1 Kɔ 13
13
Ənû ɨmbə̀ʼ ɨghaʼi
1Mə mɨ yeʼə ghàm ənɨ mɨŋgam bə̂d mɨ̀sɔŋɨchù kɨ̀ ənɨ ɨŋgam mbɨ̀aŋgɨrə̀, àyɨə chəi mə̀ ghaʼ bə̂d, mə yɨ ɨghabɨ mɨ̀kakaŋ nɨə ja ɨsɨ, kɨ̀ ɨghabɨ ə ŋgòŋ nɨ mbɨə buʼə. 2Mə mɨ berɨ ɨneʼe nɨ gha ɨkə̂n Ŋwiə̀, bə̀ kyerɨ ɨnû jìm mbe nɨ yeʼ ənə̀mə bə̀ berɨ ɨwe jìm, mə mɨ berɨ ɨbenɨ nɨ tɨ̀ mə ghàm tɨwum mə̀nə̀, àyɨə chəi mə ghaʼ bə̂d, mə yɨ əghɨ əko. 3Mə mɨ nàʼ ɨghɨjìm mbe nɨ mə̀ berɨ əmbɨ ə bə̂d ɨkwaŋ, bə̀ nàʼ ka àbei mɨ ɨnyod ni mbɨ tɔn ə, àyɨə chəi mə̀ ghaʼ bə̂d, chəi mə̀ bɨrɨ jɨg əghɨ ə mɔʼɔ rəŋgu.
4Ɨghaʼi wɨə ghɨ̀ ni wə̀d yim fîŋ. Ɨ wɨə bə̀ ghɨ̀ ni wə̀d ghɨ ɨ̀chɔ̀m. Ka ɨghaʼi wɨə ghɨ̀ i ni wə̀d ghɨ ə̀dìì, kɨ̀ ni wə̀d goŋ ɨgɔ̂, kɨ̀ ni wə̀d nɔ ɨnyod. 5Ka ɨghaʼi wɨə ghɨ̀ i ni wə̀d seenɨ, kɨ̀ ni wə̀d kəb əghɨ àmei əmbɨ i nyamnyod, kɨ̀ ni wə̀d kɨə sə ɨtəm, kɨ̀ ni wə̀d nuŋ ɨnû rɨbɔ̀ŋ jìm mbe nɨ mbɨ ghɨ ənɨ məd. 6Chəi ɨghaʼi ghaʼ nɨ zə ni bə̂d ghɨ ɨnû rɨbɔ̀ŋ. Wɨ kə̀b yeʼ ni bə̂d ghɨ ɨnû nɨ kuʼnɨ. 7Ɨghaʼi wɨə kə̀bə̀ ni bə̂d yim fîŋ ənɨ ɨnû jìm. Ɨ wɨə ghɨ̀ ni bə̂d nùŋ fîŋ ɨgwɨ ɨghɨjìm. Ɨ wɨə ghɨ̀ ni bə̂d nuŋ ɨkɔndɨ wom ɨnû jìm mbe nɨ tɨ̀ benɨ. Ɨ wɨə bə̀ ghɨ̀ ni bə̂d chi ɨnû jìm.
8Chəi ɨghaʼi ə nɔ mìə̀. À yeʼ ɨmbə̀ʼ ənû nɨ gha ɨkə̂n Ŋwìə̀, zɨə bɨrɨ nwìə̀. À yeʼ ɨmbə̀ʼ ənû nɨ gham mɨŋgam rɨsɔ̀ʼɔ̀, zɨə bɨrɨ nwìə̀. À yeʼ ɨmbə̀ʼ ənû nɨ berɨ ɨwe, zɨə bɨrɨ bɨ nwìə̀. 9Ɨwe we nɨ tɨ̀ berɨ mei əkwirɨ əkwirɨ. Tɨ̀ wɨə bə̀ ghà ɨkə̂n Ŋwiə̀ àmei əkwirɨ əkwirɨ. 10Ənɨ əghɨ ze nɨ bɔŋ màànɨ̀ ə yeʼe, əze nɨ yeʼ àmei əkwirɨ əkwirɨ ə bɨrɨ nim. 11Ənɨ mə̀ nyaʼə wan kwa, mə wɨə nyaʼə ghàm ɨghabɨ ə wan kwa, mə wɨə nyaʼə kɔndɨ ɨnû ɨghabɨ wan kwa, mə nyaʼa berɨ ɨwe wan kwa. Ənɨ mə nyaʼa kwi sɨə wə̀d kyeŋ, mə nyaʼa waʼ ɨnû bɔn kwa. 12Tɨ̀nîn, əghɨ ze nɨ tɨə zə ɨghabɨ ni à yɨ ɨŋga əneŋ-ɨfě yɨ əziŋ nɨ yeʼ əfubrɨ əfubrɨ̀, àyɨə ənɨ ə nyùmə̀ we nɨ Kristo bɨrɨ wɨrɨ yeʼe, tɨ̀ bɨrɨ zə əməd tɨfě rɨfě. Tɨ̀nîn, mə kyerɨ ə Ŋwiə̀ əkwirɨ əkwirɨ, àyɨə ənɨ ə nyùmə̀ we nɨ Kristo bɨrɨ wɨrɨ yeʼe, mə bɨrɨ kyerɨ əməd màànɨ̀, àmei ɨchî nɨ məd bə̀ kyerɨ əmɨ màànɨ̀. 13Əne ɨnû mbɔ̂ tad fə ten i koŋ. Ɨnû mbe yɨ ənû nɨ nuŋ fîŋ ɨgun ə Kristo, ənû nɨ nuŋ ɨkɔndɨ wòm ɨnû jìm mbe nɨ tɨ̀ benɨ mbɨ ənû nɨ ghaʼ aŋgɔb. Àyɨə əze nɨ che mbɨ cherə yɨ ənû nɨ ghaʼ aŋgɔb.
Currently Selected:
1 Kɔ 13: mgo
Highlight
Copy
Compare
Share
Want to have your highlights saved across all your devices? Sign up or sign in
© 2013, Cameroon Association for Bible Translation and Literacy
