2 Timotì 4

Bôl chyati na Timotì kwut təma

1Klistù Jisòs bê bênà te fə̀n ma wù sak ghɨt à jɨ̀m, ghe a ghɨ baha chyə nì ghe a ghɨ tì kpute. Kum ni, mu wu hì jîsà ha wò nâ nì jyaka, a Yènfù ashyə̂ nì Klistù Jisòs na, 2wò hi fôktè tum yì jùŋ ha ghɨta. Wo fôktè kə yi fôktì makə ghɨta kòŋàlò hi yû, makə ghɨ kôŋà wi. Wo chwûtè banhe gha ye a ghɨta nè bobhe, jîsà na kə ghɨna fi ni, chyate na ghɨna hi ywo gha mɨ ghɨ̂n. Wò shihi yike ghɨna, wò hi fate yike nì təm a yutena. 3Mu jìsà ni beka yu wu hì bakhe bênà, ghɨta nè hi yute wi yikî ye a yi mô hamok, biyani khɨŋa hi ywo gha ghe a ghɨna kôŋà, ghɨ hi gbê lyê bê nì chichà se a su nè bê yike gha mɨ ghɨ̂n ha ghɨna. 4Ghɨna ti de gha ye a yi mô hamok hì bɨlà yute màgân mù yîm. 5Ha wò, wò kəta hi khɨte ngɨŋ yâ, hi kwut a təm hi bèkà ngə̂k yâ hi tè fòktè yèn nì tum yì jùŋ fê nê fêt ya yì jɨ̀m te wut à Fùyèn wù fètana.

6Ha mu, mu hì mô ma mu hì fo yênà nì ngɨŋ à mì ha Yènfù te a yi fô. Yu mu kponu ti bakhâ. 7Mu ti nô kwok kə nâ a jûŋ. Mu ti nyiŋ tan te ghɨ khɨŋa, fî fati khɨti bimî mi. 8Mu hì yute kə maktu mu chyənà chilichili chîn. A Bâba ghàhnà we a wù saka ghɨta kə chilichili bè fo maktu mi wûn ha mu wu tuk wu gokhenu. Wù bè fo wi kə ha mu, wù bè folò kəbi ha ghɨt ghe a ghɨ chehì yute bên yi wuni yi chiki nì kôŋì.

Bôl chyati Timotì na wù ni gha ale ha wûn

9Mòmhi nâ nì jyaka hi nyàŋhè bèn hi yen a mu, 10beka Demàs ti kôŋ mwə̀ mù mbyî, tet de mu, yen a Tèsàlonikà. Kɨ̀lisèns ti boŋ lô yen a Gàlesiyà, Taytùs ti yen a Dàlàmàtiyà. 11À faŋ kə Lûk afân ghàh à wûn. Wò shihi bèn wo ben ghàn à Mâk shyəma wù nê hi gâmtè mu nì fêtì. 12Mu ti tum Tichikùs a Efisùs. 13Wò shihi bèn, wo ben nì nju samsu wafa sê a mu tì de a Kabùs nda a Tɨ̀luwàs yâ. Nâ kəbi nì ŋwàklù sam se a ghɨ lima yi lîm yâ, nâbi nì se a ghɨ fate nì gwusu nyâmsù yâ.

14Àlèksandà we wù twe mwə̀lû yâ che mom gha ha mu, yi bəma kə ni. Bâba nè folò ngə̂k ha wûn kum gha mi yê. 15Nâ wò a wo ngɨŋ boŋa kəta hi tè tòknà kum wûn beka wù chehì jîsà gha nâ ha jyak, ghɨ jwôfà wi kum tum yì jùŋ ye a ghàhnà yike. 16À hì mô te mu timi wu lùk wu saku hi jìs hi gàmtè ngɨŋ à mì a wu tuk wu shyə, ghɨta tet kə yi têt, nâ wùt tê fwo bèn hi tòk à mu. Mu jə̂mà na Yènfù lehèfo ghɨna te ghɨna che tet a de mu. 17Bâba tî time hi tòk à mu shyəma mu khɨti jyaka hi fòktè mihì tum yì jùŋ ha tumu wù jɨ̀m. Wù fî bônhì mu a yi kpû. 18Mu khəlò na Bâba nè fihelò mu nâ a sù ngə̂k sù jɨ̀m, ma wù fê lyi mu na mu fate gbi kə ni hi lye wu lùk wu wunu fə̀nù a nyə̂. Ghɨta hi kokhe wûn a yû mù jɨ̀m. Àmèn.

Bôl fo yi toŋtî yi gokheni ha ghɨt a bimena

19Toŋti ha Bìsilà nì Àkwɨlà nì ghɨt a Ònesfolùs ndâ ha mu. 20Èlastùs tì faŋ a yi tèk yi Kolèn. Mu che shihi lò, de Tìlofimùs a yi tèk yi Mìlitùs, wu yafâ. 21Mòmhi nâ nì jyaka hi bèn teka bɨ̀ŋ chwu.

Yùbulùs nì Budèns nì Lanùs nì Kɨ̀lodiyàs nâ nì ghɨt a bimena à jɨ̀m jis na mu toŋti ha wò.

22Bâba nè gàmtèlò wò. Yènfù nè chwùtè lò təm a jûŋà ghe ha ghàn à jɨ̀m.

Currently Selected:

2 Timotì 4: bmv

Highlight

Copy

Compare

Want to have your highlights saved across all your devices? Sign up or sign in

Learn More About Ŋwàklù Fùyèn Kàn Mù Fê (Cameron)