2 Tèsàloniyàns 2

Wùt à təm a be

1Ghàh khɨŋa hi jìs ha ghàn kum kə bên yì Bâba ghàhnà Jisòs Klistù, kəbi te ghàhnà nì wun bè hì chîntè mô amok. Ghàh chyate ghàn a wana ne na, 2kə ghàn nê dê ghɨt ghe a ghɨ jîsà na tuk we a Bâba mò hi bè bèn atɨ̂n hì mô ma wu ti bên, chiŋhe ghàn fê bɨla nì tu wanu. Gha mi yina làhi tè mò ma à jis wut, mô na yì fòktè tum ma yì lo ha Yènfù, yu wule ma yì hi mô ma yi fwo yi yikî yile, yu wule ma yi hi mô ma wùt fòkti jis na yi fwo a ŋwàklù ma a nyak chinhi ghàh ha ghàn. 3Kə ghàn de na wùt lehi ghàn nâ hakoh beka tuk wu tɨnu bè bê wi a bu na ghɨt a dona bê hi ta nì to ha Yènfù, ma wùt à təm a be fwo timi. Yènfù bê mihi wùt a təm a be mu wuna wu lùk wu wùsu. 4Wùt wù be mu wuna bè fwo ma wù no yèn mùlè nâbi nì gha ghə a ghɨta ngumle, hi chwùtì na yi ta chyâlò yèn mù tɨ̂n. Ma wù bê yê lyê ndoko a ndâ Fùyèn yì chìk ma wù hi jîsà na à mò kə nâ yi Fùyèn.

5Mu khəlò na ghàn baha kwàktèlò te mu ndùku jîsà gha mɨ ghɨ̂n ha ghàn te ghàhnà ndùku baha mô amok. 6Nâ ghàn khəlò gha ye a yi tàhè na kə wùt a gha a be mu wuna fwo timi chîn. Wù bè fwo time kə wu yu afa Yènfù khɨŋa. 7À mò nâ chin ni ghɨ nyamte fètà hi nì na ghɨta hi tunhe Yènfù. Gha ye a mu jìsà nè gânà mihè wijə a ndan, a bu kə na Yènfù ti chyâkhì wùt we a wù mò a wu lum chin tâhè na kə gha mɨ ghɨ̂n gan. 8Ghɨ chwûtì wùt mu wuna a ndan ma a ni wùt a təm a be. Bâba Jisòs bè bênà nâbi wùni tuku ma wù ywî wun nì yuksu ma su fwo a wun a yi jwô, kəbi nì ban yi chiki wuni. 9Wùt a gha a be mu wuna bè bênà nì jyaka, ma à fo Satàn ma wù hi kama nê gha a kanana ale, chwùtè chwesu fəmsu su lesu ha ghɨta. 10Wù bè hì kəta təm a be, jɨ̂ŋhè ghɨt ghe a ghɨ kəta hi kputî, kə a tu lum tu dô kə ni. Ghɨna bè kpute beka ghɨna tà tì koŋ jə hi ywo tum ye a yì mò hamok kum Bâba ghàhnà shyəma Yènfù bonhi ghɨna. 11A ni gha ye a yi bè nê na Yènfù jɨŋhi ghɨna ma ni na ghɨna hi bime gha a fəma, 12ma wù fê sak à bobhi ghɨna ghe a ghɨ tunhi hi bime tum yì jùŋ ye a yì mò hamok nâ à jɨ̀m hì kôŋà kə gha a be.

Ghàn fatè timi a ghàn a yi bimî

13Ghàh kəta hi tè fo àyòŋnà ha Yènfù kə yû mù jɨ̀m kum ghàn a wana ne. Bâba ti kôŋ ghàn, ghàn hì mô a nòn a ghɨt ghe a fu chwoka kə ha yìmi hi bònhì tohne yi fèt afa a Yohnà Yulena tì ne hi lèmà ghàn nì yulînì, fê tohne yi bimî afa a ghàn kəta kum a gha ghe a ghɨ mô hamok. 14Yènfù tî toŋa ghàn tohne a tum yì jùŋ afa a ghàh tì fòkte ha ghàn shyəma ghàn ben ma ghɨ hi boŋa kəta ghak ye a Bâba ghàhnà Jisòs Klistù kəta. 15Ghàh wu hì jîsà ha ghàn a wana ne na, ghàn khɨti bimî yani, kə ghàn bimi na wùt ni ma ghàn de yiki hamok ye a ghàh tì yike ha ghàn, fî nyak ha ghàn a ŋwàklù.

16Bâba ghàhnà Jisòs Klistù nâ nì ngɨŋ à wûn ghê Bè ghàhnà Yèn fe a fu kôŋà ghàhnà ti ni na ghàhnà hi kəta təm a yutena kə yu mù jɨ̀m, fê khə hamok na ghɨ bè khɨte lò mwə̀ me a wù chwùne kum təm a jûŋà wuna. 17Fu nê na ghàn hi kəta təm a yutena nì jyaka hi tè nè gha a jûŋà fê jîsà kə gha a jûŋà yu mù jɨ̀m.

Currently Selected:

2 Tèsàloniyàns 2: bmv

Highlight

Copy

Compare

Want to have your highlights saved across all your devices? Sign up or sign in

Learn More About Ŋwàklù Fùyèn Kàn Mù Fê (Cameron)