Hibùlùs 13

Chyənà ye Yènfù kòŋà

1Ghàn hi kôŋà ngɨŋ sanisu te wana ne. 2Kə ghàn yìta hi tè fate fye ghɨt a benana a ghàn a sù ndâ. Ghɨt ale tì fati fyi ghɨta, a mô yani, ghɨna khə wi na ghɨna fyi anjèlsu Fùyènsu. 3Ghàn hi kwâktè ghɨt ghe a ghɨ mô a ndâ chyâk, lyê na ghàn à ghɨna mò amok afû. Ghàn hi kwâktè kəbi ghɨt ghe a ghɨ yena ngə̂k, lyê na ghàn à ghɨna chìntè yena ngə̂k àtɨ̂n amok.

4Ghàn fatè khɨti gha ye a Yènfù jìsa kum malâ. Kə wùt bè de lɨm à wûn makə ywê wûn hi yè chyə̂ ghê wùt wù lò. Ghàn khə na Yènfù bè saka lò nâbi nde we a wù chyə a wu lum afân ma wù sak nâbi nde we wù chyə chyəna tu fiŋa.

5Kə ghàn hi lêmà chyâhè to yi gha wu ka. Ghàn hi bɨlà saŋle kə yi saŋlî nâbi nì ghə ghe a ghàn kəta beka Yènfù ti chwûnà na, “Mu bè de wi ghàn nâ hakoh.” 6Kum ni, ghàhnà làhi dɨ̂ŋhì jîsà na:

“Bâba mò gàmtè mì,

mu wijə hi tè fàn yi gha yile.

Wùt à mùsòŋ wijə hi nè yi gha yile ha mu.”

7Ghàn hi kwâktè ghɨt ghana ghɨ tihena ghe a ghɨ ndùku fôktè gha Fùyènì ha ghàn ha ashyə̂. Ghàn hi kwâktè chyəna ghe a ghɨna ndùku chyə nì lum we ghɨna tì kpo atɨ̂n. Ghàn sina chyəna ghɨna nì bimî yì ghɨna. 8Jisòs Klistù mò lan, kə yi ghəl te wù ndùku mô ashyə̂, mô hi tè mò kə yâ nâbi yini. 9Kə ghàn de na ghɨ hi lehe ghàn nì nâbi tɨni yikî tù. Yi jwôfà na təm a jûŋà Fùyènà nê ni təm ghana hi tâ, a bu tu sak te a ghàn lèmà kum mwə̀ mù yə̂mù. Sak mu tɨ̂n gàmtè wi ghɨt ghe a ghɨ lêmà nâ hakoh.

10Ghàhnà kətalò baŋ a yi fo, ngàŋ se a su fêtà a ndalà mù Fùyèn, lêmà tu saktu ghɨt a Jûs, ghɨna kəta wi jyaka hi yə mwə̀ mù yə̂mù me a Klistù fo afû. 11Ghàn khəlò na ngàŋ à ndâ Fùyèn yì ngaŋtena ndùku lyê luŋ mù nyàm hi sê, hi lyi nì munù wu luk afa a wu Yule kpene hi fo na Yènfù lehèfo besu ghɨ̂tsù, ghɨ lyi nyam àtɨ̂n ghɨ fwu a yi tèk afa ghàn chyə atɨ̂n shyəma ghɨ nyok. 12Yi ni mò kəbi yi ghəl te ghɨ tì lye Jisòs fwu nì wûn a yi tèk, wù yen ngə̂k kpu su yuhi besu ghɨ̂tsù nì luŋ mù wûn. 13Yi ni chwùtè na ghàhnà kətalò hi boŋa fwo a yi tèk hi yèn hi yen a wûn, hi khɨte kəbi wumînì ye a wù tì khɨte. 14Ghàhnà khəlò na tèk yile wijə a mbye afân shyəma ghàhnà chyə faŋ atɨ̂n. Ghàhnà baha ke yênà yi yên nì tèk yi tɨni, yi baha mô hi bè bèn. 15Ghàhnà hi fo lê fo, kokhe Fùyèn kə yu mù jɨ̀m tohne a Jisòs, a mô yi fo ye a ghàhnà ndùku fo nì jyesu ghàhnàsu fôktè na wù mò Bâba ha ghàhnà. 16Kə wùt bè chaha hi nè yi gha yi jûŋì ha wùt makə hi jyàtè shyə ghe a wù kəta hi fo wut wùlè. Gha mɨ ghɨ̂n mò ha Yènfù ni te a yi fô, yi nê na fu hi saŋlê.

17Ghàn hi ywo ghɨt ghe a ghɨ tihe ghàn, kə ghàn hi ta nì tu ha ghɨna. Ghɨna kine yi kina ghàn, mô hi bè tòkà fòktì ha Yènfù kum fêt mi yîn. Ghàn shìki ywo ha ghɨna, ma ghɨna hi nê fêt yi tɨni nì saŋlînì, ghàn shìki ta nì tu, ma ghɨna nê hi saŋle wi biyani ma yi nê tè gàmtè jə̀ ghàn.

18Ghàn hi jə̂mà ha ghàh. Ghàh khəlò na təm ghaha yule kə ni, ghàh khɨŋa kə hi tè nè yi gha ye a yi jwôfà kə yu mù jɨ̀m. 19Mu chyate lò na ghàn hi jə̂mà ha mu shyəma Yènfù ni ma mu kahà nyaŋhê bê yen ghàn.

Jə̂m yi gokheni

20-21Mu jə̀mà na Yènfù fo yutìnì ha ghɨta, ma fu fo nâbi ghə ghɨ jûŋà ha ghàn shyəma ghàn khɨli hi nè nâbi ghə ghe a fu khɨŋa. A mô wûn a Wu tì lòhe Bâba ghàhnà Jisòs a yi kpû, Jisòs mu wuna ndùku mô Chìn à sù bwû yì chìk, chin kum mu kân me a mù tì faŋa a yu mù jɨ̀m. Wù tì baŋ kàn muna nì luŋ mù wûn. Mu jə̀mà na Yènfù ni gha ye a yi kpene ha wûn a ghàn à wu wùn tohne a Jisòs Klistù. Kokhînì yen ha wûn ha yu mù jɨ̀m. Àmèn.

Hi gòkhì

22Mu chyate na ghàn fate khɨti gha ghɨ̂n a mu jìsà ni a wana noma. Mu tà nyak jə gha hi dù. 23Ghàn hi khə na ghɨ ti fihi wâ nè ghàhnà Timotì a ndâ chyâk. Wu ki nyâŋhè bèn, ma ghàh à wûn ben amok ma yen ghàn.

24Ghàn toŋti ghɨt ghana ghɨ tihena nì ghɨt a Fùyènà nâ à jɨ̀m. Ghɨt a bimena ghe a ghɨ chyə yi lak yi Italì chinhe toŋtînì ha ghàn.

25Yènfù chwuti təm a wuna ghɨ jûŋà ha ghàn nâ à jɨ̀m.

Currently Selected:

Hibùlùs 13: bmv

Highlight

Copy

Compare