1 Bità 4

Hi tè chyə chyənà hanɨ̂ŋ

1Te ghàhnà hì khə na Jisòs Klistù tì yen ngə̂k a chyak a wùna, ghàn hi boŋa kəta kə kwâktì ye a wù ndùku kəta, gbùtè hi yen a ngə̂k beka à yena nâbi nde ngə̂k a chyə afân te Klistù, ma wù bê tè fè nè be. 2Wù nè ni, ma wù bê tè fè chyə̂ te njyàsu wùnsu khɨŋa, ma wù hi chyə̂ kə te Yènfù khɨŋa. 3Ghàn hì mô ma ghàn ti bobhi yu wu donu, chyə chyənà ye a ghɨt ghe a ghɨ khə wi Yènfù kòŋà. Ghàn ndùku chyə chyəna liŋa, fwo nì se, ghàn nyo lùkû mu kwo ghàn, ghàn yen wu lùk wu yənu, ghàn hi nê kə te sù bû. Ghàn kokhe mosòmù, sak yi Fùyènì bime wi. 4Chin hì mô ghɨt ghe a ghɨ khə wi Yènfù mô nì kani na ghàn fè yə wi ghàn à ghɨna, fê chyə̂ wi chyənà yì be yì ghɨna mi yê. Yìna ti ni, na ghɨna kahè hi sûlè ghàn. 5Biyani, tuku kwoka bênàlò shyəma Yènfù sak kə ghɨt à jɨ̀m, saka ghɨt a ta saka ghɨt a kputena. Ghɨna bè taŋlelò jwo yi ghɨna ha wûn. 6A ni gha ye a ghɨ tì fòkte tum yì jùŋ nâbi ha ghɨt ghe a ghɨ tì kpute. Yènfù hì mô ma fu ti sak ghɨna wu tuk afa ghɨna baha chyə a chyak a wùna kə yi ghəl te fu saka ghɨt à jɨ̀m. Ghɨ tì fôktì tum yì jùŋ mi yìna ha ghɨna shyəma ghɨna hi chyə a yohnà kə te Yènfù khɨŋa.

Ghàn hi fate khɨte fo Fùyènì

7Ghàn hi fate khɨte ngɨŋ sanisu, fê gbùtè hi tè jə̀m beka gokhi mbyî ti bakhâ. 8Nâ gha yi ta mò na ghàn hi kôŋà ngɨŋ sanisu beka kôŋì nèlò, ghɨ lêhèfo besu, su dô kə ni. 9Ghàn hi fate fye wana ne ghana a ghàn a sù ndâ, fye kə nâ nì təm à mòk, dûmlè wi. 10Yènfù ti bônhì ghàn fo tu fô kə tu nkì a tu nkì. Yi ni chwùtè na nâbi nde ni kəta hi tè lyè fo wuni ye a Yènfù fo nê jùŋ ha ghɨt ale atɨ̂n ni te ghɨt a fetana a Fùyènà jûŋà. 11Wùt hì fôktè gha yi Fùyènì, wu hi fôktè kə nâ gha ye a yi lo bena ha Yènfù. Wùt hì mô wut wù fètana, wu hi fêtà kə nì jyak ghe a Yènfù fo ha wûn. Ghàn hi nê kə ni shyəma ghɨta hi kokhe Yènfù tohne a Jisòs Klistù we a wù kəta kokhînì nì jyaka a yu mù jɨ̀m. Àmèn.

Hi tè yena ngə̂k te wut wù bimena

12Sun samsu, kə ghàn hi mô nì kani wu yu afa mômhìnì yi bəmani bènà ha ghàn. Gha mi yin ni gànà kə hi mòmhè yi bimî yani. Kə ghàn hi lyê gha tɨni ha yi gha yi fe. 13Ghàn hi bɨlà saŋlê na ghàn boŋa yena ngə̂k kəbi te Klistù shyəma wù bê kahà ben a wun atɨ̂n à yi ban yi chiki, ma ghàn hi saŋlê nâ haŋaŋ. 14Ghɨta shìki sûlè ghàn kum te ghàn mò jùmtìbàmsù Klistù, ghàn hi saŋlê kə yi saŋlî beka yìna chwùtè na Yohnà a kanana a mô Yohnà Fùyènà mò ha ghàn. 15Kə wùt ha ghàn bê hi yena ngə̂k na wù ywi wût, makə wù chwoŋlò, makə wù ni gha yi be, makə wù lihi jwo wuni a wùt à yi ghâ. 16Biyani, wùt ha ghàn hì yena ngə̂k beka wù jùmtè Klistù, kə wù hi wumê, wù hi bɨlà kokhe kə Fùyèn beka wù ti bime a Klistù yì yet.

17Yi mô ni beka yu ti kpên shyəma Yènfù sak mbyî, wu mô hi yìmì nì ghɨt a wuna, ma fu ki bɨlà yìmi hì saka ghàhnà ashyə̂, ma yi hi bəma nâ haŋaŋ ha ghɨt ghe a ghɨ bime wi tum yì jùŋ?

18“Yi shìki ta ha ghɨt a jûŋà hi bòn,

ma yi bê hi mô nâ yàni ha ghɨt a be ghe a ghɨ khə wi Yènfù?”

19Yi ni chwùtè na ghɨt ghe a ghɨ yena ngə̂k, a mô yi kôŋ yi Fùyènì, kəta hi faŋ hi tè nè kə jùŋ, hi fè fo ngɨŋsu ghɨna su ha Yènfù beka à fati wun ghɨna. Fu nê nâbi ghə ghe a fu chwune.

Currently Selected:

1 Bità 4: bmv

Highlight

Copy

Compare