Gàlesiyà 1

1A nyàkà mu Bôl ŋwàklù yîn. Mu mô wut à tum teka à lem à ghɨ̂t. À tà chwok jə wùt mu. A chwok Jisòs Klistù mu ha wut wù tum ghê Yènfù, a Bì we a wù tì ne wù lôtì a yi kpû. 2Mu chinhe toŋtî yîn ghàh à wana ne ghe a ghɨ mô afân ha ghàn a nôn a ghɨt a bimena ghe a ghɨ mô yi lak yi Gàlesiyà.

3Yènfù, a Bì ghê Bâba ghàhnà Jisòs Klistù chwuti təm a jûŋà ha ghàn, ma wù fo yutìnì ha ghàn. 4Klistù tì fo ngɨŋ à wûn ha kpu kum besu ghàhnàsu bônhì ghàhnà a mbyî yì be afân, a mô kə yi gha ye a Yènfù, Bì ha ghàhnà ndùku khɨŋa. 5Kokhînì hi mô ha wûn a yû mù jɨ̀m. Àmèn.

Tum yì jùŋ yìlè fi wijə

6Mu mò nì kani na ghàn ti nyâŋhì kahi kə ni a yi bàm yi wùt we a wu tì toŋa ghàn kum təm a jûŋà Klistù, hì jûmtè yê nì tum yì lò. 7Mu jìsà wijə na yìna mò tum yì jùŋ. Mu jìsà na ghɨt ale bɨlà nê yi tof yani bu a jûŋ, mômhè hi fwəkte tum yì jùŋ yì Klistù. 8Biyani, nâbi wùt ha ghàh makə anjèl à Fùyèn ki fê fòktè tum, yi mô hanɨ̂ŋ atɨ̂n à ye a ghàh tì fòkte ha ghàn, Yènfù sûlì wùt àtɨ̂n. 9Ghàh che jis ha ghàn, mu wu hì fê jîsà kpenhe chin na, wùt ki fôktè tum yì lò ha ghàn, a bu ye a ghàn tì ywo ha ghàh, Yènfù sûlì wùt àtɨ̂n.

10Yi ni chwùtè chin na, mu nè yi gha ye a ghɨta khɨŋa ma, à ye a Yènfù khɨŋa agha? A ni mò na mu nè na ghɨta hi saŋle ma? Mu shìki khɨŋ kə hi tè nì na ghɨta hi saŋlê, ma mu hi fê bu wut wù Klistù wù fètana.

Te Bôl tì kahe ha wùt wù tum

11Wana noma, mu khɨŋa na ghàn hi khə na tum yì jùŋ ye a mu fòktè yì tà lo jə ha wùt. 12Mu tà tì yu jə tum mi yîn ha wùt, wùt tà tì yike jə mu nì gha yile. À tì chwuti Jisòs Klistù. 13Mu khəlò na ghàn tì yû chyənà ye a mu ndùku chyə te mu ndùku baha jûmtè chyəna ghɨt a Jûs. Ghàn khə te mu ndùku fo ngə̂k ha nôn à ghɨ̂t a bimena nâ haŋaŋ fê mômhè hi bobhe ghɨna. 14Mu ndùku khəlò hi chyə chyənà yì lak mi yîn chyâ ngwàk à mì yì dona, lêmà a tô atɨ̂n nâ haŋaŋ.

15Biyani, Yènfù tì chwok mu shyəma ghɨ bwɨ mu, toŋa mu kum təm a wuna a jûŋà na mu hi fêtà ha wûn. 16À ndùku mô te Yènfù kòŋa hi chwùtè Wâ wûn ha mu shyəma mu fokti tum yì jùŋ kum wûn ha tumu, mu tê yèn hi buf a yi gha ha wùt. 17Mu tà tì kwok jə nâ a Jèlusalèm hi buf a yi gha ha ghɨt a tuma ghe a ghɨ ndùku hì mô a mu ashyə̂. Mu bɨlì lo yen lumu a Àlabiyà, mu lo afû kaha ben kə a Dàmaskùs.

18Mu tì kwok a Jèlusalèm kə yi bàm wu lɨ̀m wu tât hi yen a Bità, ghàh à wûn chyə kwok a mu tuk njwòsù tân. 19Mu tà tì fî yen jə wùt tum wùlè afû a bu kə Jêms, a mô wâ nè Bâba. 20Gha yin a mu nyàkà ha ghàn ni mò kə nâ hamok. Yènfù khəlò na mu wama wijə fəmi! 21Mu tì lo afû yen wu lùk wule a Siliyà nì a Sìlisiyà. 22À ndùku mô yâ nôn a ghɨt ghe a ghɨ tì bime ha Klistù a Jùdiyà khə wijə mu. 23Ghɨna ndùku ywo kə yi yû gha te ghɨta ndùku jîsà kum mu na, “Wùt we a wù chehì chwoka wulu ghàhnà ashyə̂ yâ ti kahi hi tè fòktè yi gha kum kəbi yi bimî ye a wù chehì khɨŋa na yi mi.” 24Ghɨna hì bəmhe Yènfù kum mu.

Currently Selected:

Gàlesiyà 1: bmv

Highlight

Copy

Compare

Want to have your highlights saved across all your devices? Sign up or sign in

Learn More About Ŋwàklù Fùyèn Kàn Mù Fê (Cameron)