Kolose 3

Anakare enlala naban de lowehe gwen hap de ol: “Ano angna zen awe hom. Zen ngatan zi mo langnak gwëꞌara.”

1Zep nen mese Kristus hun de zeraha-en gwenkam zëno timnik bïtï gwek. Zep man nwe-mase gweꞌan: Kristus kim tïlkï, Zen nëban mae golëjuweka. Hen Zen kim etan ngaya gweka, hen ngatan zi mo lang san dep kim sewe seka, nësa dekam zep hen golësesek gwe seka. Zen in zep, nen anakarekam ëenlala gwe-gwen, “Ano angna, zen awe hom gwëꞌara. Zen ngatan zi mo langnak gwëꞌara– men zao Kristus Alap mo dam taha nakon teipsïnkïm nikinꞌirake.” 2Zep nëno mae mo enlalana dikire gulk de lang ennak ëdohon gwek– men zëwe hen nëno mae mo angna ëgwë gweꞌanke. Okamanak awe bap zen. 3Okamanak awe, nen tok-tok makare nike lowe heꞌan. Sap nëno mae mo angna Kristus angkam Alap zëre onak golëlowehe gweꞌara– men zëwe enho aha-erekam Alap zëre han ë gweꞌarake. 4Nëno mae mo eiwakam de angna, zen Kristus onak. Zep Alap kim de Kristussu tïngare zi hip zertreizimꞌinka, nen hen dekam zëwe! Hen nen dekam teipsïn-teipsïn zi mo kim esa Kristus mo alp nakon zëre mo ngatannak hen lowehe gwer.

5Zen in zep, ere mae mo auhu-kama tim nikore hole-hlena emki gwirsïk irin– anakarena,

kahalo gwen hap de hole-hle,

wesya de lirak oson hap de hole-hle,

swi enkam de gwë gwen hap de hole-hle,

aha karek maesa de gon hap de hole-hle,

hen te-ala beya gwen hap de hole-hle naye.

Te-ala beya gwen hap de hole-hlena in, zëno nwe-masena apdenak– yang tasïn dowalsa de boklesa kom so gweblan nabanye. Sap te-ala beya gwen hap de enlalakam de gwë gwenkam, dekam hwëna Alapsa lip sane ë gweblanan. 6Zen kirekam zini karekna nulin halasen gwenan, hwëna zen dekon zep Alap mo jala okamanak de hatan hap golek de gweꞌan. Zini men zen kirekam Alap mo dwam gwibin srëm san lowehe gwenan, Zen dekam sa timbwas tabir zira. 7Nen hen menkam kirekame lowehe gwek. Nësa hen dekam kirekam-kirekam hole-hlena in zen hule gwek. 8Hwëna angkam nen ki nëre mae mo kirekam-kirekam hole-hlena insa hiri gun–

wal bosyansa de u sal-sal gweblan,

husus gweblan,

lamang tan,

wakwak tan,

hen nop-nop gweblan mae naye.

9Nëre mae mo Kristen bose walya bap nen boton ta gwibin. Sap nen mese nëre mae mo ëpba kirekam-kirekam naban hole-hle naban baju ëpbasa de hiri son makan hiri osok. 10Dekam zebe hwëna ngatan zi mo langnak dep de enlala ësena baju ëse mo kim alala lak. Nen angkam san de aha zi, ësena. Alap men Zen nësa yang tabirki, Zen man etan nësa ëse ta gwibirida– zëre mo kim dikim ëliwehen hap, hen zënaka dikim hlï-hlï tasïn hïp. 11Zep nen an angkam san de ëse yang tabinni kiye. Zep kire zini zen bëjen etan zënaka anakan klis gul gwen:

“An Yahudi zi.”

“An Yahudi srëm zi”

“An to mipsa de blaonsublunna.”

“An kire srëmna.”

“An aha zi ausu nakore zi.”

“An kareksa de gol gwen zi ausu nakore zi.”

“An zi mo tana ïltïkïnnïk de babu gwen zi.”

“An kire srëm zi.”

Sap nen an kïtak Kristus hun de zeraha-en gwen zi, hen Zen angkam nëno mae mo enhonak gwë gweꞌara.

12Zen in zep, nen Alap mo hlïl irin zi mo kim nen lowehe gwen. Sap nësa mes zëre han dikim zeraha-en gwen hap ngan tasibirki. Zep nen an zen– Zëno kwasang gwibiridan wenyaye. Zep nen ki nëre mae mo lowehen ësena insa pakean ëse mo kim alala ta gwen– anakarekam de lowehe gwenkam,

dawemsa hen kwasang-kwasangsa de tïngare zi hip gol gwizimdinkim,

enlala betekkam de lowehe gwenkam,

tïngare zisi de sae-sae enkam golëlowehe gwenkam,

hen tatem de ëzauk gwenkam.

13Jala bap nen lam gul gwen– dekam de hwë-hwëkam nënaka kareksa gol gwizimdin hipye. Hwëna nen ki hwë-hwëkam kwasang tola ban karekna insa eititi gwe-gwibin. Sap Alap mes Kristus mo kwasang-kwasang nakon nëno mae mo karek-karekna eititi gwibir-zimki, zep nen hen diki kirekam nen eititi gwe-gwibin.

14Hwëna bol-zaun tanganna, nënaka nen kwasang gwibirida gwen. Zen san de tak ësesa de daunnu kiye– pakean ësena insa dikim jak sosun hup. Zen dekam tangan esa aha-ere enlalakam lowehe gwer. 15Sap Alap mes nësa kwang guludaka– Kristus mo timnik de bïtï gwenkam dikim ëaha-en gwen hapye. Zen zep Kristus onakore aha-ere enlalakam de lowehe gwen hap dena in, dikire nësa enho nakon ïrïk gïk. Deban Alap hap nen dawemsa golbla tine gwen.

16Kristus hup de ol dawemna dikire nëno mae mo enhonak dawem enkam sa gwek. Hen tïngare Kristus onakore enlala blalkam nen nënaka tawa ta gwibin, hen dawem san dep nen dekam nënaka tïtï ta gwibin. Hen Alapsa nen enho nakon tërya ban isrip-sri gwe-gweblan– sap Alap mo ëbpa ola kore tërkam, Kristus hup de tërkam, hen sap Alap mo Enho nakore tërkam. 17Nëno mae mo lowe henna, sap syala hen ola, dikire Bian Yesus mo bose ensa dikim teip gulsuk gweblan en hap lwa gwek. Hen deban Bian Alap hap nen dawemsa golbla tine gwen– Kristus insa dawemna nëbe mae hap gol gwizimnirake.

Aha-ere golak de Kristen zi kirekam zënaka golëlowehe gwen hap de ol:

18We walya, emki ere mae mo zi walya blikip gwesibirida gwen, sap Kristen we wal hap zen kirekam dakastïlzimꞌin.

19Zini, emki ere mae mo we walya kwasang gwibirida gwen. Jal-jalkam bahem golëlowehe gwen.

20Walasna, ane-bia mo ol san em ang ta gwen. Bian Alap dekam sa hen emsa sam gwesibiridala.

21Bi walkam dena, ere mae mo walasna bahem u sal-sal ta gwibin. Ki hwëna enlala nik sa ëdowe hana gwer.

22Zi mo tana ïltïkïnnïk de ëbabu gwe-gwen wenya, ere mae mo okamanak de zi bina in mo ol san em ang ta gwen– sap zen de emsa kara ta gwennak, hen sap kara tan srëmnak. Hen tïngare enho naban em betek gwibirida gwen. Sap em dekam ere mo eiwakam de zi bina Bian Yesussue hen blikip eisïk gweblanan. 23Zep banakare maesa de syal gwibinkim, tïngare enho naban em anakare enlala naban syal ta gwen, “Ëe an zisi homë babu gweblaꞌan. Hwëna Bian Yesus mo abe hap de dwam gwibir-blinna, zen ëre mo zi bina an, zëno ëk nakon sa wet so gwer.” 24Zen kire enlala naban em syal-syalkam syal ta gwen, sap ena anakan tawana, “Zen diki Bian Yesus sa ëre mo syal eini ap golblala– Zen kim zëre mo hlïl irin zi hip de hamal gulzimdinni insa golzimꞌinkaye.” Eiwa, Zen Zen en tangan emsa bi gweblaꞌara. 25Hwëna emki ëenlala gwen: Men zen karekna nol gwenan, Alap sa etan zëre mae mo karek gon jam enkam karek tabiri– sap bose nabare wenya, hen sap bose srëm wenya. Alap hom ahakore en naka auhu-kama zi mo kim golëake gwenda.

Currently Selected:

Kolose 3: ury

Highlight

Copy

Compare