ̀ wə̀d nùŋ fîŋ ɨgun ə Kristo Yeso. 25Àyɨə ənɨ Pɔ̂l nyaʼə kɔ gha ɨmbə̀ʼ ɨnû nɨ kuʼnɨ, ɨmbə̀ʼ ənû nɨ yimbɨ ɨnyod bə̀ fɔrɨ ɨmbə̀ʼ ənû nɨ Ŋwiə̀ bɨrɨ saʼ wə̀d jìm, Felìz nyaʼa bɔ ghà ni, “À we tɨ̀ à sɨ wò e rɨ̀nîn. Ənɨ mə wɨrɨ berɨ əpan ə cherə, mə bɨrɨ tɔŋ e.” 26Ɨ wɨə nyaʼə bə̀ kɔndɨə ni Pɔ̂l bɨrɨ naʼ ɨkab ɨ ni. Əze ə nyaʼa ghɨ̀ ni wɨ̀ kɨə chàə̀ bə̂d ni mbɨ tɔŋ ə Pɔ̂l ni wɨ̀ yeʼe mbə̀ ghambə.
27Ənɨ ɨghəm ɨwu nyaʼa che ɨbe, Posiòs Festùs, nyaʼa jɨg ətən ə Felìz ɨghabɨ ə gɔmnà. Ɨchî nɨ Felìz nyaʼə kə̀bə̀ ni mɨ̀Jû ghaʼ əməd, wɨ̀ nyaʼa sàŋ ə Pɔ̂l ə nəb ndəŋ.
Currently Selected:
Ɨ̀fàʼì 24: mgo
Highlight
Copy
Compare
Share
Want to have your highlights saved across all your devices? Sign up or sign in
© 2013, Cameroon Association for Bible Translation and Literacy
