Уэрэд 70
70
70-нэ Уэрэд
ЛӀыжьым и тхьэлъэӀу
1Уэ, ди Тхьэ, щхьэегъэзыпӀэ узощӀ,
емыкӀу къызомыгъэхь игъащӀэкӀэ!
2Уэ щыпкъагъэу уиӀэмкӀэ
хьэзабым сыхэшыжи, сыкъегъэл.
Уи тхьэкӀумэ къысхуэгъази, хьэзабым сыхэшыж.
3Сыкъэзыхъумэ мывэбг быдапӀэ лъэщ
къысхуэхъу,
сыту жыпӀэмэ Уэращ
егъэзыпӀэуи быдапӀэуи сиӀэр.
4Си Тхьэ! ЦӀыху бзаджэхэм,
мызахуэхэм, залымхэм саӀэщӀэх.
5Сыту жыпӀэмэ Уэращ, Зиусхьэн,
сызщыгугъыр,
си цӀыкӀугъуэм щыублауэ си дзыхьщӀэгъур.
6Сыкъыщалъхуам щегъэжьауэ,
Уэращ сэ къысщӀэӀэр;
си анэ и ныбэ сызэрырищӀэ лъандэрэ
укъысхуэгумащӀэщ#70:6 укъысхуэгумащӀэщ – евреибзэкӀэ и мыхьэнэ ӀупщӀкъым..
Уэ щӀыхьу пхуэсщӀыр зэпыункъым.
7Сэ бэм щапхъэ сахуэхъуащ;
Уэ щхьэегъэзыпӀэ щыпкъэ усхуэхъуащ.
8Си жьэкӀэ сыпщытхъу зэпытщ,
Уи щӀыхьыр зэпымыууэ соӀуатэ
махуэ енкӀэ.
9Си жьыхъугъуэм сыхыфӀомыдзэж.
Си гуащӀэм кӀэрич щыхъукӀэ
си закъуэу сыкъыумыгъанэ.
10Сыту жыпӀэмэ псалъэ гуауэхэр
сэр папщӀэ яӀуатэ си бийхэм,
си псэм къещэхэр зэрогъэӀущыж.
11«Ар Тхьэм къибгынащ, – къысхужаӀэ, –
фылъежьи, къэвубыд,
абы къыщхьэщыжьын иӀэкъым».
12Си Тхьэ! Спэжыжьэ зумыщӀ.
ДэӀэпыкъуэгъу укъысхуэхъуну
псынщӀэу къэс си деж, си Тхьэ.
13ЕмыкӀу кърырехь,
ирекӀуэд бий зыкъысхуэзыщӀхэр;
сызыгъэунэхуну хуейхэм
я напэ трекӀ, мыгъуэ ирехъу!
14Сыт щыгъуи сыпщыгугъынущ Уэ,
щӀыхьу пхуэсщӀым хэзгъэхъуэнщ.
15Махуэ къэси сӀуэтэнщ сэ
Уэ пхэлъ щыпкъагъэри,
дымыкӀуэду дыкъебгъэлын папщӀэ къытхуэпщӀахэри,
я бжыгъэ плъытэн плъэмыкӀынуми.
16Уэ, Зиусхьэну ди Тхьэ, уи унэшхуэм сыщӀыхьэнщ,
Уи ӀэщӀагъэшхуэхэм, уи щыпкъагъэм
я щӀыхьэр дэни щысӀуэтэнщ сэ.
17Си цӀыкӀугъуэм щегъэжьауэ
сыбоущий Уэ, ди Тхьэ,
уи ӀэщӀагъэ телъыджэхэр
иджыри къэс соӀуатэ.
18Жьы сыхъуху, си щхьэр тхъуху,
сумыбгынэ Уэ, ди Тхьэ,
мы щӀэблэми къыкӀэлъыкӀуэну щӀэблэхэми
уи гуащӀэмрэ лъэкӀыныгъэ ину уиӀэмрэ
зыхуэдэр яхуэсӀуэтэху.
19ГуащӀэу пхэлъри щыпкъагъэу уиӀэри
уафэхэм нэсащ, ди Тхьэ.
Ӏуэхугъуэшхуэхэр зэфӀэпхащ Уэ;
Ди Тхьэ, хэт хъун Уэ пхуэдэ?
20Шэчыгъуейуэ, тхьэмыщкӀагъэ куэдыр
Уэ къысхуэбгъэкӀуащ сэ,
ауэ щӀэрыщӀэу сыкъэбгъэпсэужурэ,
щӀым и кууупӀэм сыкъыщӀэпшыжынщ.
21СыпӀэтынщ Уэ лъагэу,
гупсэхугъуэ къызэптыжынщ.
22ПшынэкӀэ сыдежъууэ,
Уэ щӀыхь пхуэсщӀынщ,
щыпкъагъэу къытхууиӀэм и щӀыхь,
си Тхьэ, шыкӀэпшынэм
уи щӀыхь уэрэд сэ къизгъэкӀынщ.
Израилым и Тхьэ лъапӀэ!
23Макъ лъэщкӀэ уэрэд пхужысӀэ щыхъукӀэ,
си Ӏупэр гуфӀэм зэлъещтэ,
си псэу къебгъэлари аращ.
24Бзэуэ сӀурылъым махуэ енкӀэ
уи щыпкъагъэр иӀуэтэнщ,
сыту жыпӀэмэ мыхъун къызащӀэн
зыфӀэигъуэхэм емыкӀу къатехуэурэ,
я напэр текӀащ абыхэм.
Currently Selected:
Уэрэд 70: KbdNTGP2017
Highlight
Copy
Compare
Share
Want to have your highlights saved across all your devices? Sign up or sign in
© Библиер зэдзэкӀыным елжь Институт, 1993, 2007, 2011, 2017
