1 Tèsàloniyàns 5

Ghàn hi gbûtè, yute tuk we a Bâba bè kaha bênà atɨ̂n

1Yi kəta wi nâbi fêt yile shyəma ghàh nyak à fokti ha ghàn a wana ne na à mò wu tuk makə wu yu we a Bâba bè kaha bênà atɨ̂n. 2Ghàh jìsà ni njwo nâ ghàn khəlò a ghàn a sù ngɨŋ na, tuk we a Bâba bè kaha bênà atɨ̂n bè kpenalo, wùt khə wi, kəbi ni te wùt wù chwoŋana yè bênà ntuksu. 3Ghɨta bè hì jîsà na, “Yutìnì làwû, ngə̂k wijə,” ma ngə̂k bûŋhè ben ha ghɨna bəma kə ni kəbi te yi nê hi mô ha wùt ywên wu yu wu bwənu. Nâ wùt bè teta wi. 4Ghàn mò ni a wana noma bu te ghɨt ghe a ghɨ chyə atɨ̂n à yi fîn shyəma Tuk wu Bâba mu wuna bê buŋhè ben ha ghàn ni te wùt wù chwoŋana, 5njwo nâ ghàn à jɨ̀m chyə chyənà yì jùŋ te ghɨt ghe a ghɨ nê gha chwì banâ. Ghàhnà nè wi gha ni te ghɨ nê a lèt makə a bɨn a finana. 6Te gha tɨni hì mô ni, ghàhnà kəta wi hi tè chìnà bwuni kə ni te ghɨt ale, ghàhnà kəta hi tè bɨlà mô, gbûtè fê khɨte ngɨŋsu ghàhnà su, 7beka ghɨta yè bwune kə ntuksu, ale nyô, mu lûk mu kwo ghɨna kə ntuksu. 8Ghàhnà hi bɨlà nê gha chwì banâ. Yi ni chwùtè na ghàhnà kəta hi tè khɨte sù ngɨŋ. Ghàhnà kəta hi tè samhe Fùyèn, hi tè kòŋà wûn, kôŋà ghɨta shyəma yi hi chwûtè na ghàhnà ti mak kôŋì nì bimînì yina te shyə hi khɨ̀ŋtè wu wun wu ghàhnà atɨ̂n, na kwâktì ye a ghàhnà kəta na Yènfù bè bônhèlò ghàhnà hi mô te shyə te ghàhnà so hi khɨ̀ŋtè tu ghàhnà nì ghɨna. 9Ghàhnà kəta hi tè khɨ̀ŋtè ni beka Yènfù tà tì chwok jə ghàhnà afân hi fo ngə̂k ha ghàhnà. Fu tì ni ni shyəma Bâba ghàhnà Jisòs Klistù bonhi ghàhnà. 10Wù tî kpû kum ghàhnà shyəma ghàhnà nì wûn bê hi mô amok a wu yu afa wù kaha bena, makə ghàhnà mò wu tâ, makə ghɨ ti kpû. 11Kum ni, mu wu hì jîsà na, ghàn hi fo təm a ta ha wana ne ghana, gâmtè ghɨna nâbi te ghàn hì gâmtè kwoka kə nâ chîn.

Bôl fo yi toŋtî yi gokheni

12Wana ne, ghàh chyate na, ghàn hi fate ngumle ghɨt ghe a ghɨ fêtà a ghàn a fùtɨ̂n ni te wu tû a nòn a ghɨt a bimena. Ghɨna tihe ghàn fê tôknà nì ghàn. 13Ghàn hi kôŋà ghɨna fê ngumle ghɨna nâ a jûŋ kum kə gha à jɨ̀m afa a ghɨna nè ha ghàn. Ghàn hi mô nì yutìnì kə yû mù jɨ̀m.

14Ghàh chyate kəbi ghàn a wana ne na, ghàn fo tobhînì ha ghɨt ghe a ghɨ kòŋà wi hi tè fèt, ma ghɨ nî na ghɨna hi fêtà kəta təm a ta, ghàn gâmtè ghɨt ghe a ghɨna khɨŋa gâmtìnì. Ghàn hi kəta wunhînì nâbi ha nde. 15Kə wùt ha ghàn hi fîsè be nì be, ghàn hi mômhè hi tè nè gha a jûŋà ha ngɨŋ sanisu, fê nê ha ghɨt à jɨ̀m. 16Ghàn hi mômhè hi tè saŋlî kə yû mù jɨ̀m, 17jə̂mà ha Yènfù kə yû mù jɨ̀m. 18A ne gan nâbi ghə, ghàn hi fo kə àyòŋnà ha Yènfù. A ni gha ghe a Yènfù khɨŋa na ghàn hi nê beka ghàn à Klistù Jisòs mò amok.

19Kə ghàn hi tàhè fêt ye a Yohnà Yulena nè a ghàn a fùtɨ̂n, 20makə tunhe tum ye a ghɨta fòktè ha ghàn ma yì lo ha Yènfù. 21Ghàn hi bɨlà fate kine nâ gha à jɨ̀m hi yen nâ, ghɨ lo kə nâ ha Yènfù agha. Ghàn yen ghɨ mô hamok, ghàn bimilò, 22ghàn yen ghɨ bu hamok, ghàn tunhilò. 23Yèn fe a fu fo yutìnì ha ghàhnà ni ma ghàn hi mô nì yulînì nâbi wùni lumu, ghàn lem chyənà yanì nì yohnà ghana nì wun wanu, ma wùt bê tè ngane jə̀ ghàn a yi gha nâ hakoh wu tuk afa a Bâba ghàhnà Jisòs Klistù kahà bênà. 24Yènfù tì toŋa ghàn na ghàn hi mô ghɨt a wuna, ghàh khə na ghàn hi mô kə yâ beka fu tà timi jis jə gha, faŋ hi nì. 25Wana ne, ghàn hi jə̂mà ha ghàh.

26Ghàn toŋti wana ne nâ à jɨ̀m kə nâ wu lum afa yi chwûtè kôŋ yi ghɨt a bimena. 27Mu chyate ghàn a Bâba a jyak na ghàn taŋ ŋwàklù yina ha ghɨt a bimena nâ à jɨ̀m.

28Bâba ghàhnà Jisòs Klistù chwuti təm a jûŋà a wuna ha ghàn.

Currently Selected:

1 Tèsàloniyàns 5: bmv

Highlight

Copy

Compare

Want to have your highlights saved across all your devices? Sign up or sign in

Learn More About Ŋwàklù Fùyèn Kàn Mù Fê (Cameron)