1 Timotius 2
2
Taflurut verin dida dawan ra ovu tamata ra munuk
1Timotius, mane usurak oa wean ini. Yaꞌa era ma muflurut verin tamata ra munuk. Muflurut ilaꞌa verin Ubu ma nlobang tamata ra munuk, ovu fwalak fara weninyai verin Ubu, tevek nlobang roak tamata rivun. 2Muflurut vali wean inyai verin raja ra ovu dawan fareta ra munuk, boma dida vavaꞌat ra malinan watan. Ba fara dida vavaꞌat ra rmalola ovu talang tamata ra. 3Taflurut wean inyai, na inyai lolin. Totu wean inyai, na nfaloling Ubu ralan a, ovu Ia nsikat ita tali dida salasilan ra, ma dida vavaꞌat kakiwal. 4Ubu inan ma nsikat tamata ra munuk tali rira salasilan ra, ma rira vavaꞌat kakiwal, ovu Ia inan ma rkaꞌa vaivatul ovi kena ra. 5Ubu ikisa watan, ovu Tamata ikisa watan neluk leta verin tamata ra ma rti Ubu, na inyai Kristus Yesus. 6Ia nala roak tenan a ma al ntevut tamata ra munuk tali rira salasilan ra. Ia notu afa yai, boma naꞌa amar i Ubu nfadoku a, na ita tkaꞌa ne, Ubu inan ma nsikat tamata ra munuk tali rira salasilan ra, ma rira vavaꞌat kakiwal. 7Ba afa avyai, bi Ubu nfili yaꞌa ma eluk Ni rasul. Ia nsinir yaꞌa ma ufamalik vaivatul ovi kena ra verin tamata ovi wol Yahudi ra, boma rorang Yesus. Afa ovi ufalak ini kena! Yaꞌa wol usiklabir!
Paulus nair Timotius naꞌa afa ovi vata ovu brana ra rotu naꞌa rira sidovung
8Yaꞌa inak ma naꞌa inba watan misdovu mia, na era ma brana ra rsikat limarira ra ma raflurut. Brana ra musti rira vavaꞌat ra rmalola, ovu wean i mane raflurut, na deka rsingarahi te rsingrova ira. 9Ufalak vali ma wean i vata ra rung a reluk ira, na reluk kadaravit ovi inovan verin vata ra, boma rfaturu ne, rira vavaꞌat lolin. Deka rtebung rira vut ra ma nlia daꞌin. Deka reluk kadaravit ovi fyawar urun, te rfakloꞌi masa te mutiara naꞌa tenarira ra. 10Naꞌuk ni lolin a, na vata ra rotu watan afa ovi lolin ra, boma tamata ra veka rfalak ne, vata avyai rira vavaꞌat ra rfaturu ne, rorang Ubu.
11Wean i tamata ra rair Ubu Ni vaivatul ra verin vata ra naꞌa rira sidovung a, na fara vata ra rfakabava tenarira ra ovu deka rangrihi. 12Yaꞌa wol utorung ma vata ra rair te rfareta brana ra. Ira musti rarenar ma lolin ovu deka vair. 13Tevek Ubu notu lan Adam, beti Hawa. 14Nitdawan nweang nala Hawa, na Adam wahal, ba Hawa nangal afa i Ubu nfareta verin ira. 15Velik ne wean inyai, naꞌuk Ubu veka nsikat vata ra tali rira salasilan ra, ma rira vavaꞌat kakiwal naꞌa amar i rarali yanarira ra. Ia notu wean inyai, asal ne rorang lalawatan Yesus ovu rlobang tamata ra, ovu rira vavaꞌat ra rmalola, ovu vali ma rtahang nal ralarira ra naꞌa afaka watan.
Currently Selected:
1 Timotius 2: frd
Highlight
Copy
Compare
Share
Want to have your highlights saved across all your devices? Sign up or sign in
© 2016, Yayasan Pemberdayaan Masyarakat Desa in cooperation with Wycliffe Bible Translators, Inc.
