3 Jon 1

1À nyak mu chəh à ndâ Fùyèn ŋwàklù yina ha sô mù Gayùs we a mu kòŋà hamok. 2Mu jə̀mà na nâbi ghə hi yênà kə a jûŋ ha wò a sô mù, fê jə̂mà na wò hi mô kə nâ wu wun wu tâ kəbi wu lum afa a wò mô atɨ̂n à yohnà. 3Wana ne ghɨ le tì ben fôktì ha mu na wò nè kə nâ gha ye a yi mô hamok, time kə a tô gha afa a ghɨ mô hamok, mu hì saŋle nâ haŋaŋ. 4Gha yile wijə a yi mô hi nì, ma mu fê tokâ saŋli chyâ hi yu na mwəlà mâmù mò kə a tô yi gha afa a yi mô hamok.

Jon bəmhi Gayùs

5Wo fate nê kə nâ fêt ya ha wana ne a sô mù, nâbi wu yu afa ghɨna mò à ghɨ̂t wo khə wi. 6Ghɨna ti fôktì kôŋ ya ha nòn à ghɨt a bimena ghe a ghɨ mô afân. Mòmhi a jûŋ wu lum afa wu kokne a Yènfù ashyə̂, hi nì na gbî ghɨna jwof. 7Wò nè ni, beka ghɨna ti fwu hì gbê nê yênà nì fêt yi Klistù, nê ni, bime wi gâmtìnì ma yi lo ha ghɨta teka ghɨna bimi. 8Yi chwûtè na ghàhnà ghɨt a bimena kəta hi tè gàmtè nki ghɨ̂t mɨ ghɨ̂n kə nâ a jûŋ shyəma ghàhnà hi chîntè fêtà a tô gha afa a yi mô hamok.

Dàyotifìs ghê Dèmitɨliyùs

9Mu ti nyak ŋwàklù ha chìntê ghɨt a bimena, biyani Dàyotifìs we a wù kòŋà kə hi tê mò a tû, tunhi hi yute gha ye a mu jìsa atɨ̂n. 10Mu nè bênà nâbi yini ma mu fokti gha ghe a wù nè. Mu nè fôktèlò gha a bəmana ghe a wù jìsà kum ghàhnà nì fəm ye a wù wama. Wu nê ni, yi mê wi kə ni. Wu tunhe hi tè fye wana ne, fê tâmtè ghɨt ghe a ghɨ khɨŋa hi tè fyî, jûmà fihe ghɨna a nòn a ghɨt a bimena.

11Kə wò bè sine gha yi be a sô mù, wo bɨlà sine kə yi jûŋì. Nâbi nde we a wù nè gha yi jûŋì mò ghê Yènfù amok, we a wù nè gha be mò teka wù timè yen Yènfù.

12À bè nâbi nde jîsà kə a jûŋ kum Dèmitɨliyùs. Wu chyə kə nâ a jûŋ kə te gha Fùyènì ye a yi mô hamok chwùtè. Nâ ghàh boŋa jîsà kə a jûŋ kum wûn, wo khə na gha ye a ghàh jìsà kum wûn mò kə nâ hamok.

Toŋtî yi gokheni

13Mu kəta a gha hi jìs ha wò ghɨ dô kə ni, biyani kôŋà wi hi nyàk yi nyâk gha mɨ ghɨ̂n. 14Mu kwàktè hi bèn hi yen a wò kə a mu tuk afân. Mu bênà ma ghàh à wò biti gha atɨna kə nâ nì jwo.

15Yutìnì Fùyènì hi mô ha wò.

Sunsu ghàhnà se a su mô afân chinhe toŋtînì ha wò. Toŋti ha sun se a su mô afâ kə wù mòk wù mòk.

Currently Selected:

3 Jon 1: bmv

Highlight

Copy

Compare

Want to have your highlights saved across all your devices? Sign up or sign in

Learn More About Ŋwàklù Fùyèn Kàn Mù Fê (Cameron)

3 Jon 1

Popular Bible Verses from
3 Jon 1

Listen to 3 Jon 1

Bible:

Bum

Version: Ŋwàklù Fùyèn Kàn Mù Fê (Cameron) - bmv

3 Jon 1

3 Jon 1

Popular Bible Verses from 3 Jon 1

Listen to 3 Jon 1

Bible:

Bum

Version: Ŋwàklù Fùyèn Kàn Mù Fê (Cameron) - bmv

3 Jon 1

Popular Bible Verses from
3 Jon 1