Gokhini 2

Tum ha chìntê ghɨt a bimena a Efisùs

1Wù jîs kəbi ha mu na, “Nyàk ha anjèl à Fùyèn ye a yì mò a chìntê yì ghɨt a bimena a Efisùs na:

Tum yìna lo ha mu we a mu kəta jèn me sàmba a mu kpen wu wo ta, gbê fùtɨ̂n à mwə̀ afa a ghɨ fate nì gûl na ghɨ hi tomte lâmsù atɨ̂n. 2Mu khəlò fêt yani. Mu khə te ghàn fètà kwoka kə nâ nì jyaka nì təm a yutena, fê wunhê. Mu khə na ghàn de wi ghɨt a təm a be moŋ. Ghàn mômhè hi chwùtè banhî ghɨt ghe a ghɨna jìsà na ghɨna mò ghɨt a tuma ha Jisòs biyani bu. Yi chwûtè kəbi na ghɨna mò kə ghɨt a fəma. 3Mu khə na ghàn kwuta lò təma, yena sù ngə̂k, su dô kə ni kum mu, bota wi. 4Biyani, mu ngane ghàn kum gha yì mòk, yi mô na, ghàn fè kəta wi kôŋì ha mu te ghàn ndùku kəta ashyə̂. 5Ghàn kwakti lum we a ghàn chehì mô atɨ̂n ashyə̂, ma ghàn kahi təm ghana a ghàn a sùbe ma ghàn hi fêtà kə te ghàn ndùku fêtà. Ghàn ki faŋ hi nì ni, ma mu bê fihi shyə ghe a lâm sanisu mò a tô atɨ̂n. 6Gha jûŋì ye a ghàn nè mò na, ghàn bànàlò gha yile, mu boŋa bânà. Gha tɨni mô na ghàn bànàlò gha ghe a ghɨt ghe a ghɨ gbê a Nikolàs yi bàm nè.

7“À hì tofa nâbi nde, wu hi tôkà yute gha ye a Yohnà Yulena jìsà ha nôn à ghɨt a bimena. À ki nô yə nâbi nde be, ma mu ni ma wù hi kuta tamu fùkàk fe fu fo chyə, ləma a Yènfù à fùk.”

Tum ha chìntê ghɨt a bimena a Sɨminà

8Wù jis kəbi ha mu na, “Nyàk ha anjèl à Fùyèn ye a yì mò a chìntê ghɨt a bimena a Sɨminà na:

Tum yina lo ha mu we a mu mò Yìmi fê mô kəbi Gòkhi, a mô mu we a mu tì kpo, kaha hì chyə̂. 9Mu khəlò ngək se a ghàn yena. Mu khə na ghàn fufalò biyani mô ghɨt a chika. Mu khə gha a be ghe a ghɨt ghɨ̂n a ghɨ kama chwùtè na ghɨna mò ghɨt a Jûs ni, jìsà kum ghàn. Ghɨna mò à ghɨ̂t a Satàn a nòn. 10Ghàn yen! Kə ghàn hi fânà ngək ye a ghàn lye yênà atɨ̂n. Deblì nè nêlò na ghɨ khɨti ghàn ghɨ le ma lem a ndâ a chyâk, a mô kə yi mômhì te yi bênà ha ghàn. Ma ghàn nê yen ngə̂k afû a mu tuk ìwûm. Ghɨ hì mô nâbi hi ywe ghàn, ghàn hi samhe kə ha mu, shyəma mu nê fo chyə ye a yì bè mê wi ha ghàn, a mô shyə ghe a ghàn nò hi yə̂.

11“À hì tofa nâbi nde, wu hi tòkà yute gha ye a Yohnà Yulena jìsà ha nôn à ghɨt a bimena. À no yə nâbi nde be, ma wù bê tè fè kpo jə̀ kpu kumteni.”

Tum ha chìntê ghɨt a bimena a Begamòs

12Wù jis kəbi ha mu na, “Nyàk ha anjèl à Fùyèn ye a yì mò a chìntê ghɨt a bimena a Begamòs na:

Tum yina lo ha mu we a mu kəta fâ gbɨ̀liŋi ye a yi tofa. 13Mu khəlò luk we a ghàn chyə. Ghàn chyə wu lùk Satàn saka fə̂n wù wunu afû. Ghàn tì fati khɨti bimî yani, faŋ hi mana mu nâbi wu tuk afa ghɨ tì ywe Antibàs te wù ndùku jîsà kum mu yâ, ghɨ ywe wut à mù wù bimena wuna atɨ̂n, wu lùk afa a Satàn ndùku saka fə̂n wù wunu. 14Biyani, mu ngane ghàn a gha ale. Ghɨt ale mò afa jûmtè yiki Balàm. Wu tì yiki Balàk na wù hi nê ghɨt a Isalì na ghɨ hi yə mwə̀lû ma ghɨ fo ha mosòmù, fê chyə nì ywena makə lɨmànà, a kəta wi ghɨna. 15Ghàn kəta kəbi ghɨt ale ghɨ jûmtè yikî yi Nikolàs. 16Ghàn kahi təm ghana a ghàn a sùbe, bu ni, ghafa fè dâfà wi shyəma mu ben wu lùk afa a ghàn mò ma mu no ghɨt mu ghê nì fâ gbɨ̀liŋi ye a yi fwo a mu yi jwô.

17“À hì tofa nâbi nde, wu hi tôkà yute gha ye a Yohnà Yulena jìsà ha nôn à ghɨ̂t a bimena. À no yə nâbi nde be, ma mu bê fo shyə a yəna a letena ale ha wûn, ghɨ toŋte na manà, ma mu fo ti yi fufani yile ha wûn ma ghɨ ti nyak yet yi fe yile atɨ̂n, wùt khə wi, a bu kə wùt we a mu fo ti tɨni ha wûn.”

Tum ha chìntê ghɨt a bimena a Tìyàtilà

18Wù jis kəbi ha mu na, “Nyàk ha anjèl à Fùyèn ye a yì mò a chìntê a ghɨt a bimena a Tìyàtilà na:

Ghɨ̀na mò a gha ma à jis Wâ Fùyèn we se wuna mwântè te chwûtù wùstu yâ, wulu wunu njêntè kə ni te kaha jûŋà te ghɨ bâŋhè wu wùs. 19Mu khəlò fêt yani. Mu khə kôŋ ye a ghàn kəta nì bimînì, khə te ghàn fètà ha ghɨt ale, fê kwuta a təm. Ghàn fètà kə nâ chin chyâ te ghàn chehì fêtà ashyə̂.

20“Biyani mu ngane ghàn kum kə gha yin ni. Ghàn ti de Jesebèl a wùt wù ywên wuna a wù jìsà na yi mò fòktì wù chìk ni, wù lehe ghɨt a ma ghɨ fetana, yike ghɨna na ghɨna hi chyə̂ nì ywena, chyə̂ kəbi nì lɨmànà, a kəta wi ghɨna, fê yike na ghɨna hi yə mwə̀ mù yə̂mù ma ghɨ fo ha mosòmù. 21Mu fo yu na wù kahi təm yi wuni ma wù de besu wunsu biyani wù tunhî na yi wi hi dè. 22Ghàn hi khə na mu nè nêlò, ma wù yaf à nìŋe à faŋ a wu khɨ̀. Mu nè folò ngə̂k yì chìk ha ghɨt ghe a ghɨ chehì chyə nì wûn wu yu afa ghɨna faŋa hi kahe təm a ghɨna a sùbe afa ghɨna chehì nê ghê wûn. 23Mu nè ywitelò wana wuna, ma chìntisu ghɨt a bimenasu nâ sù jɨ̀m hi khə na à mò mu we a mu khə kwâktì tù ghɨ̂t tù, khə gha ghe ghɨ mô a ghɨna təm. Mu nè lâkà ghàn kə yi ghəl te nâbi nde chehì fêtà.

24“Biyani, ghàn ghɨ le mò a Tìyàtilà ma ghàn ti tunhî na ghàn jùmtè wi yikî wun mu yê, fî tunhi na ghàn nè chîntè wi a gha afa Satàn ghê jùmtìsu wunsu jìsà na à mò nâ a gha a letena a ta. Mu jìsà ha ghàn na, mu nè fê bufa kpenhe wi shyə ale ha ghàn. 25Mu jìsà kə na, ghàn fatè khɨti bimî yani hi bê tàn shyəma mu bê kahè ben.

26“À no yə nâbi nde be, hì nê kə a gha ghe a mu khɨŋa hi tàn a gòkhi, ma mu bê fo jyaka ha wûn ma wù hi saka lak tu. 27Wu nè hì saka ghɨta a tu lak afân kə nâ nì jyaka, gwôhè ghɨna kə nâ te ghɨ yè kûnà khɨŋa chyaka. À nè fo kə nâ mu jyak mɨ ghɨ̂n kəbi yi ghəl te Bom fo ha mu. 28Mu bè folò njênfù mbisìmbisi ha wùt mu we a wù no yə be.

29“À hì tofa nâbi nde, wu hi tôkà yute gha ye Yohnà Yulena jìsà ha nôn à ghɨt a bimena.”

Currently Selected:

Gokhini 2: bmv

Highlight

Copy

Compare