Lumàns 14

Kə ghàn hi saka wana ne ghana

1Wùt hì lye bênà a ghàn a fùtɨ̂n, bimî yi wuni baha botâ, ghàn fyi wûn. Ghàn fyi ni, kə ghàn hi gufnà gha ghàn à wûn kum kwâktì ye a wù kəta kum gha ale. 2Ghàn khə na wùt kəta yi bimî, ma wù hi yə nâbi ghə, biyani ma wùlè we a bimî wuni baha bota làhi tè la kə bàh, kuta wi nyàm. 3Kə wùt we a wù yə nâbi ghə hi kehe we a wù bama mwə̀ mùlè, kə we a wù bama shyə ale hi saka we a wù yə kə mwə̀ mù jɨ̀m beka Yènfù ti fyî wûn. 4Wò mò nâ nde hi tè saka wùt wù fètana wù wùt wùlò? À kəta kə Bì yi fèt à wûn hi kî na wù nè a jûŋ ma a be, biyani wu bu hi fên beka Bâba kətalò jyaka hi tòk à wûn.

5Ghɨt ale yena kə na tuk mùlè kokne lò a Yènfù ashyə̂ chyâ mùlè, ghɨ le yena na tuk mù jɨ̀m mò kə yi ghəl. Yi jwôfà na nâbi nde hi fate khə gha ye a wù mò a tô àtɨ̂n. 6Wùt we a wù yena na tuk wule kokne chyâlò wùlè ni nè hi kokhe Fùyèn atɨ̂n. We a wù yə kə mwə̀ mù jɨ̀m, wù yə kə hi fo yi kokhî ha Yènfù beka wù shihi yə̂, wu fo àyòŋnà ha Yènfù. We a wù bama mwə̀ mùlè ni nè ni kəbi hi fo yi kokhî ha Yènfù beka wù shihi nì ni, wu fo kəbi àyòŋnà ha Yènfù. 7Wùt wijə a ghàhnà fùtɨ̂n a wù chyə kə kum ngɨŋ à wûn, wùt wijə a wù kpo, ma kpû yi wuni hi mô kə ha ngɨŋ à wûn. 8Makə ghàhnà chyəlò, ghɨ chyə kə hi tè kokhe Bâba, ghɨ kpu kəbi yi kpû, ghɨ kpu kə hi fo yi kokhî ha wûn. Yi ni chwùtè na ghàhnà mò kə ghɨt a Bâba, makə ghɨ chyə yi chyə̂, makə ghɨ kpu yi kpû. 9Yi mô ni beka Klistù tì kpû kaha lôtì a yi kpû hi tè mò Bâba ha ghɨt ghe a ghɨ chyə nì ghe a ghɨ tì kpute. 10Yi mô ni, ghàn ghɨ le hi saka wana ne ghana kum ghə? Ghàn kehe wana ne ghana ghɨ le njwô ghə? Ba ghàn khəlò na ghàhnà à jɨ̀m bè time lò a Yènfù lùk wu saku. 11Yi mô kə yi ghəl te ghɨ nyaka na Bâba jis na, “Mu mò Yèn fe a fu chyə, jîsà na nâbi nde bè tumalò lwe a mu ashyə̂, ma nâbi nde jis nì jwo wuni na mu mò Fùyèn.” 12Yi ni chwùtè na nâbi nde a ghàhnà fùtɨ̂n bè taŋlelò jwo wuni ha Yènfù kum chyənà à wûn.

Kə wò ni ma wâ nâ ni be

13Kə ghàhnà bè saka wana ne ghàhnà ale. Yi jwôfà na ghàhnà bɨlà lem na ghàhnà bè fè nè wi gha hi nì na wana ne ale ni be. 14Mu khə hamok na shyə a yəna ale wijə a ghɨ yule kpene wi. Mu khə ni beka mu bime ha Bâba Jisòs. Biyani, wùt shìki yen na shyə wijə nì yulînì, ma ghɨ hi befa ha wûn. 15Wò shìki yə nki shyə̀ ale, gha tɨni fo ngə̂k a wâ nâ yi kwâktì ma yi hi fê chwûtè na wò kòŋàlò wûn agha. Kə wò ni na wâ nì wâ fen kum a shyə ghe a wò yə, beka wò khəlò na Klistù tì kpû ha wûn. 16Kə wò lyi gha ye a yi jwôfà ha wò ma wò ni ghɨt ale hi yena ha gha yi be. 17Fə̂n wù Fùyènù mò ni, a bu a shyə a yəna, a bu yi gha yi nyoni, a mò yi gha hi tè chyə chyəna chilichili, kəta yi yutì nì saŋlînì, a mô gha ghe a Yohnà Yulena bènà nì ghɨna. 18Wùt we a wù fètà ha Klistù, chyə a lum afan, nè na Yènfù hi saŋlê, ghɨta fê kôŋà wûn.

19Ghàhnà momhi hi tè nè kə gha ghe a ghɨ bênà nì yutìnì, nê na ghɨta hi ləma yi ləmà a ghɨna yi bimî. 20Kə ghàn bobhi fêt ye a Yènfù hi mô ma fu ti nî kum mwə̀ mù yə̂mù. Mwə̀ mù yə̂mù mù jɨ̀m yule kpene lò hi yə̂ biyani yi jwôfà wi na wùt yə shyə, ghɨ nê na wùt wùlè ni be. 21Yi jwôfà na kə wùt kut nyàm makə hi nyo mu lûk makə nê nâbi ghə a wu yu afa yi mô hi nì na wâ nè wun fen. 22Ghàn hì kəta nâbi yi bimî yì ghə kum gha mɨ ghɨ̂n, ghàn de, ma à hi khə kə ghàn à Yènfù. Jùŋ mò ha wùt we a wù nè gha, kante wi yi kantî. 23Biyani, wùt shihi yə a shyə, kante na ghɨ jwôfàlò, ma Yènfù lyi na wù ti bobhi gha beka wù yə shyə, kanti yi kantî na ghɨ jwôfàlò. Wùt shìki tè nè nâbi ghə, kante yi kantî na yi jwôfàlò hi nì, ma yi hi chwûtè na wù nè be.

Currently Selected:

Lumàns 14: bmv

Highlight

Copy

Compare