Lumàns 16

Bôl chinhi toŋtînì ha ghɨta a Lûm

1Mu khɨŋa na ghàn hi khə Febì, a jàmtù ghàhnà a ndâ Fùyèn a Kànkɨliyà. Wù mò wut wù fètana afû. 2Wù ben, ghàn fate fyi wûn a Bâba yi yet kə nâ wu lum afa a ghɨt a Fùyènà kəta hi tè fye wana ne atɨ̂n. Ghàn fyi wûn, ghàn fo nâbi yìni gâmtìnì te wù khɨŋa beka wù ti gâmtì ghɨta, ghɨ dô kə ni, fî gâmtì nâ mu.

3Ghàn toŋti kəbi Bìsilà ghê Àkwɨlà ha mu. Ghàh à ghɨna fètà ha Klistù Jisòs amok. 4Ghɨna ti fihi mu a yi jwô yi kpû ghɨna lanti hi kpû nâ a ghɨna sù ngɨŋ. A fo wi kə mu àyòŋnà ha ghɨna, ndasu Fùyènsu tum su boŋa folò 5Ghàn toŋti kəbi nôn ghɨt a bimena ghe a ghɨ chîntè a ghɨna ndâ. Ghàn toŋti Èbènetùs, a sô mù wù jùŋ we. Wù ndùku mô wut ashyə hi bime ha Klistù a yi lak yi Esiyà. 6Ghàn toŋti Mèli. Wù ti fêt nâ nì jyaka ha ghàn. 7Ghàn toŋti Àndɨ̀lonikùs nì Junìyàs. Ghɨna mò kəbi ghɨt a Jûs te mu, ma ghàh à ghɨna ndùku mô a ndâ chyâk amok. Ghɨna tì bimi ha Klistù ha mu ashyə̂, ghɨt a tuma Jisòs hì fate khə ghɨna nâ a jûŋ.

8Ghàn toŋti Àmbìlatùs ha mu. Wù mò sô mù wù jùŋ, yikte kə Bâba wu wùn. 9Ghàn toŋti Òbanùs te ghàh à wûn ndùku chîntè fêtà ha Klistù kəbi nì sô mù Sɨ̀takìs. 10Ghàn toŋti Àbelès. Wù ti chwûtì na wù mò kə wun a tô yi bimî ha Klistù. Ghàn toŋti kəbi ghɨta a Àlìstobulùs yi sah yi nda ha mu. 11Ghàn toŋti Hèlodìyòn, wut wâhù yi lak we, nì ghɨt a sah yi nda Nàsisùs ghe a ghɨna tì bime ha Bâba. 12Ghàn toŋti Tìfinà ghê Tìfosà, ghɨt a Bâba ghɨ fetana, toŋti kəbi Besìs, a jàmtù ghàhnà yì jùŋ yê. Wù ndùku fêtà ha Bâba nâ haŋaŋ. 13Ghàn toŋti Lufùs. Wù ti chwûtì ha mu na yi mò kə nâ wùt wù Bâba wù fètana. Ghàn toŋti kəbi ha nè wûn. Wù lyè kə mu te wâ wûn. 14Ghàn toŋti ha Àsinkìlitùs, nì Fìlegòn nì Hemìs nì Bàtɨ̀lobàs nì Hemàs kəbi nì wana ne ghe ghê ghɨna mò amok. 15Ghàn toŋti ha Fìlologùs nì Jùliyà nì Nelùs ghê jàmtù wûn kəbi nì Òlimbàs nì ghɨt a bimena à jɨ̀m ghe ghê ghɨna mò amok. 16Ghàn toŋti ngɨŋ sanisu kə nâ hi chwùtè kôŋ yi ghɨt a bimena. Nôn à ghɨt a Klistù afân nâ à jɨ̀m toŋte ha ghàn.

Tobhî yi gokheni

17Mu chyate nâ haŋaŋ a wana noma na ghàn hi tôknè kum ghɨt a ghe a ghɨ bè nì jyàhì wùni a ghàn a fùtɨ̂n, nêkhè yi bimî yani. Ghɨna chikhe yi yikî ye a ghɨ tì yike ghàn. Mu wu hì jîsà na kə ghàn hi chîntè ghàn à ghɨna! 18Nki ghɨt mɨ ghɨ̂n fètà wi ha Bâba ghàhnà Klistù, ghɨna khɨŋa kə hi tè nè gha ghe a ghɨ foma ha ghɨna. Ghɨna jîsà gha a fomana kə hi lehe ghɨt ghe a ghɨ fate khə wi gha. 19Nâbi nde ti yu lum we a ghàn ywo tum yì jùŋ atɨ̂n, nâ mu saŋle nâ a jûŋ kum ghàn. Mu khɨŋa na ghàn hi tofâ khə gha ghe a ghɨ jwôfà, khə wi be. 20Ghàn ni ni shyəma Yènfù fo yutìnì nì jyaka, ma ghàn chikhi Satàn kə nâ nì wulu. Bâba ghàhnà Jisòs Klistù chwuti təm a wuna jûŋà ha ghàn. 21Timotì, we ghàh à wûn fètà amok ti chinhi toŋtînì ha ghàn. Lùsiyùs nì Jesɨ̀yn nì Sòsìbatà wùt wâhù wù lak ti chinhi kəbi toŋtînì ha ghàn. 22Nâ mu Teltùs we a mu gàmtè Bôl hi nyàk à ŋwàklù yìna toŋte ghàn a Bâba yi yet. 23Gayùs toŋte kəbi ghàn. Mu chyə a wun a ndâ, ghɨt a bimena à jɨ̀m bênà chîntè atɨ̂n. Èlastùs we a wù kine gha wu ka a yi tèk afân ghê wâ nè ghàhnà Katùs chinhe kəbi yi toŋtî. 24(Bâba ghàhnà Jisòs Klistù chwuti təm a jûŋà ha ghàn nâ à jɨ̀m. Àmèn.)#16.24 Ŋwàklù su mwu su lesu yi jìs yi Gɨlìs kəta wi luklà fûn.

Jə̂m yi gokheni

25Kokhînì yênà ha Yènfù. Fu kəta a jyak hi nì na ghàn hi tâ a ghàn yi bimî kə yi ghəl te tum yì jùŋ ye a mu fòktè kum Jisòs Klistù jìsà. Fu ti ni ghàhnà ti khɨli tum yì jùŋ mi yìna, ma fu tî lə̂tì ha ghɨt ale nâ wu yu dâ, 26chin hì mô ma fu ti chwûtì gha mi yîn a ndan tohne gha afa a fòktì su chiksu tì nyàka kum Klistù. Fu tì jis na ghɨ ni, ghɨt à jɨ̀m bime ma ghɨ hì ywo, a mô fun fe a fu faŋa hamok.

27Kokhînì yen ha Yènfù, tohne a Jisòs Klistù a yû mù jɨ̀m! A mô kə funfu fù mòk a fu kəta kə tof wù jɨ̀m. Àmèn.

Currently Selected:

Lumàns 16: bmv

Highlight

Copy

Compare