1 Мусэ 7
7
1ЖриӀащ Зиусхьэным Нухь:
– Фихьэ уэри уи унагъуэри кхъухьым; сыт щхьэкӀэ жыпӀэмэ уэращ Си дежкӀэ пэжыгъэ зезыхьэу нобэрей цӀыхухэм яхэслъэгъуар. 2Здэщтэ сыт хуэдэ псэущхьэ къабзэми щыщу блырыбл, зэхъузэбзу, псэущхьэ мыкъабзэм щыщу тӀурытӀ, зэхъузэбзу. 3Апхуэдэуи къуалэбзухэм ящыщу блырыбл, ахэри зэхъузэбзу, абыхэм я лъэпкъыр щӀылъэ псом къытенэн папщӀэ.
4– Сыт щхьэкӀэ жыпӀэмэ махуибл дэкӀмэ, Сэ ескӀыхынущ щӀылъэм уэшхыр махуэ плӀыщӀрэ жэщ плӀыщӀкӀэ; икӀи тезгъэкӀуэдыкӀынущ щӀыгум Сэ къэзгъэщӀауэ щыӀэ псэущхьэ псори.
5Нухь игъэзэщӀащ Зиусхьэным къыхуигъэува унафэ псори.
Тхьэм и тезыр – псыдзэр
6Нухь илъэс щих хъурт псыдзэм щӀылъэр щызэщӀищтам щыгъуэ. 7Псыдзэм хэмыхуэн папщӀэ, Нухь и къуэхэри, и фызри, и къуэхэм я фызхэри щӀыгъуу кхъухьым ихьащ. 8Псэущхьэ къабзэхэми псэущхьэ мыкъабзэхэми ящыщу, бзухэми, хьэпщхупщ псоми ящыщу 9тӀурытӀ, псори зэхъузэбзу, ихьащ кхъухьым, Тхьэм Нухь къызэрыхуигъэувам тету.
10Махуибл дэкӀри, псыдзэр къиуащ щӀылъэм.
11Нухь илъэс щих щыхъуа гъэм и етӀуанэ мазэм, епщыкӀубланэ махуэм къызэрыкӀащ щыхупӀэ лъащӀэншэ абрагъуэм и къиупӀэу хъуар, зэӀукӀащ уафэ щхьэгъубжэхэри.
12Тешхащ щӀылъэм уэшхыр махуэ плӀыщӀрэ жэщ плӀыщӀкӀэ.
13А махуэ дыдэм ихьащ кхъухьым Нухьи и къуэхэу Щэми, Хъами, Ефэти, Нухь и фызри, и къуэхэм я фызищри я гъусэу. 14Ахэр кхъухьым ихьащ хьэкӀэкхъуэкӀэ псори езыхэм я лъэпкъыу, сыт хуэдэ Ӏэщхэри езыхэм я лъэпкъыу, хьэпщхупщ псори езыхэм я лъэпкъыу, лъатэ псори езыхэм я лъэпкъыу, къуалэбзу псори, дамэ зытет псори я гъусэу. 15Ихьащ Нухь и кхъухьым псэ зыӀут псэущхьэ лӀэужьыгъуэу щыӀэу хъуам щыщу тӀурытӀ. 16Аращи, сыт хуэдэ псэущхьэми щыщу хъурэ бзырэ ихьащ кхъухьым Тхьэм Нухь къазэрыхуигъэувам тету.
ИтӀанэ Зиусхьэным кхъухьым и бжэр абыхэм якӀэлъыхуищӀыжащ.
17Псыдзэр телъэдащ щӀылъэм махуэ плӀыщӀкӀэ, псым къыхэхъуэурэ кхъухьыр иӀэтри ар щӀылъэм теӀэтыкӀа хъуащ. 18Псыр нэхъ хуабжь хъу зэпытт икӀи икъукӀэ зыщиубгъурт щӀылъэм; кхъухьыр щесырт псы щӀыӀум. 19Псыдзэр апхуэдизкӀэ егъэлеяуэ щӀылъэм хуабжь щыхъуати, щӀылъэм псыри уафэ псом и щӀагъ щӀэт бгы лъагэ псори щӀихъумащ абы. 20ӀэфракӀэ пщыкӀутхукӀэ абыхэм я щхьэм псым зыщиӀэтри, бгыхэр щӀигъэнащ.
21ХэкӀуэдащ щӀылъэм щызекӀуэ псэущхьэу хъуари, къуалэбзухэри, Ӏэщри, хьэкӀэкхъуэкӀэхэри, щӀылъэм къыщызыпщыхь псэущхьэу хъуари, цӀыху псори. 22ЩӀыгу гъущэм тету гъащӀэ зиӀэр хэкӀуэдащ. 23КӀуэдащ щӀыгу щхьэфэм тета сыт хуэдэ псэущхьэри; цӀыхум къыщыщӀэдзауэ хьэкӀэкхъуэкӀэхэми, Ӏэщми, хьэпщхупщхэми, къуалэбзухэми нэсу, псори текӀуэдыкӀащ щӀылъэм: къэнар Нухь закъуэрэ абы и гъусэу кхъухьым ихьахэмрэщ.
24Псыдзэр щӀылъэм нэхъ хуабжь щыхъу зэпыту екӀуэкӀащ махуищэрэ щэ ныкъуэрэ хуэдизкӀэ.
Currently Selected:
1 Мусэ 7: KbdNTGP2017
Highlight
Share
Copy
Want to have your highlights saved across all your devices? Sign up or sign in
© Библиер зэдзэкӀыным елжь Институт, 1993, 2007, 2011, 2017