Filipi 2

Snurak ma taꞌan vai isa ovu tfakabava tenadida ra wean Kristus

1Kristus nfangrebat ralabira ra naꞌa bira vavaꞌat ra ovu Ia, ovu vali Ia nlobang urun mia ma nfaloling roak ralabira ra. Ubu Ni Roh notu ma ralabira isa ovu Ia, ovu vali nlobang mia ma nfaturu Ni silobang a verin mia. 2Ba myotu ma ralang lolin urun wean ini: mian vai isa ovu myotu ma ralabira isa watan naꞌa bira fikiran ra ovu msyilobang mia, ovu vali myotu ma bira vavaꞌat ra malinan watan. 3Deka fyakaratat tenabira ra, ovu vali deka myotu ma tamata ra rfadawang mia. Naꞌuk fyakabava tenabira ra ma myalang tamata liak ra ne, ira lolin lia mia. 4Msyiꞌik vali tamata liak ra ma uturira, deka mane msyiꞌik watan tenabira ra.

5Naꞌa bira vavaꞌat ra, na bira fikiran ra ovu afa ovi minovak naꞌa ralabira ra musti wean afa ovi Yesus nfikir roak a.

6Kena urun ma Yesus Ubu Ia naꞌa afakataka munuk, naꞌuk Ia wol ntang naꞌa ralan a, ma ntahang teri ne, Ni dakdokun a sam lahir ovu Ubu.

7Naꞌut i neluk tamata, na Ia wol ntahang teri afa yai, naꞌuk kaꞌi nfakabava tenan a ma wean i neluk tamata sansinir.#2:7 Velik ne Kristus Duilaꞌa Ia, naꞌuk Ia wean isa watan ovu tamata ra.

8Ia notu roak ma felan a wean watan tamata ra. Ia nfakabava tenan a ovu notu lalawatan afa ovi Ubu nfalak ra, ti naran i rbaku Ia naꞌa aa walwalur a ma nmata, wean i rbaku tamata sian ra naꞌa aa walwalur a.

9Yesus notu wean inyai, bi Ubu nfadawang urun Ia ovu nalang Ia ma nala van i dawan lia munuk a verin Ia,

10boma tamata ra munuk, ovu afa ovi rvaꞌat naꞌa lanit ratan, ovu ovi rnaꞌa lanit ivavan ini, ovu vali ovi rnaꞌa letvava rsangatur verin Yesus.

11Ira munuk veka rtorung ma rfalak ne, “Yesus Kristus Duilaꞌa Ia.” Afa yai notu ma ira munuk ralang ovu raraning Yamadida Ubilaꞌa.

Tamata ovi rorang Yesus musti rotu afa ovi nfalak ra, boma rfaturu afa ovi Ubu ralan nfalak verin tamata liak ra

12Ba wean inyai, na terang a valing ovi ulobang urun mia; naꞌut i itmunuk obin a, na myorang lalawatan afa ovi air roak verin mia. Fiang ini era verin mia ma mtyafal vali ma myotu munuk wean inyai, ma inovan ovu tamata ovi Ubu nsikat roak ira tali rira salasilan ra, ma rira vavaꞌat kakiwal. Myotu wean inyai ovu ralabira urun ma myalang urun Ia, velik ne tsifaroa ita.#2:12 Vai mala nala vaivatul ovi, dengan takut dan gentar naꞌa ayat ini, ihin a ne, myalang urun Ubu. 13Myotu wean inyai, tevek Ubu nkarya naꞌa ralabira ra, boma inabira ma myotu afa ovi rfaloling Ubu ralan a, ovu Ia nlobang mia ma myot-nala afa avyai.

14Ba wean i mkyarya afaka watan, na deka mifngamuꞌur ovu deka msyingarahi,#2:14 Deka msyingarahi ovu Ubu ovu vali tamata liak ra. 15boma tamata ra wol bisma rfasala nala mia, tevek bira vavaꞌat ra rmerat, ovu sian a wol nanaꞌa tenabira ra. Myotu wean inyai, na fyaturu roak ne, Ubu yanan urun mia, ovu vali bira vavaꞌat ra rmerat ovu kena naꞌa tamata kuldawan ovu tamata salasilan fruarira ra. Mia musti myeluk lyawan verin ira, wean nara ovi ryeba lanit ivavan a. 16Mia vali musti fyamalik verin tamata liak ra naꞌa Ivar i nala vavaꞌat ngorvaꞌan verin tamata ra, boma yaꞌa bisma ralang a dawan naꞌut amar i Kristus veka nma ewal a. Myotu wean inyai, na fyaturu roak ne, ning karya ovu ning farea verin mia wol mane rleka ma lolan watan. 17Bira inorang verin Ubu ovu bira karya verin Ia, neluk bira korban ovi rfaloling Ubu ralan a. Wean i Ubu ralan nfalak ma rfedan yaꞌa ma ning vavaꞌat a neluk persembahan al ntafal afa ovi myala verin Ia, na yaꞌa ralang a lolin urun. Yaꞌa veka ovu vali mia munuk ma totu inad lolin, tevek bira inorang nangrebat urun.#2:17 Msiꞌik Bilangan 15:1-12, 28:7. Ayat avyai rfamalik tamata ra rira korban verin Ubu ovu persembahan i rvoak naꞌa korban ratan a. Persembahan isa wean afa i tamata ra renu, naran anggur. Naꞌa ayat ini, Paulus nfalak ne, wean i Ubu ralan nfalak ma rfedan ia ma laran a neluk persembahan, na laran a veka ntafal tamata inorang rira korban a. Msiꞌik vali 2 Timotius 4:6 ovu Roma 15:16. 18Mia musti inabira lolin urun wean ini, ovu myovu vali yaꞌa ma totu inad lolin.

Timotius ovu Epafroditus

19Wean i Duilaꞌa Yesus ralan nfalak, na inak urun, ma veka usinir lahir Timotius ma ti nalola mia ma nfaloling ralabira ra, ovu vali bisma urenar bira ivar a tali ia ma ralang a lolin. 20Timotius aꞌuk ralan isa ovu yaꞌa ma nlobang mia ovu ralan urun. 21Tamata liak ra munuk rfikir aꞌuk tenarira ra, ovu wol rfikir afa ovi Yesus ralan a nfalak a.#2:21 Tamata liak naꞌa ayat ini ihin a ne, tamata inorang ovi bis rti kota Filipi ma rlobang tamata ovi rorang Yesus rira sidovung a, naꞌuk rafena ma rti. 22Mia kaꞌi msyiꞌik roak ne, Timotius ivaꞌun urun ma nlobang yaꞌa, wean kasikoꞌu nlobang yaman a. Ia nlobang yaꞌa ma amfamalik Ubu Ni Ivar Lolin. 23Wean i lyawan roak verin yaꞌa naꞌa afa ovi veka rvotuk naꞌa ning vavaꞌat a, na veka ufadoku lahir ma Timotius ti nalola mia. 24Yaꞌa orang ne, Duilaꞌa veka nlobang yaꞌa ma wol mnanat, na rfatalik yaꞌa tali ini ma uti lahir ma ulola mia.

25Msyinir roak terad a valid Epafroditus ma nma ini ma nfatuang yaꞌa naꞌa ning karya ra, ovu ntaha afa ovi wol rnaꞌa yaꞌa. Naꞌuk unovak vali ne, lolin urun ma usinir ia ma newal ia ti nlobang ewal mia. Ia nkarya ma dawan ovu yaꞌa ma amfamalik Ubu Ni Ivar Lolin a. Ia nkarya ovu yaꞌa wean suldadu i ntahang ralan naꞌa ni susa ra.#2:25 Paulus inan urun ma irua Timotius rti Filipi, naꞌuk wol rti obin, na nsinir lan Epafroditus ma nti. 26Ia inan urun ma ntuan bir tinemun, ovu ralan a lalau vali, tevek mryenar roak ivar ne, nawar ia. 27Kena urun, tevek nawar ma kedan a watan, na nmata. Naꞌuk Ubu nlobang ia ovu vali notu ma lolin ewal ia tali ni suhut a. Ubu wol nlobang watan ia, naꞌuk nlobang vali yaꞌa, boma ralang a deka ntafal ma lalau lalawatan. 28Wean inyai, bi ufarlan ma usinir ia ma nti nalola mia, boma wean i msyiꞌik roak ia, na ralabira ra veka lolin ewal, ovu vali ning fikiran a veka malinan. 29Ba mtyorung ovu inabira lolin urun ma myala ia wean i tala terad a valid ra naꞌa Duilaꞌa, ovu myalang ia, ovu vali tamata ovi wean ia. 30Lan ana, kedan watan na nmata, tevek nkarya verin Kristus. Ia wol nbobar ma nmata ma nlobang yaꞌa, ma al nkati bir tinemun naꞌa afa ovi wol bis myotu ra.

Currently Selected:

Filipi 2: frd

Highlight

Copy

Compare