Matiu 24
24
1Yeezu ale yiti Wen yenni po a nyini la, wa ŋaaŋviirɔma yaa dak Wen yenni a sak wa. 2Wa yaa weeni ba ayen, <<Ni basi ate m weeni a sak ni. Ku danni a cheena kama ate nuruba a jam kaasi jaabuuri ale bo dela la. Ba kan basi tintain yeŋ mɛ di choa zuwa.>>
3Yeezu ale wa ŋaaŋviirɔma nyiini yaa cheŋ ga jueli kala Olivi Guuku zuk. Ba yaa bek wa ayen, <<Weeni ti, ka dimpo ate wieŋa de meena ale nye, be ka boa ale ku nye ate ku sak ti ayen fi jamka ale tɛŋka zuk meena kpeglimka danni a moata kama?>>
4Wa yaa weeni ba ayen, <<Ni kpesi nidek ate waai kan paasi ni. 5Nuruba yegayega ale jam pai mi yuenni nyiŋ a wi badek a weeni ayen ba ka Kirisitawa abe ba paasi nuruba yegayega. Ku a fɛ kama ayen nama a kan va ba. 6Ni dan wom kpaliŋsa wie ate si gela a moata ale ge si gela mɛ a bo niŋniŋa, ni kan chali yɔgsummoa. Kula ale sak ni ayen tɛŋka kpeglimka danni a moata kama. 7Tɛŋsa ale yiti a ta chaab ate naata mɛ a yiti a ta chaab. Ate kɔm a boro ate tɛŋka choa jigi meena. 8Wieŋa de meena a nye ase ka nipok lɔgi ale a dom alege ate wa a biak la.
9<<Nuruba ale yik ni a ta ni ga nyo baai ale ba basi ate ni nya ninam la nisima po ate ba ko ni. Waai meena ale kisi ni mi vaka nyiŋ. 10Va ŋala po nuruba yegayega baai ale jam ta siaka ale mi la, ale ŋmani mi ŋaaŋ vaka. Ba le kisi chaab abe ba bobri chaab a sak. 11Biisiteerɔba yegayega baai ale kan seba Wen la, ale jam paasi nuruba yegayega. 12Nuruba yegayega ale jam basi chaab yaalika, dii nyiŋla nuruba tuimbaata ale jam waaŋ a tagli jigi meena. 13Waai a dan pik a ga paari ku nueri ka, Wen ale vari wa a basi. 14Nuruba ale jam pai Wen wamaŋsaŋa a sak nuruba Wen naamu wie. Waai meena ale bo tɛŋka zuk la le liŋ wom wa wamaŋsaŋa wieŋa ale ge ate tɛŋka meena a kpeglim.
15<<Ni wom mi wieŋa de nalimnyiini. Wen biisiteerɔwa Daniel, a jam ŋmarisi wabiok kuui ale ku jam basi ate nuruba a nam la wie kama Wen gbaŋka po dipo.#24:15 Daniel 9:27 Nama ale nya ale ku za juijui ale kan magsi ku za la.>> Nuru waai ale a karim wieŋa de la, abe miŋ chak. 16<<Baai meena ale bo Judia tɛŋka po la, yiti a pii nyiŋ chali nna yegayega a ga suk guutaŋa po. 17Baai ale bo ba gbirima zuima la dan wom wabiokku de wie, ba kan ŋman yaali ayen ba siŋ a jo ba diinaŋa po a pai ba ŋanta. 18Baai mɛ ale bo ba kaduksa po la dan wom wanni de, ba mɛ kan ŋman jo ba diinaŋa po ayen ba pai ŋanta. 19Da ŋala po ku le jam pagra nna yegayega a te nipok puusa ale baai ale ta buluata la. 20Ni a puusi a te Wen ate kude a kan jam nye ŋoota wein ya yaase ba Vuusum Danni. 21Ku dan paari da ŋala ninam buui ate nuruba ale nam la ale gaam ninam meena ate nuruba, a nam a ta nyini diipo ate Wen a nye tɛŋka la. Ninam bula choa a kan ŋman jam. 22Wen poom yeeri ninam daaŋa po ŋa gela a basi kama, dii nyiŋla baai ate wa lueri ayen ba jam va wa la nyiŋ. Wa dan kan yeeri ninammu daaŋa gela a basi ya, waai ate kan nyini ninammu po a nyini.
23<<Da ŋala po waai dan weeni ayen, <Ni nya, Kirisitawa ale nna,> yaase <Ni nya, Kirisitawa ale la,> ni kan wom wa. 24Nuruba gela ale jam yiti a paasi nuruba ayen ba ale Kirisitawa. Ba baai mɛ le jam a weeni ayen ba ka Wen biisiteerɔba. Ba le jam a tom wakperikaliisa nna yegayega a yaali ayen ba dan poom baga ba paasi baai ate Wen a lueri ayen ba va wa la. 25Ni wom mi wieŋa de nalimnyiini. Mi poom liŋ weeni ni ba le cheena ayen ba nye ni diila kama. 26Va ŋala po nuru wanyi ale weeni ayen, <Ni nya, Kirisitawa a bo ka sagni po.> Wa chɔ mɛ ale weeni ni ayen, <Ni nya, Kirisitawa a suk bo ka dewa.> Nama kan a wom ba. 27Mi Saalɔbiika ŋman jamka ale nye a ase ka nyaksika la a nyini kori a taam siŋ yeniŋ ate nuruba nya. 28Ni seba ayen jakpiuk ale dua juijui la duinsa a bo ka dula.
29<<Alege ninammu daaŋa a dan jam taam, Wenbinni ale sobri ate chiika a kan nya. (Azaya 13:10) Chiŋmarisaŋa le nyini wenŋmazuk a lo ate ŋan baai meena ale bo wenŋmazuk a ta pagrim la mɛ a choa.#24:29 Azaya 13:10; Joel 2:10 30Saalɔbiika jam ka daanaŋa ale jam chiŋmaaŋa po, ate tɛŋka meena demma ale kum, dii nyiŋla ba le nya Mi Saalɔbiika ale m nyini chiŋmaaŋa po a cheena ale pagrim ale zula yega. 31Mi ale tom maarɔma ale damuniŋ peerika ate ba tigsi nuru baai ate Wen lueri a ta nyini tɛŋka meena la.
32<<Ni basi ate kiŋkaŋ a sak ni wari kiri. Ni nyiem a dan nya ale ka boro a pusi vaata, ni seba ayen kpari wein a moata kama. 33Suik kula po mɛ, ni dan nya wieŋa de meena ale ŋa boro a nye, ni le seba ayen da ŋala a moata kama. 34Wensie ate mi a weeni ni gaŋka de a kan sum taam ka wieŋa de meena a nin nye. 35Wenŋmazuk ale tɛŋzuk meena ale jam taam dai yeŋ po, alege mi wieŋa a kan taam diipo diipo.
36<<Nuru waai a zɛ Mi Saalɔbiika ŋman jamka danni. Mi ale Wen maarɔma mɛ dek a zɛ, alege ka m Kowa nyiini ale seba. 37Mi ŋman jamka ale nye ase ka dii ale jam nye ase ka Nowa#24:37 Piilimka 6:5-8:22 daaŋa po la. 38Ase Nowa ale jam boro a nye wa ŋaaruŋ kpioŋku la, waai meena jam boro a nye ka wadek ale a yaali diila. Ba jam kasim a dɛ ŋandiinta ale a nyu ate nidoaba me a faari nipooba. Ba kasim a nye ka dila a ta ga paari diipo ate Nowa a jo wa ŋaaruŋku po alege ate nyiam a jam la. 39Ba jam zɛ ayen Wen ale basi ate nyiam jam a sueri tɛŋka meena a gbiti ba ko. Mi Saalɔbiika jamka ale nye ase ka dai dila danni la. 40Dai dila dek danni nuruba baye ale bo ba kaduksa po a kpa, ate Wen a pai wanyi a ta cheŋ abe wa ge wanyi wa. 41Nipooba baye ale bo nanzuk po a num zom, ate wa pai wanyi abe wa ge wanyi wa.
42<<Ni kpesi nidek abe ni a limisi, dii nyiŋla ni zɛ dai dii danni ate ni Nyɔnɔwa Yeezu Kirisita a cheena la. 43Ni basi ate m weeni ni ayen ase yeri nyɔnɔ a dan seba ayen zueba ale jam wa yeri, wa ale kasim a nya kama ate zuema a kan baga a jo zu. Wa kan goa see ka wa nin yik ba. 44Diipo ate nama a kan ŋman poli ayen Mi Saalɔbiika ale jam la, dila po ale m cheena. Ka dila ale soa ayen ni gomsi a magsi a limisi la.
45<<Ka nama wana dek ale wa chim wensie ale yam nyɔnɔ wieŋa de meena po? Ku a nye ase ka yeri nyɔnɔ waai ale lueri wa tomteerɔma po wanyi ayen wa chim kpagi mbala zuk abe wa a te ba ŋandiinta diipo ale magsi la. 46Tomteerɔ waai ate wa kpagi a jam paari ale wa a tom wa tuini la a ta suipeentik kama. 47Wensie ate mi a weeni ni, yenni nyɔnɔwa yaa le basi ate wa a nya wa yenni ŋantaŋa meena zuk a te wa. 48Alege tomteerɔwa waai ate yenni nyɔnɔwa a lueri la, a dan ka nyiŋworuk nyɔnɔ, wa a weeni wadek kama ayen wa nyɔnɔwa a kan jamu nwuli. 49Dila nyiŋla wa yaa yik wa tomteerɔ chaama a nak kama alege cheŋ a ga gum baai ale boro a dɛ ŋandiinta ale a nyu daata a bugi la jigi. 50Dai dii danni ate wa kan poli ayen wa nyɔnɔwa a cheena la, dai dila danni dek ate wa cheena. 51Wa nyɔnɔwa a dan jam nya dii ate wa tom la, wa sui ale puuri nna yegayega ale wa, ate wa namsi wa abe wa pai wa a gum chaab ale sakpaŋ zula nyama. Wa ale bo ka dula a kum abe wa a ŋɔbi wa nyinaŋa.
Currently Selected:
Matiu 24: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
Matiu 24
24
1Yeezu ale yiti Wen yenni po a nyini la, wa ŋaaŋviirɔma yaa dak Wen yenni a sak wa. 2Wa yaa weeni ba ayen, <<Ni basi ate m weeni a sak ni. Ku danni a cheena kama ate nuruba a jam kaasi jaabuuri ale bo dela la. Ba kan basi tintain yeŋ mɛ di choa zuwa.>>
3Yeezu ale wa ŋaaŋviirɔma nyiini yaa cheŋ ga jueli kala Olivi Guuku zuk. Ba yaa bek wa ayen, <<Weeni ti, ka dimpo ate wieŋa de meena ale nye, be ka boa ale ku nye ate ku sak ti ayen fi jamka ale tɛŋka zuk meena kpeglimka danni a moata kama?>>
4Wa yaa weeni ba ayen, <<Ni kpesi nidek ate waai kan paasi ni. 5Nuruba yegayega ale jam pai mi yuenni nyiŋ a wi badek a weeni ayen ba ka Kirisitawa abe ba paasi nuruba yegayega. Ku a fɛ kama ayen nama a kan va ba. 6Ni dan wom kpaliŋsa wie ate si gela a moata ale ge si gela mɛ a bo niŋniŋa, ni kan chali yɔgsummoa. Kula ale sak ni ayen tɛŋka kpeglimka danni a moata kama. 7Tɛŋsa ale yiti a ta chaab ate naata mɛ a yiti a ta chaab. Ate kɔm a boro ate tɛŋka choa jigi meena. 8Wieŋa de meena a nye ase ka nipok lɔgi ale a dom alege ate wa a biak la.
9<<Nuruba ale yik ni a ta ni ga nyo baai ale ba basi ate ni nya ninam la nisima po ate ba ko ni. Waai meena ale kisi ni mi vaka nyiŋ. 10Va ŋala po nuruba yegayega baai ale jam ta siaka ale mi la, ale ŋmani mi ŋaaŋ vaka. Ba le kisi chaab abe ba bobri chaab a sak. 11Biisiteerɔba yegayega baai ale kan seba Wen la, ale jam paasi nuruba yegayega. 12Nuruba yegayega ale jam basi chaab yaalika, dii nyiŋla nuruba tuimbaata ale jam waaŋ a tagli jigi meena. 13Waai a dan pik a ga paari ku nueri ka, Wen ale vari wa a basi. 14Nuruba ale jam pai Wen wamaŋsaŋa a sak nuruba Wen naamu wie. Waai meena ale bo tɛŋka zuk la le liŋ wom wa wamaŋsaŋa wieŋa ale ge ate tɛŋka meena a kpeglim.
15<<Ni wom mi wieŋa de nalimnyiini. Wen biisiteerɔwa Daniel, a jam ŋmarisi wabiok kuui ale ku jam basi ate nuruba a nam la wie kama Wen gbaŋka po dipo.#24:15 Daniel 9:27 Nama ale nya ale ku za juijui ale kan magsi ku za la.>> Nuru waai ale a karim wieŋa de la, abe miŋ chak. 16<<Baai meena ale bo Judia tɛŋka po la, yiti a pii nyiŋ chali nna yegayega a ga suk guutaŋa po. 17Baai ale bo ba gbirima zuima la dan wom wabiokku de wie, ba kan ŋman yaali ayen ba siŋ a jo ba diinaŋa po a pai ba ŋanta. 18Baai mɛ ale bo ba kaduksa po la dan wom wanni de, ba mɛ kan ŋman jo ba diinaŋa po ayen ba pai ŋanta. 19Da ŋala po ku le jam pagra nna yegayega a te nipok puusa ale baai ale ta buluata la. 20Ni a puusi a te Wen ate kude a kan jam nye ŋoota wein ya yaase ba Vuusum Danni. 21Ku dan paari da ŋala ninam buui ate nuruba ale nam la ale gaam ninam meena ate nuruba, a nam a ta nyini diipo ate Wen a nye tɛŋka la. Ninam bula choa a kan ŋman jam. 22Wen poom yeeri ninam daaŋa po ŋa gela a basi kama, dii nyiŋla baai ate wa lueri ayen ba jam va wa la nyiŋ. Wa dan kan yeeri ninammu daaŋa gela a basi ya, waai ate kan nyini ninammu po a nyini.
23<<Da ŋala po waai dan weeni ayen, <Ni nya, Kirisitawa ale nna,> yaase <Ni nya, Kirisitawa ale la,> ni kan wom wa. 24Nuruba gela ale jam yiti a paasi nuruba ayen ba ale Kirisitawa. Ba baai mɛ le jam a weeni ayen ba ka Wen biisiteerɔba. Ba le jam a tom wakperikaliisa nna yegayega a yaali ayen ba dan poom baga ba paasi baai ate Wen a lueri ayen ba va wa la. 25Ni wom mi wieŋa de nalimnyiini. Mi poom liŋ weeni ni ba le cheena ayen ba nye ni diila kama. 26Va ŋala po nuru wanyi ale weeni ayen, <Ni nya, Kirisitawa a bo ka sagni po.> Wa chɔ mɛ ale weeni ni ayen, <Ni nya, Kirisitawa a suk bo ka dewa.> Nama kan a wom ba. 27Mi Saalɔbiika ŋman jamka ale nye a ase ka nyaksika la a nyini kori a taam siŋ yeniŋ ate nuruba nya. 28Ni seba ayen jakpiuk ale dua juijui la duinsa a bo ka dula.
29<<Alege ninammu daaŋa a dan jam taam, Wenbinni ale sobri ate chiika a kan nya. (Azaya 13:10) Chiŋmarisaŋa le nyini wenŋmazuk a lo ate ŋan baai meena ale bo wenŋmazuk a ta pagrim la mɛ a choa.#24:29 Azaya 13:10; Joel 2:10 30Saalɔbiika jam ka daanaŋa ale jam chiŋmaaŋa po, ate tɛŋka meena demma ale kum, dii nyiŋla ba le nya Mi Saalɔbiika ale m nyini chiŋmaaŋa po a cheena ale pagrim ale zula yega. 31Mi ale tom maarɔma ale damuniŋ peerika ate ba tigsi nuru baai ate Wen lueri a ta nyini tɛŋka meena la.
32<<Ni basi ate kiŋkaŋ a sak ni wari kiri. Ni nyiem a dan nya ale ka boro a pusi vaata, ni seba ayen kpari wein a moata kama. 33Suik kula po mɛ, ni dan nya wieŋa de meena ale ŋa boro a nye, ni le seba ayen da ŋala a moata kama. 34Wensie ate mi a weeni ni gaŋka de a kan sum taam ka wieŋa de meena a nin nye. 35Wenŋmazuk ale tɛŋzuk meena ale jam taam dai yeŋ po, alege mi wieŋa a kan taam diipo diipo.
36<<Nuru waai a zɛ Mi Saalɔbiika ŋman jamka danni. Mi ale Wen maarɔma mɛ dek a zɛ, alege ka m Kowa nyiini ale seba. 37Mi ŋman jamka ale nye ase ka dii ale jam nye ase ka Nowa#24:37 Piilimka 6:5-8:22 daaŋa po la. 38Ase Nowa ale jam boro a nye wa ŋaaruŋ kpioŋku la, waai meena jam boro a nye ka wadek ale a yaali diila. Ba jam kasim a dɛ ŋandiinta ale a nyu ate nidoaba me a faari nipooba. Ba kasim a nye ka dila a ta ga paari diipo ate Nowa a jo wa ŋaaruŋku po alege ate nyiam a jam la. 39Ba jam zɛ ayen Wen ale basi ate nyiam jam a sueri tɛŋka meena a gbiti ba ko. Mi Saalɔbiika jamka ale nye ase ka dai dila danni la. 40Dai dila dek danni nuruba baye ale bo ba kaduksa po a kpa, ate Wen a pai wanyi a ta cheŋ abe wa ge wanyi wa. 41Nipooba baye ale bo nanzuk po a num zom, ate wa pai wanyi abe wa ge wanyi wa.
42<<Ni kpesi nidek abe ni a limisi, dii nyiŋla ni zɛ dai dii danni ate ni Nyɔnɔwa Yeezu Kirisita a cheena la. 43Ni basi ate m weeni ni ayen ase yeri nyɔnɔ a dan seba ayen zueba ale jam wa yeri, wa ale kasim a nya kama ate zuema a kan baga a jo zu. Wa kan goa see ka wa nin yik ba. 44Diipo ate nama a kan ŋman poli ayen Mi Saalɔbiika ale jam la, dila po ale m cheena. Ka dila ale soa ayen ni gomsi a magsi a limisi la.
45<<Ka nama wana dek ale wa chim wensie ale yam nyɔnɔ wieŋa de meena po? Ku a nye ase ka yeri nyɔnɔ waai ale lueri wa tomteerɔma po wanyi ayen wa chim kpagi mbala zuk abe wa a te ba ŋandiinta diipo ale magsi la. 46Tomteerɔ waai ate wa kpagi a jam paari ale wa a tom wa tuini la a ta suipeentik kama. 47Wensie ate mi a weeni ni, yenni nyɔnɔwa yaa le basi ate wa a nya wa yenni ŋantaŋa meena zuk a te wa. 48Alege tomteerɔwa waai ate yenni nyɔnɔwa a lueri la, a dan ka nyiŋworuk nyɔnɔ, wa a weeni wadek kama ayen wa nyɔnɔwa a kan jamu nwuli. 49Dila nyiŋla wa yaa yik wa tomteerɔ chaama a nak kama alege cheŋ a ga gum baai ale boro a dɛ ŋandiinta ale a nyu daata a bugi la jigi. 50Dai dii danni ate wa kan poli ayen wa nyɔnɔwa a cheena la, dai dila danni dek ate wa cheena. 51Wa nyɔnɔwa a dan jam nya dii ate wa tom la, wa sui ale puuri nna yegayega ale wa, ate wa namsi wa abe wa pai wa a gum chaab ale sakpaŋ zula nyama. Wa ale bo ka dula a kum abe wa a ŋɔbi wa nyinaŋa.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation