2 Timotì 2

Bôl jis na Timotì hi fêtà ha Klistù Jisòs kə hamok

1A mô ha wò a wâ mù Timotì, wo kəta hi tè tâ kum təm a jûŋà ghe a Klistù Jisòs tì chwùte ha wò. 2Wò ndùku ywo lò te mu ndùku yike a ghɨta ashyə̂. Wò kəta hi lyè yiki tɨni chîn hi lèm ha ghɨt a jûŋà wu wô, ma ghɨna hi gbê yike ghɨt ale.

3Wò kəta hi tè yen a ngə̂k te sojà yì jùŋ ye a yì ywo ha Klistù Jisòs. 4Nâbi yìni sojà mòmhè hi tè nè fêt yi wuni a jûŋ, hi nì na wùt wù chìk à wûn hi saŋlê. Wu lèmà wi ngɨŋ à wûn a yi gha yile, a bu fêt yi sojà. 5Wùt nyɨŋana wi hi nyɨŋ a yə̂, a bu kə na wù ti nyɨ̂ŋ te saktu nyɨŋ tu khɨŋa. 6À hì fêtà nâbi nde a wun a fùk nì jyaka, ma wù bê boŋà kpì kəbi ashyə̂. 7Kwàkti gha ghɨ̂n a mu jìsà ni, beka Bâba nè nêlò, ma wò ywo khɨli gha tɨna nâ à jɨ̀m.

8Wo kwâktè Jisòs Klistù te Yènfù tì lôhì wûn a yi kpu. Wu mô ma wù fwo a Defìt yi sah yi nda. Yìna mô tum yì jùŋ ye a mu fòktè. 9Mu yena ngə̂k, ghɨ fa mu te wut à ndâ à chyâk ni kə njwo mu yike tum yì jùŋ ha ghɨta. Biyani gha Fùyèn mi yîn mò ghɨ bu hi fà a chyâk. 10À mò kum gha mɨ ghɨ̂n a mu kəta hi tè kwut a təm kə a gha à jɨ̀m kum ghɨt ghe a Yènfù chwokte shyəma ghɨna bê khɨti bônì tohne a Klistù Jisòs hi khɨte kokhînì a yû mù jɨ̀m. 11Gha yîn a ghɨ jîsà ni mô kə nâ hamok na:

“Ghàhnà shìki mô ma ghàhnà ti kpû nì wûn amok,

ma ghàhnà bê kaha hi chyə̂ kəbi nì wûn amok.

12Ghàhnà shìki wunhe kə yi wunhî,

ma ghàhnà nì wûn bê hi saka mbyî.

Ghàhnà ki tunhi na ghàhnà khə wi wûn,

ma wù bê boŋà tunhi na yi khə wi ghàhnà.

13Ghàhnà ki fît a jɨ̀m ha wûn,

ma wù bê tè kwuna jə̀ a yi tô yi gha afa wù jìsa,

beka wù wi hi bè tunhe ngɨŋ à wûn.”

Bôl yiki lum we a Timotì nè hì fêtà atɨ̂n

14Wo yɨ̂ŋtè gha ghɨ̂n a mu jìsà ha wò ni ha ghɨta, chyàhi ha ghɨna te yi sâk a Yènfù ashyə̂ na, kə ghɨna hi gbê gufnà chyâ nì gha, yike a ghâ ghɨ kəta wi gâmtìnì. Gha mɨ ghɨ̂n gàmtè kə hi bobhe ghɨt ghe a ghɨ yute. 15Mòmhi nâ nì jyaka hi nì na Yènfù yen na wò mò wut wù fètana wù jùŋ, a we wù wume wi hi tè nè fêt yi wuni, fê fate yike kə hamok ye a yì mò a tum yì jùŋ. 16Kə wò hi yute jîs yi ngwoni ye a ghɨ jîsà a mbyî afân beka yi fo wijə kokhînì ha Yènfù. Nki tu jìs mi tɨ̂n nè kə na ghɨta de lum te a Yènfù khɨŋa. 17Jîs yi ghɨna mô te à jì ghe a ghɨ yè kuta mihè jyà wùt yi wùn, yima wi. Ghɨt ale ghe a ghɨ jîsà jîs mi yîn mò Hèmenìyùs ghê Filitùs. 18Ghɨna yike na Yènfù hì mô ma fu tì lôhì ghàhnà a yi kpû. Yikî mi yîn mô nâ yikî yi fəmi. Yi ti nî na ghɨt ale tunhi ma hi fê bime wi ha Klistù. 19Biyani yi ta hi nèkhè a chyə a nda ghe a Yènfù hì mô ma wù ti lêm. Ghɨ tì nyak atɨ̂n na, “Fu khəlò ghê a mò ghɨt a wuna,” fî nyak na, “Nâbi nde we a wù jìsà na yi jùmtè Bâba kətalò hi dè gha wuna ghɨ be ghe a wù nè.”

20Wò khəlò na, a nê hì mô a wùt wù chìk a ndâ, kaŋu dô kə ni. Wule mô ma ghɨ fate nì silbà, wule mô ma ghɨ fati nì kaha, wule mô ma ghɨ chwùf mu kâk, wule mô ma ghɨ bwəm nì chyaka. Ghɨ nê ghɨ lyi nki kaŋ we a ghɨ fate nì silbà makə nì kaha, ghɨ lem a mwə atɨ̂n wu yu afa ghɨ naŋhe gha, lyi wule we lem a mwə atɨ̂n nâbi wùni yu. 21À ki de nâbi nde gha be ma wù hi mô nì yulînì, ma Yènfù lyi wûn kə nâ ha kàntè wùt beka wù ti mâkà ngɨŋ à wûn hì mô kə nâ wut wù fètana ha wûn, gbùtè hi tè nì kə nâ fêt tu jûŋ tù jɨ̀m. 22Tet kahi a yi bàm a tu mômhì afa a tu fo ngə̂k ha ngwàk, mòmhi hi tè mò chilichili, bimi ha Klistù ma wò hi kôŋà ghɨta, fê chyə nì yutìnì. Wo nê gha mɨ ghɨ̂n nâ à jɨ̀m ghàn à ghɨt ghe a ghɨ jə̂mà ha Bâba nì təm a yulena. 23Kə wò nè yute jîs yi ngwò ye a yi fêtà wi gha. Wò khəlò na jîs mi yîn bè kə nì njaŋi. 24Wo khə na wùt wù fètana wù Fùyèn kəta wi hi tè njâŋ. Wù kəta hi tè bonâ nâbi ha nde fê fate yike ghɨta kə nâ a jûŋ, kəta yi wunhî, 25tihe ghɨt ghe a ghɨ khɨmne gha ye a wù jìsà nì yutìnì, khə na Yènfù nè nêlò ma ghɨna kahi təm a ghɨna a ghɨna sùbe ma kahà hi khə gha ye a yi mô hamok. 26Ghɨna hì mô ma ghɨ ti fên a deblì a tâm hì nê fêt yi wuni, ma wò ki nî ni ma Yènfù làhi nì ma tof wu ghɨna kahà ben, ma ghɨna tet à fwu a tam afû.

Currently Selected:

2 Timotì 2: bmv

Highlight

Copy

Compare