Fêt 20

Bôl kaha yen a yi lak yi Màsìdoniyà fî yen a Gɨlìs

1À hì mô te ngə̂k àtɨ̂n me, Bôl toŋa ghɨt a bimena yikî ghɨna hi nì na təm a ghɨna hi tâ, jis na ghɨna faŋ a jûŋ, lo yen a Màsìdoniyà. 2Wù tî gbê tohna tu lùk afû yike yênà ghɨta nì gha ghɨ dô kə ni hi nì na təm a ghɨna hi tâ, wù yen tan a Gɨlìs, 3chyə afû njoŋsù tât. À hì mò te wù lèma hi yèn a Siliyà yu na ghɨt a Jûs khɨŋa hi ywe wûn. Wù ki lêm na yi nè kaha yê chyâ lumu a Màsìdoniyà. 4Wù ndùku gbê ghê Sòbatà a wâ Bilùs a Bèliyà, nì Àlìstakùs, nì Sèkundùs ma ghɨna fwu a Tèsàlonikà kəbi nì Gayùs ma wù lo a Debì nì Tìkikùs nì Tìlofimùs ma ghɨna lo yi lak yi Esiyà kəbi nì Timotì. 5À ndùku mô te ghɨ yênà gbî mi yîn, ghɨt mɨ ghɨ̂n lo yen ashyə̂ hì yute ghàh yi tèk yi Tɨ̀luwàs. 6Ghɨ yen tan a Fìlibây ma tuk me ghɨ ndùku yə bana chɨmlana bu atɨ̂n ti chyâ, ghàh lye a ngwùk gbî a mu tuk mù tân kwoti ghɨna a Tɨ̀luwàs, ghàh à ghɨna chyə kwok afû ngàm.

Bôl yen yi gbî wuni yi gokheni, a Tɨ̀luwàs

7À hì mô wu yu kolô a tuk wu shyə a ngâm, ghàh yûŋtì hi yə̂, Bôl yîmì hi yike à ghɨ̂t, yiki ni, yen tan ntên ntuksu, beka tuku ndùku mô hi yû na wù lo. 8Lâmsù ndùku dô kə ni atɨ̂n à ndâ à nyə̂ ye ghàh tì yùŋte. 9Wan wù kpuŋ wùlè kwok ndokò a wundù yet yi wuni mô Yùtikùs. Bôl hì yikê, mbwunisu kwo wûn, wù bwuni kə ni ghâlì afû fen chwo a chyə̂. Ghɨta chwo hi lòhè wûn yen ma wù ti kpû. 10Biyani Bôl chwo yen ngumti fati lôhì wûn khɨtilò jis na, “Kə ghàn ji wù mò kə nâ wu tâ.” 11Yi bàm atɨ̂n Bôl ghê ghɨt atɨ̂na kaha kwok atɨ̂n à ndâ afa a nyə̂ chîntì yə tat à Bâba. Bôl fî yîmì hi yike ghɨna, yiki kə ni tuku yû, wù lô. 12Ghɨna lyi wan wù kpuŋ we wu mô kə nâ wun wu tâ ghɨna hì kolê. Gha mi yîn nî là mù ghɨna yutì nâ jûŋ.

Bôl lo a Tɨ̀luwàs yen Amìletùs

13Ghàh lye a ngwùk yen ashyə̂ yen fwo a Asòs wu lùk afa ghàh ndùku kəta hi lyè Bôl. Wù tì jis na ghàh ni ya, ma wù gbi nì wulu. 14À hì mô te wù bèna yen ghàh afû, ghàh à ghɨna lyi a ngwùk daŋ lyi yi tèk yi Mitìlîn. 15Ghàh yen tan afû fî lye a ngwùk gbî kə ni, à hì mô wu tuk wu kumtenu, ghàh chya yi lak yi Kiyòs. Tuku shihi fè yû, ghàh lyi yi lak yi Samòs, à hì mô a wu tuk wu kumtenu, ghàh yen tan a yi tèk yi Mìlitùs. 16À ndùku mô ni, ma Bôl ti lèm na yi nè chyâlà wi lumu a Efisùs beka wù ndùku kôŋà wi hi chyàhè wu yu yi lak yi Esiyà. Wù ndùku luŋa ni beka wù ndùku khɨŋa hi gbì hi lye a Jèlusalèm shyəma tuk wu chik we ghɨ ndùku toŋte na Bentikòs kpen.

Bôl jis, yi jîs yi wuni yi gokheni ha chəhsu ndâ Fùyènsu a Efisùs

17À ndùku mô ni te Bôl mò a Mìlitùs wù chinhi tum ha chəhsu ghɨt a bimena a Efisùs na ghɨna bê yen wûn. 18Ghɨna ben wù jis ha ghɨna na, “Ghàn khəlò te mu chehì chyə, fî fêt kwok lò a ghàn a fùtɨ̂n kə hi yìmì wu tuk afa mu tì bèna yi lak yi Esiyà.” 19Nâbi te ghɨt a Jûs ale chehì fate gha be kum mu fê fo ngə̂k ha mu nê na mu hi jyê, mu chehì nê fêt yi mi te wut wù fèt ha Bâba fê ngumle ha ghɨta nâ a yu mù jɨ̀m. 20Ghàn hi khə na mu tà timi hì yike ghàn a ghɨta fùtɨ̂n makə a ghàn a sù ndâ lêtà nâbi yìni gha tetani ye yi mô hi gàmtè ghàn. 21Mu ti kɨ̂n ha ghɨt a Jûs nì ha tumu na ghɨna kahi təm a ghɨna a sùbe ma kahà ben ha Yènfù, ma ghɨ bimi ha Bâba ghàhnà Jisòs Klistù.

22Mu yènà a Jèlusalèm chîn beka Yohnà Yulena khɨŋa na mu yen afû, mu khə wi na à nè yê gânà ghə ha mu afû agha, 23a bu kə te Yohnà Yulena hì mô ma ghɨ shyə fôktì banhi ha mu na nâbi yìni tèki ye mu tohna atɨ̂n na mu mò wut à ndâ chyâk, ngə̂k fê yute mu ashyə̂. 24Biyani à koŋ a gan nâbi ghə ha mu. Mu kəta hi nè mìhì fêt ye Bâba Jisòs che fo na mu ni. Fêt yi tɨni mô na mu fokti kum təm a jûŋà ghe Yènfù kəta ha ghɨta.

25Ghàn hi khə na mu chehì gbê a ghàn a fùtɨ̂n fôktè a gha kum fə̂n wù Fùyènù, jîsà ha ghàn chîn na, ghàn bè fê yena wijə mu nâ hakoh. 26Mu jìsà mihè kə yi mîhì ha ghàn lan na wùt ha ghàn ki njah wu lûm ma à nê hi fê bu gha mi, 27beka mu tà che let jə̂ gha yile ha ghàn kum gha ye Yènfù khɨŋa hi nì. 28Ghàn hi tôknè nì ngɨŋ sanisu nì ghɨt ghe Yohnà Yulena fo ha ghàn na ghàn hi tihe ghɨna. Ghàn hi tôknè nì nôn à ghɨt a bimena Fùyènà ghe Wâ wûn che kpo kum ghɨna hi nì na ghɨna hi mô ghɨt a wuna. 29Mu khəlò na mu lò chîn ma ghɨta nê ben a ghàn a fùtɨ̂n te nyamsu basu ma saŋ ghɨt a bimena ghɨ̂n, 30ma nâ ghɨta nê fwu a ghàn a fùtɨ̂n ma ghɨ hi wama fəmi, gûfà ghɨt a bimena na ghɨ hi jûmtè ghɨna. 31Ghàn hi tôknè nì ngɨŋ sanisu, fê kwâktè te mu chehì yike ghàn nchwì nì ntuksu a wu lɨ̀m afân wù tât, jyê kə nâ yi jî na ghàn hi fate khə Yènfù.

32Yènfù tòknèlò nì ghàn. Ghàn hi kwâktè tum ye yì mò kum təm a jûŋà ghe Yènfù kəta ha ghɨta, Yènfù gâmtè ghàn bonhe ghàn nì gha jûŋ ghe à kəta kə a ghɨt a wuna. 33Mu tà timi hì jyê hi tè kəta ka wûtù makə sùnju. 34Nâ ghàn à jɨ̀m khəlò a ghàn a sù ngɨŋ na nâbi ghə a mu chehì kəta nì ghɨt a ma ghɨ nònà chehì mô ma à fet kə mu nì wo mu. 35Mu ti chwûtì ha ghàn kə tu lum, a tu lûm na, ghàn kəta hi tè fèt nì jyaka kə te mu, hi tè gâmtè ghɨt a jiŋana. Ghàhnà shihi gàmtì ni, ghɨ hi kwâktè gha ye Bâba ghàhnà Jisòs tì jìsa nâ nì ngɨŋ à wûn na, “Yutìnì mò ha wùt we wù fo, chyâ wùt we wù fye kə yi fyî.”

36Bôl jis mihì ni, ghê ghɨna tum a lwî a chyə̂ jəm lò. 37Ghɨna yìmì à jɨ̀m hì jyê baŋle wun wûn jîsà na wu gbi a jûŋ. 38Ghɨna ndùku jîsà nâbi ni, saŋle wi kum gha ye wù ye jisa yâ na ghɨna bè fê yena wijə wûn. Ghɨna lyi wûn yen lem a ngwùk.

Currently Selected:

Fêt 20: bmv

Highlight

Copy

Compare