Hibùlùs 1
1
Yènfù tî jis ha ghɨta tohne a Wâ wûn
1À ndùku mô a wu lɨ̀m wu chyalanu, Yènfù jis ha be ghàhnà tohne a fòktì su chiksu. Fu ndùku jîsà kə a tu lum a tu lûm, kə ghan a ghan. 2Biyani, à hì mô a mu tuk mù gòkhemù afân ma wù ti jis ha ghàhnà tohne a Wâ wûn. Yènfù hì mô ma fu ti lem na fu bè folò nâbi ghə a mbyî ha Wâ wûn, ma fu tì fati mbyî nì nâbi ghə atɨ̂n tohne kə a Wâ à wun mu wùna. 3Wâ wûn mu wùna banalò, chwûtè yi ghak yi kanani yi Fùyènì, fune Fùyèn kə gha à jɨ̀m. Jîs yi wuni kətalò jyaka, khɨti mbyî yìna yì jɨ̀m. Wù tì kpû su jîhì besu ghɨ̂tsù kaha kwok ndokò a Yènfù kpen wu wo ta a fe fu kəta jyaka kə a tô mwə̀ mù jɨ̀m.
Wâ Fùyèn ngaŋte chyâlò anjèlsu Fùyènsu
4Yi chwûtè na, Wan wùna ngaŋte chyâlò anjèlsu Fùyènsu, kəta kəbi yi Yet, yi ngaŋte chyâ a yet a anjèlsu tɨnsu. 5Yi mô kə nâ ni wu lum na anjèl à Fùyèn wijə ma Yènfù ti timi jis ha yinì na,
“Wò mò Wâ mù;
hi yìmì lân, mu nè hì mô Bì ha wò.”
Yènfù tà timi jis kum anjèl à wun na,
“Mu bè hì mô Bì ha wò,
wo mô Wan ha mu.”
6À ndùku mô kəbi te Yènfù ndùku khɨŋa hi tum a Wâ wun we a wù ngaŋte chyâ nâbi nde a mbyî, jis na,
“Anjèlsu Fùyènsu nâ sù jɨ̀m kəta hi tè kokhe wûn.”
7Fu tì shihi jìs kum anjèlsu wunsu jis na,
“Fu ni na anjèlsu wunsu hi mô kə ni te a fûf,
ghɨt a wuna fetana mô te chwû tù wùstu.”
8Biyani à ndùku mô te fu jîsà kum Wâ wûn, fî jis na:
“Fə̂n wa mò ma wu ti faŋ kə hamok a Yènfù!
Wò saka ghɨt gha kə chilichili.
9Wò kòŋà kə gha chilichili, bânà gha be.
A ni mò gha ye a Yèn fe a fu kəta wò ti chwok lem wò nì saŋlînì
ni na wò hi kokne chyâ
nâbi nde te ghàn à ghɨna mò.”
10Yènfù tì jis kəbi na,
“Bâba, à tì fati wò mbyî a yìmi,
fati mwə̀ me a mù mò a nyə̂.
11Mwə̀ muna a wò tì fate mô hi bè chyà mì.
Mwə̀ mù tɨ̂n bè mwuhe kəbi te sù nju biyani ha wò ma wò faŋ à kə amok.
12Wò bè bukne mwə̀ muna kə te njusu mwusu ma wò lem
ma wò lyi su fesu.
A mô ha wò ma wò faŋ à kə hamok,
bu hi bè kwunâ.”
13Yènfù tà tì jis jə ha anjèl à wun na:
“Ndòko a mu bàh a kpen wu wo ta
hi tân shyəma mu ni bànà sasu
hi mô mwə̀ me a wò tomte wulu wa a tô àtɨ̂n.”
14Yi ni chwùtè na, anjèlsu Fùyènsu mò kə yohnù te wu fêtà ha Yènfù, gâmtè ghɨt ghe a Yènfù mò hi bònhì.
Currently Selected:
Hibùlùs 1: bmv
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc.
