1 Kɔ 11

1Mbə̀ beenɨ əbɔʼ mɨ əwu yènɨ̀, ɨchî nɨ mɨə beenɨ əbɔʼ əzɨ ə Kristo.

Ənû nɨ kubrɨ ətu bɔŋ wumnɨ ə Ŋwiə̀

2Mə wɨə ben əwən ɨmbə̀ʼ ɨghəm nɨ mbə mbɨə kɔndɨ əmɨ ənɨ ɨnû jìm. Mə wɨə bə̀ ben əwən ni mbə mbɨə ghɨ̀ àmei ɨchî nɨ mə̀ nyaʼa chwi ɨ nən. 3Mə wɨə kə̀bə̀ ni mbə̀ kyerɨ ni ətu ɨgwɨ ə mbaŋə̀ rɨ̀jìm yɨə Kristo, kyerɨ ni ətu ɨgwɨ əyi yɨ ɨnom məd, bə̀ kyerɨ ni ətu ɨgwɨ ə Kristo yɨə Ŋwiə̀. 4Mbaŋə̀ jìm ze nɨ zɨ əghɨ ə mɔʼɔ kubrɨ e ətu ənɨ wɨə kɔ̀ŋgɨ̀ ə Ŋwiə̀ kɨ̀ ənɨ wɨə ghà ɨkə̂n Ŋwiə̀ wɨə tìbrɨ̀ ə Kristo nɨ yeʼ ətu ɨgwɨ məd. 5Əyi jìm we nɨ chəi wɨ̀ kubrɨ e ətu ənɨ wɨə kɔ̀ŋgɨ̀ ə Ŋwiə̀ kɨ̀ ənɨ wɨə ghà ɨkə̂n Ŋwiə̀, wɨə tìbrɨ̀ ɨnom məd nɨ yeʼ ətu ɨgwɨ məd. Ə zɨ əndəŋ əndəŋ ɨghabɨ ni mbɨ fə serɨ ətu əməd. 6Əyi mɨ ton kubrɨ e ətu, wɨ̀ serɨ. À mɨ yeʼ nɨ ətu əyi mɔʼɔ ə bɨrɨ nìd ənɨ mbɨ serɨ kɨ̀ ənɨ wɨ̀ serɨ e ətu ziə, wɨ̀ kubrɨ ətu ze. 7Chəi mbaŋə̀ berɨ kubrɨ e ətu, ɨmbə̀ʼ ɨghəm nɨ məd yɨ ɨghabɨ ə Ŋwìə̀. Məd wɨə bə̀ chwi ɨwumnɨ we nɨ Ŋwìə̀ berɨ, àyɨə əyi wɨə chwiə yeʼ ɨwumnɨ we nɨ mbaŋə̀ berɨ. 8Chəi Ŋwìə̀ nyaʼa nɨŋ əsɨ ɨnyod tɨ ənɨ əyi tekɨ mbaŋə̀. Wɨ̀ nyaʼa nɨŋ əsɨ ɨnyod tɨ ənɨ mbaŋə̀ tekɨ əyi. 9Chəi Ŋwìə̀ nyaʼa tekɨ mbaŋə̀ əmbɨ əyi. Wɨ̀ nyaʼa tekɨ əyi əmbɨ ə mbaŋə̀. 10À yɨ əton nɨ əyi berɨ berɨ əghɨ ə mɔʼɔ nɨ kubrɨ e ətu ɨmbə̀ʼ chwiə ni tə wɨ əton i ɨnom fɔrɨ ɨmbə̀ʼ ɨghəm nɨ mbɨ̀aŋgɨrə̀ mbɨə nèŋ ɨnû mbe nɨə chèə̀. 11Àyɨə ɨchî nɨ tɨ̀ yeʼ ənɨ ɨfɔtɨ mbɨ Ə̀nùŋɨ̀sɨg, chəi əyi ənɨ i ɨghəm nɨ chəi mbaŋə̀. Chəi bəi mbaŋə̀ ənɨ i ɨghəm nɨ chəi əyi. 12Ɨchî nɨ mbɨ nyaʼa tekɨ əyi rɨ ənɨ ə mbaŋə̀, əne tɨ̀nîn, à yɨ əyi ə gywɨ ə mbaŋə̀. Ɨnû mbɔ̂ jìm yɨ rɨ əmbɨ ə Ŋwiə̀.

13Mbə̀ kwaʼnɨ mbə ɨtu zə ni zɨə wa bɔ̀ŋ ni əyi kɔŋgɨ ə Ŋwiə̀ nɨ chəi wɨ̀ kubrɨ e ətu ə? 14Ɨmbə̀ʼ ɨchî nɨ Ŋwìə̀ nyaʼa nuŋ ɨnû rɨŋga ɨsɨg ə chwi ɨ nən ni à yɨ tɨ̀nìd ətu əmbɨ ə mbaŋə̀ nɨ nuŋ nyôŋ rɨ se ə? 15Àyɨə əyi mɨ berɨ nyôŋ rɨ se, à yɨ ɨwumnɨ ɨ bɔ, ɨmbə̀ʼ ɨghəm nɨ Ŋwìə̀ nyaʼa nàʼ nyôŋ rɨ se ɨ bɔ ni wɨ̀ kubrɨ e ətu əŋgu. 16Wə̀d mɔʼɔ mɨ kəb taŋ ənû zɔ̂, wɨ̀ kyerɨ ni chəi mbǎ kɨ̀ tɨfetɨ bə̂d Ŋwiə̀ berɨ ɨchî cherə nɨ ghɨ ɨnû chè rɨ ənɨ ɨchî wɔ̂.

Ɨchî nɨ bə̂d berɨ jɨg Ɨtarɨ Ə̀nùŋɨ̀sɨg

(Mt 26.26-29; Mk 14.22-25; Lk 22.14-20)

17Ɨŋga tɨkə tɔ̂ nɨ beenɨ, chəi mə bɨrɨ ben ni mbə mbɨə ghɨ̀ ənû nɨ kuʼnɨ, ɨmbə̀ʼ ɨghəm nɨ ənɨ mbə̀ bomnɨ, mbə mbɨə ghɨ̀ yeʼ ɨnû mbe nɨə yeʼe mbɨ ə ŋgəʼ, kaʼi mbe nɨə yeʼe mbɨ ɨ̀chɔ̀m. 18Ənû rɨtu yɨ ni, mə fə zu ni ənɨ mbə̀ fetɨ ɨghabɨ ə bə̂d Kristo, ə̀ghàbrɨ̀ ə zɨə jwɨ̀ əkaʼ nən. Mə we tɨ̀ mə ben ni à yɨ rəsìʼ. 19Mə kyerɨ ni ə̀ghàbrɨ̀ ə berɨ jwɨ̀ əkaʼ nən ɨmbə̀ʼ mbɨ kyerɨ bə̂d Kristo rəsìʼ. 20Ənɨ mbə̀ bomnɨ, kaʼi Ɨtarɨ Ə̀nùŋɨ̀sɨg nɨ mbə̀ə jɨgə, 21ɨmbə̀ʼ ɨghəm nɨ ənɨ mbə̀ə jɨgə, wə̀d mɔʼ mɔʼ rəbɔʼ nən wɨə wò ɨmbì jɨgə ti rɨjɨg. Ənɨ ɨnwǐ mbɨ mɔʼɔ mbɨə chubə njì, mbɨ cherə fə nɔ be. 22À kɨ ənû ə ye! Chəi mbə̀ berɨ tə nəb nɨ tɨ̀ mbə̀ jɨg bə̀ nɔ ɨŋga ə? Kɨ̀ mbə mbɨə kə̀b təənɨ ɨfetɨ bə̂d Ŋwiə̀, əne tìbrɨ̀ bə̂d mbe nɨ chəi mbɨ berɨ əghɨ ə mɔʼɔ ə? Mbə̀ wa kə̀b ni mə̀ ben ni ənû zɔ̂ nɨ mbə̀ə ghɨ ə bɔ̀ŋ ə? Chə̂! Chəi mə̀ bɨrɨ benɨ!

23Ənû ze nɨ mə̀ nyaʼa zu rɨ əmbɨ Ə̀nùŋɨ̀sɨg ziə, à yɨ əzɨ əwən ze nɨ mə̀ nyaʼa gha ɨ nən. Ənû ze yɨ ni, ɨzimɨ we nɨ mbɨ nyaʼa fen Ə̀nùŋɨ̀sɨg Yeso, wɨ̀ nyaʼa nɨŋ chiŋ ŋgə̀ŋ, 24ənɨ wɨ̀ nyaʼa fə nàʼ məben-əwe əmbɨ ə Ŋwiə̀, wɨ̀ nyaʼa bəʼrɨ ghà ni, “Əzɔ̂ yɨ mɨ nyamnyod nɨ mə̀ naʼ ənɨ əghɨ ə̀fà ɨgwɨ mbə ɨtu. Mbə̀ sɨə ghɨ̀ əne kɔndɨ əmɨ.” 25À yɨə bə̀ əndəŋ əndəŋ ni, ənɨ mbɨ nyaʼa fə jɨgɨ màànɨ̀, wɨ̀ nyaʼa nɨŋ toʼ mɨnoʼ ghà ni, “Toʼ mɨnoʼ zɔ̂ yɨ fɨso fi fe nɨ mə san ənɨ mɨ ənəm. Ənɨ mɨ̀nyùmə̀ jìm mbe nɨ mbə̀ nɔ rɨŋga toʼ zɔ̂, mbə̀ sɨə ghɨ̀ əne kɔndɨ əmɨ.” 26Əne yɨ ni ənɨ mɨ̀nyùmə̀ jìm mbe nɨ mbə̀ə jɨgə ŋgə̀ŋ zɔ̂ bə̀ nɔə rɨŋga toʼ zɔ̂, mbə mbɨə ghà ɨmbə̀ʼ ɨvɨ Ə̀nùŋɨ̀sɨg. Mbə bɨrɨ gha əne pè ənɨ wɨ̀ wɨrɨ yeʼe.

27Əne, wə̀d mɔʼɔ we nɨ jɨg ŋgə̀ŋ zɔ̂, kɨ̀ nɨ nɔ rɨŋga toʼ Ə̀nùŋɨ̀sɨg ənɨ ɨnə̂njɨ̀ nɨ rɨka kuʼi, təŋgàŋ fə gù ɨchî nɨ wɨ̀ ghɨ ənû rɨbɔ̀ŋ ənɨ ə nyamnyod Ə̀nùŋɨ̀sɨg bə̀ fɔrɨ ənɨ ənəm əməd. 28Wə̀d mɔʼ mɔʼ kyeʼ i ɨnyod bɔŋ wɨ̀ sɨə jɨgə ŋgə̀ŋ ze. Wɨ̀ bə̀ kyeʼ i ɨnyod bɔŋ wɨ̀ sɨə nɔ rɨŋga toʼ ze, 29ɨmbə̀ʼ ɨghəm nɨ wə̀d mɔʼɔ we nɨ jɨg ŋgə̀ŋ ze bə̀ nɔ mɨnoʼ mbe nɨ chəi wɨ̀ kyerɨ ni à yɨə nyamnyod Ə̀nùŋɨ̀sɨg nɨ wɨə jɨgə bə̀ nɔə, bɨrɨ jɨg bə̀ nɔ bèʼ ndɔ̀n ɨgwɨ ni. 30À yɨ əton nɨ bə̂d mɨ̀nɔnɔʼ əkaʼ nən ə bɔrə bə̀ wɔ̀nə̀, mbɨ mɔʼɔ fə bə̀ kwɨ. 31Tɨ̀ mɨ kàŋ kyèʼ a ɨnyod, chəi Ŋwìə̀ bɨrɨ zɨ ɨsaʼi ɨgwɨ na. 32Ənɨ Ə̀nùŋɨ̀sɨg ə saʼ əwa bə̀ chə əwa, ɨ wɨə kə̀bə̀ ni tɨ̀ təm kàànɨ̀, ɨmbə̀ʼ tɨ wɨ̀ zɨ i ɨsaʼi ɨgwɨ na ənɨ ə nyùmə̀ we nɨ wɨ̀ bɨrɨ saʼ ɨsɨg.

33Əne, mbɨ bɔŋgɔb, ənɨ mbə̀ bomnɨ ɨ jɨg, mbə̀ wom məmbə. 34Njì mɨ yeʼə zaŋə wə̀d mɔʼɔ, wɨ̀ jɨg rɨŋga i nəb, ɨmbə̀ʼ ənɨ mbə̀ fɔtɨ, tɨ Ŋwìə̀ zɨ i ɨsaʼi ɨgwɨ nən.

Ənɨ mə̀ yeʼe, mə bɨrɨ kəərɨ əwən ɨmbə̀ʼ ɨnû mɔʼɔ mbe nɨ sɨ bùʼ.

Currently Selected:

1 Kɔ 11: mgo

Highlight

Copy

Compare