Lumàns 13

Ghɨt a bimena kəta hi tè yû ha ghɨt ghe a ghɨ saka ghɨna

1Nâ ghàn à jɨ̀m kəta hi tè yu ha ghɨt ghe a ghɨ saka mô a ghàn a tô beka wùt wù sakana wùlè wijə we wù faŋa hi fye jyaka ha Yènfù hi tè sâk. Nâ ghɨt a sakana à jɨ̀m mò ma à lem Fùyèn. 2Yi ni mò na a tunhi nâbi nde ghɨt a sakana, ma à hi mô na wù tunhi gha ye a Yènfù lèma, ma Yènfù bê sak wûn. 3Ghɨt ghe a ghɨ chyə chyənà yì jùŋ kəta wi hi tè fànà ghɨt a sakana. À kəta hi tè fànà ghe a ghɨ chyə chyənà yi be. Wùt shìki kôŋà wi na wùt wù sakana hi bəma ha wûn, wu hi nê kə gha a jûŋà, a ghe wù nè bɨlà bəmhe wûn. 4Yi mô ni beka wùt wù sakana mò wut wù fètana ha Yènfù, gâmtè ghàn na ghàn hi nè gha a jûŋà. Wùt hì nê be, wu hi fânà ghɨt a sakana beka ghɨna kəta lò jyaka hi fo ngə̂k ha ghɨt ghe a ghɨ nê gha a be. Ghɨna mô ghɨt a fetana ha Yènfù, fo ngə̂k ha ghɨt ghe a ghɨ nê gha a be, a mô lum we a Yènfù tì chwùtè atɨ̂n na fu bâŋhè lò lâ ha ghɨt a be. 5Yi ni chwùtè na nâbi nde kəta hi tè yû ha ghɨt a sakana, a bu kə kum njwo wù fànà na Yènfù làhi bàŋhè lâ ha yi, biyani njwo wù khəlò a wun a yi təm na yi jwôfàlò hi tè nì ni.

6A ni gha ye a ghàn kəta kəbi hi tè màkà ŋwàklànà beka ghɨt a sakana mò ma ghɨna ti fo ngɨŋsu ghɨna su hi tè nè fêt yina fêtà kə nâ ha Yènfù. 7Wùt hì kəta hi làk a shyə nâbi ha nde atɨ̂n à ghɨt mɨ ghɨ̂n, wu laklò. À hì mô ŋwàklù yì bəklena hi làk, wu laklò, a hì mô nâbi yì ngɨŋ à wûn, wu laklò, à hì mô nâbi yi ngumlî, wu hi fate ngumle ghɨna, à hì mô yi kokhî hi fo ha ghɨna, wu hi fô.

Ghàn hi kòŋà ngɨŋ sanisu

8Kə wùt bè hì kəta fôlì wûtù, a bu kə yi kôŋ shyəma wù hi kôŋà wûn, faŋa wi tuk wule. À kòŋà nâbi nde wâ nè wûn, ma yi hi chwûtè na wù ywolò Saki. 9Sak tɨ̂n ni na, “Kə wò bè chyə nì ywê wùt makə nì lɨm à wùt, kə wò bè ywe, kə wò bè chwoŋa, kə se gha hi fwo a ghɨta a mù mwə̀,” nì sak tu letu nâ tù jɨ̀m ni chìntè yê fwo kə atɨ̂n à yìna na, “Kòŋ wâ nâ kə yi ghəl te wò kòŋà ngɨŋ yâ.” 10À kòŋà nâbi nde wâ nè wûn, ma wù hi fê nê wi gha yi be ha wûn. Yi ni chwùtè na wùt kəta a yi kôŋ, à hi mô na wù lèmà lò Sak yì jɨ̀m.

11Hi kpenhî, ghàn kəta hi tè nè gha mɨ ghɨ̂n nâ à jɨ̀m beka ghàn khəlò yu we a ghàhnà mò atɨ̂n chîn. Yu ti kpên na ghàn yema a sù bwuni beka à ndùku mô te ghàhnà bime, ghàhnà ndùku bakhe yênà a ghàhnà yi bòn, biyani chin hì mô ma wu ti fî bakhi chya yâ. 12Tuku ti yû, bɨna ghɨ hì yula mihè bênà. Ghàhnà maka lê gha a bɨn a finana ma bɨlà lyi mwə̀ mù wòŋ me a ghɨ nô atɨ̂n nchwì. 13Ghàhnà hi fate khɨte ngɨŋsu ghàhnàsu te ghɨt ghe a ghɨ chyə atɨ̂n à yi bân. Kə ghàhnà hi kwoti nâbi ghə, nâbi afa, yə̂, kə ghàhnà hi dê lùkû kwola ghàhnà. Kə ghàhnà hi nê gha a tu fiŋa nì ngɨŋsu ghàhnàsu. Kə ghàhnà hi njaŋâ, kə ghàhnà hi ghə̂kà ghɨta. 14Ghàn bɨlà khɨtè kə chyənà yì fê ye a Bâba Jisòs Klistù tì fo ha ghàn ha mwə̀ mù yì wòŋ. Kə ghàhnà nè fo lumu na njyàsu wùnsu ghàhnàsu hi tihe ghàhnà, kwoti nâbi ghə te su kôŋà, yə̂.

Currently Selected:

Lumàns 13: bmv

Highlight

Copy

Compare

Want to have your highlights saved across all your devices? Sign up or sign in

Learn More About Ŋwàklù Fùyèn Kàn Mù Fê (Cameron)