1 Tim 4
4
Pɔ̂l nyaʼa patɨ ə Timotì ɨmbə̀ʼ məchwiə̀-ɨnû mɨghab
1Əzwî ə Zeŋɨ ə zɨə ghàə̀ zɨə zeŋ ni ɨŋga ɨni mbe nɨə wo yeʼe, bə̂d mɔʼɔ bɨrɨ waʼ ɨbenɨ we nɨ mbɨ berɨ, sɨə zuunɨə yeʼ bə̂d mbe nɨə zwetɨ ɨnû rɨ əmbɨ ɨzwî mbe nɨə tambɨə bə̂d. Mbɨ bɨrɨ bɨ chwi ɨnû mɨghab mbe nɨ ɨzwî rɨbɔ̀ŋ ə kə̀bə̀ ni bə̂d benɨ. 2Bə̂d mbe nɨə chwi tɨkwɨrɨ ɨnû tɔ̂ yɨ ɨbekɨ bə̂d fɔrɨ bə̂d mɨghab. Fîŋ tɨ mɨ̀mə̌d fə kwɨ. #4.2Ə zɨ ɨŋga ɨ̀ŋwàʼnɨ̀ mɔʼɔ ni fîŋ tɨ mɨ̀mə̌d fə kwɨ ɨghabɨ ni à yɨ mbɨ tɔn ənɨ ətənɨ nɨə nòmə̀. 3Ɨ mbɨə tonə ni tɨ bə̂d nam ə mbɨ ni tɨ mbɨ jɨg ə tɨkwɨrɨ ɨghɨjɨg mɔʼɔ. Ŋwiə̀ nyaʼa tekɨ rɨjɨg tɔ̂ ni bə̂d mbe nɨ ben əməd bə̀ kyerɨ rəsìʼ naʼ məben-əwe ɨ bɔ jɨg. 4Ɨghɨjìm mbe nɨ Ŋwìə̀ nyaʼa tekɨ ə bɔŋ. Chəi əghɨ ə mɔʼɔ nɨ tɨ bə̂d ton. Àyɨə bə̂d berɨ naʼ məben-əwe ɨ bɔ ɨmbə̀ʼ ɨghɨjìm mbe nɨ wɨ̀ naʼ əmbɨ mɨ̀mə̌d, 5ɨmbə̀ʼ ɨghəm nɨ ɨŋgam Ŋwiə̀ mbɨ ə̀kɔ̀ŋgɨ̀ fə ghɨ̀ ni ɨghɨ mbe zeŋ.
Pɔ̂l nyaʼa kəərɨ ə Timotì ni wɨ̀ faʼ ɨchî chɔ̀m
6À mɨ ghà ɨnû mbɔ̂ nɨ mə gha ɨ ne əmbɨ ə bə̂d Kristo bə̀ beenɨ əbɔʼ mɨŋgam mbe nɨə ghɨ̀ ni ɨbenɨ kaanə bə̀ beenɨ əbɔʼ rəsìʼ we nɨ à nyaʼa fə zu, njɨ à bɨrɨ kaŋ yeʼ wə̀d ə̀fàʼì Kristo Yeso chɔ̀m. 7Ton tɨpoʼ əko mɔʼɔ te nɨ chəi tɨə ghɨ̀ ni bə̂d kyerɨ ə Ŋwiə̀. Dandɨ e ɨnyod nɨ ghɨ ɨnû mbe nɨ chwi ni à wɨə wumnɨ ə Ŋwiə̀. 8Ənû nɨ ghɨ ɨnû mbe nɨ bɨrɨ ghɨ ni ɨnyod kaanɨ ə bɔ̀ŋ, àyɨə ənû nɨ ghɨ mbe nɨ chwi ni à wɨə wumnɨ ə Ŋwiə̀ ə bɔ̀ŋ chè ənɨ ɨnû jìm, ɨmbə̀ʼ ɨghəm nɨ Ŋwìə̀ fə kàʼ ɨ̀tènɨ̀ rɨ mì ɨ ne tɨ̀nîn bə̀ fɔrɨ ənɨ ə nyùmə̀ we nɨ bɨrɨ yeʼe. 9Ɨŋgam wɔ̂ yɨ wɨ rəsìʼ nɨ kuʼ ni bə̂d ben ənɨ tə fîŋ rɨjìm. 10Tɨ wɨə kywɨ ənywɨ nɨ faʼ rɨkǎ ɨmbə̀ʼ ɨghəm nɨ tɨ nuŋ ta rɨkɔndɨ ɨgun ə Ŋwìə̀ we nɨ yeʼ ɨkǎ. Məd wɨə chɨ̀ə̀ bə̂d mɨjìm mbe nɨ kəb ni mbɨ chɨ əwən rəŋgəʼ, màànɨ̀ mba mbe nɨ nuŋ ta rɨkɔndɨ ɨgwɨ məd.
11Chwi ɨnû mbɔ̂ jìm əmbɨ ə bə̂d mbe nɨ ben ə Kristo bə̀ ghà ni mbɨ sɨə ghɨ̀ə̀. 12Tɨrə̀ ben e ni wə̀d mɔʼɔ təənɨ əwe ɨmbə̀ʼ ɨghəm nɨ àwɔ̀ yeʼ wan kwa. À berɨ yeʼ əmɨg əmbɨ ə bə̂d mbe nɨ ben ə Kristo ɨchî nɨ àwɔ̀ ə ghàmə̀, ɨchî nɨ àwɔ̀ ə ghɨ̀ ɨnû, ɨchî nɨ àwɔ̀ ə ghaʼə bə̂d bə̀ fɔrɨ ɨchî nɨ àwɔ̀ chub ə zeŋɨ zeŋɨ. 13Zə ni à nɨŋ ə nyumə̀ foŋ ɨŋgam Ŋwiə̀ əmbɨ ə bə̂d əsaŋ əsaŋ, nɨŋ ə nyumə̀ gha ɨŋgam Ŋwiə̀ bə̀ nɨŋ ə nyumə̀ chwi ɨnû. Ghɨ àmei əne pè ənɨ mə̀ yeʼe. 14Tɨrə̀ waʼ e ɨneʼe we nɨ à berɨ, nɨ Əzwî ə Zeŋɨ ə nyaʼa naʼ ɨ ne ənɨ ə nyùmə̀ we nɨ bə̂d ɨ̀kə̀n Ŋwiə̀ nyaʼa gha ɨnû ɨmbə̀ʼ əwe, bə̂d nɨə chà ɨfetɨ bə̀ zab mbə ɨbɔ ɨgwɨ ne. 15Ghɨ ɨnû mbɔ̂ nɨ mə̀ gha ɨ ne, bə̀ jeŋgɨ zɨ̀ e fîŋ ɨgun, ɨmbə̀ʼ bə̂d mɨ̀jìm zə ɨchî nɨ e ə̀fàʼì ə wò ɨmbì. 16We əwe ɨmbə̀ʼ e nyamnyod bə̀ we əwe ɨmbə̀ʼ ɨnû mbe nɨ àwɔ̀ ə chwiə. Yim ɨnû mbe nɨ mə̀ gha ɨ ne ɨmbə̀ʼ ɨghəm nɨ à mɨ ghɨ̀ əne, àwɔ̀ mbɨ ə bə̂d mbe nɨə zu ɨnû mbe nɨ àwɔ̀ ə ghàə̀ bɨrɨ jwɨ̀ rəŋgəʼ.
Currently Selected:
1 Tim 4: mgo
Highlight
Copy
Compare
Share
Want to have your highlights saved across all your devices? Sign up or sign in
© 2013, Cameroon Association for Bible Translation and Literacy
