Lumàns 2

Yènfù bè saka kə ghɨt à jɨ̀m kə chilichili

1Wò wi hi tè saka wut wùlè makə a mò wò nde, beka wò nè kəbi gha ghe a ghɨt mɨ ghɨ̂n nè. Wò saka ghɨta, jîsà nâbi na ghə, yi kaha kwo kə wò, wo bu hi fwo atɨ̂n. 2Ghàhnà khə na Yènfù saka lò ghɨt ghe a ghɨ nê gha mɨ ghɨ̂n, jîsà nâbi na ghə, yi mô kə hamok. 3Ghàn boŋa kwàktè na ghə? Na wò te wut shìki tè sak ghɨta a gha, nê kəbi ghɨna, ma wò bê tet na kə Yènfù boŋà sak wò agha? 4Yi ni mò na wò lyè wi tôknà yi kanani yi Fùyènì nì wunhî yi wuni, nì jùŋ ye a fu nê ha wò ha yi gha ma? Ba wò khəlò na Yènfù tòknà ni, khɨŋa na wò kahi təm ya a be? 5Wo bɨlà nê na lâ Fùyènù hi bâŋà yê kə ashyə̂ beka wò chile, ma wò ti ta nì to kôŋà wi hi kwunâ. Yènfù bè chwùtè lò na fu ti bâŋhì lâ ha wò a wun wu tuk wu saku ma wù sak wò kə nâ chilichili. 6Fu bè folò nâbi maktu nde kə a wun a yì fèt. 7Yènfù bè folò chyənà ye a yì be mê wi ha ghɨt ghe a ghɨ wunhe atɨ̂n à yì fèt yi jûŋì, khɨŋa kə na fu fo ghaki ha ghɨna nì yet yi jûŋì. Ghɨt atɨna ke yê kə hi bè khɨte chyənà mi yìna. 8Fu bè saka lò ghɨt ghe a ghɨ khə kə gha yi ghɨna yi ngɨŋi, ywo wi gha ye a yi mô hamok biyani kôŋà kə yi fə̂m. Fu bè saka ghɨna hi chwùtì lâ wunu baŋanu ha ghɨna. 9Nâbi nde te wù nè be bè yenalò ngə̂k yi bəma kə ni ma wù fê yu lùmchuŋ. Ngə̂k àtɨ̂n bè yîmè kə ha ghɨt a Jûs ashyə̂ a kûmtè wu tûm. 10Yènfù bè nê ha ghɨna ni biyani ma wù fo ghaki nì kokhînì nì yutìnì nâbi ha nde we a wù chyə chyənà yì jùŋ, yîmè nì ghɨt a Jûs, a kûmtè wu tûm. 11Yi mô ni beka Yènfù saka ghɨt à jɨ̀m kə yi ghəl, ke wi luk we ghɨna fwo atɨ̂n.

12Ghɨ bè saka bobhilò tum we a wu nê be nâ wù jɨ̀m kə nâ kum besu ghɨna su nâbi te ghɨna khə wi Sak yi Musìs, ma wù yen ha ghɨt a Jûs ma wù sak à bobhi ghɨna nâ à jɨ̀m beka ghɨna nè be, khə sak mi yîn. 13Yi mô ni beka à wijə ghɨt ghe ghɨ ywo Saki a ghɨ mô chilichili a Yènfù ashyə̂. Wò kəta hi tè khə yi Sak, nê te yi jîsà, shyəma wò hi mô chilichili a Yènfù ashyə̂. 14Tumu jifa nê yi gha ye a Saki khɨŋa, yi hi chwûtè na ghɨna hì khəlò gha ye ghɨ kəta hi tè nì, nâbi te ghɨna khə wi Saki. 15Ghɨna nè ni, yi hi chwûtè na Yènfù ti nyak gha ye a Saki khɨŋa a ghɨna təm. Kwâktì tu ghɨna tu mô kəbi yâ, à ben a yu mùlè tu hi tòkà ghɨna, a ben a yu mùlè tu hi ngane ghɨna. 16Tuku bènàlò shyəma Yènfù jis ma Klistù Jisòs sak nâ a gha a letena à jɨ̀m ghe a ghɨ mô a ghɨta a tu kwàktì, kə yi ghəl te ghɨ tì nyàka a tum yì jùŋ afa a mu fòktè.

Lum we a ghɨt a Jûs tì lye Saki atɨ̂n

17Ghàn ghɨt a Jûs ni jala jîsà na ghàn yikte kə yi Sak, ghàn à Yènfù mô a jûŋ. 18Ghàn jîsà na ghàn khəlò gha ye a Yènfù khɨŋa, khə yê a yi mô chilichili nì ye a yi bu chilichili beka ghàn yike a Yènfù yi sak hì khə yì yîn. 19Ba ghàn khəlò na ghàn chwùtè lumu ha fèfù fê chwûtè yi bân ha ghɨt ghe ghɨ chyə a bɨn a finana, 20na ghàn tihe ngwònu, mô sù chichà ha mwəlà beka ghàn khə nâbi ghə ghe Saki jìsà fê khə nâbi ghə ghe a ghɨ mô hamok? 21Ghàn ni mò na ghàn yike ghɨta, boŋa yike wi ngɨŋ sanisu ma? Ghàn yike ghɨta na kə ghɨ hi chwoŋâ, boŋa chwoŋâ ma? 22Ghàn yike na kə wut chyə nì ywê wùt makə ghê lɨm à wùt, nâ ghàn chyə ma? Ghàn jîsà na kə ghɨta hi kokhe mosòmù biyani chwoŋa mwə̀lû a ndâ su tɨnsu. 23Ghàn ghaŋhe chyâ nì wunu na ghàn khəlò sak yi Fùyènì biyani wumhe Fùyèn beka ghàn khɨmalò sak yi tɨni. 24A ni mò gha ye ghɨ nyaka a ŋwàklù Fùyèn na, “Tumu jìsà a gha a be kum Fùyèn, a nê ghàn ghɨt a Jûs, beka ghàn chyə wi te Sak yani khɨŋa.”

25Ghàn khəlò na hi se nam a wûtà ni chwùtè gha kə wu yu afa wùt àtɨ̂n lèmà Saki biyani ma wùt ki khɨm yi Sâk, ma yi hi kə̂kà kəbi te ghɨ tà se jə nam a wuna. 26Yi chwûtè na wùt shìki ywo yi sâk teka ghɨ se nâbi nam a wuna, ma yi hi chwûtè kə na ghɨ ti sê. 27Wùt à tûm shìki mô teka ghɨ se nam a wuna kə nâ nì wo biyani wu ywo yi sâk, ma wù bê sak à bobhi ghàn ghe a ghɨ ti sê, wùlè fî nyak fo yi Sak ha ghàn, biyani ghàn hi ywo wi. 28Yi ni chwùtè na kàntè wùt à Jûs a Yènfù ashyə̂ wijə kə kum yi bwɨ̂, yi se nami wijə kə a jyà wùn. 29Kàntè wùt à Jûs a Yènfù ashyə̂ ni chwùtè a wun a chyənà. Hi se nam hamok yi chwùtè lumu a wùt à təm, a mô yi fêt yi Yòhnà, a bu yi sak ye a ghɨ nyaka. Kàntè wùt à Jûs wùna mô, a bəmhe Fùyèn wûn, a bəmhe wi ghɨta.

Currently Selected:

Lumàns 2: bmv

Highlight

Copy

Compare

Want to have your highlights saved across all your devices? Sign up or sign in

Learn More About Ŋwàklù Fùyèn Kàn Mù Fê (Cameron)