1 Мусэ 38

Иудэрэ Тамарэрэ

1А зэманым Иудэ и къуэшхэм къабгъэдэкӀри щытӀысащ Адуллам къалэм щыщу Хьирэ зи цӀэм и гъунэгъуу. 2Иудэ абдежым къыщилъэгъуащ ШыуаӀ зи цӀэ ханаан цӀыху гуэрым и пхъур; ар ищтащ, щӀыхьащ абы деж. 3Ар лъэщыджэ хъури, къилъхуащ къуэ; фӀищащ абы цӀэуэ Ер. 4Аргуэру лъэщыджэ хъури, къилъхуащ къуэ; фӀищащ абы цӀэуэ Онан. 5Аргуэру къуэ къилъхури фӀищащ абы цӀэуэ Шэлэ. Иудэ щыӀэт Хъэзиб щӀыпӀэм, абы ар къыщилъхуам щыгъуэ. 6Иудэ и щыпэлъху Ер фыз къыхуишащ; абы и цӀэт Тамарэ. 7Ер, Иудэ и щыпэлъхум, Зиусхьэныр къыхуэфӀтэкъыми, игъэлӀащ Зиусхьэным ар. 8Апхуэдэу щыхъум, Иудэ Онан жриӀащ#38:8 жриӀащ – пасэрей журт хабзэмкӀэ, сабий имыӀэу лӀам и фызыр къишэжын хуейт а лӀым и къуэшым – адрейм унагъуэ хуищӀын папщӀэ.:

– ЩӀыхьэ уи къуэшым и фызым деж, ар къашэ, пщыкъуэу ущыщыткӀэ, зэфӀэгъэувэж уи къуэшым и унагъуэр.

9Онан ищӀэрт быныр езым ейуэ зэрыщымытынур; абы къыхэкӀыуи и къуэшым и фызым деж щыщӀыхьэкӀэ, щӀым хикӀэрт, и къуэшым сабий иримытын папщӀэ. 10Зиусхьэным и пащхьэм Ӏеягъэт абы щилэжьыр; Абы игъэлӀащ ари. 11Абдеж жриӀащ Иудэ Тамарэ, езым и нысэм:

– Щыпсэу фызабэу уи адэм и унэм, си къуэ Шэлэ балигъ хъуху.

Сыт щхьэкӀэ жыпӀэмэ абы жиӀащ: «МылӀащэрэт ари и къуэшхэм хуэдэу», – жиӀэри.

Тамарэ кӀуэжри итӀысхьэжащ и адэм и унэм.

12Зэман куэд дэкӀри, лӀащ ШыуаӀ и пхъур, Иудэ и фызыр. Иудэ удэӀужри кӀуащ Тимнэ, езым и Ӏэщхэр къэзыщхэм я деж, езыри Ӏадулам щыщ и ныбжьэгъу Хьири.

13Арати, хъыбар ирагъэщӀащ Тамарэ, уи тхьэмадэр макӀуэ Тимнэ, и Ӏэщыр къищыну, жраӀэри. 14Абдеж абы и фызабэ щыгъыныр зыщихри зытриубгъуащ щхьэтепхъуэ, икӀи зызэщӀиуфэри ӀутӀысхьащ Тымнэ хуэкӀуэ гъуэгум тет Ӏэнаим къалэм и куэбжэм. Сыту жыпӀэмэ илъэгъуат Шэлэ ин зэрыхъуари, езыр абы фызу зэрырамытари. 15Иудэ ар къилъагъури, къыщыхъуащ ар къэхьпэуэ; сыт щхьэкӀэ жыпӀэмэ абы щӀиуфат и нэкӀур. 16Абы дежкӀэ зигъазэри, Иудэ жиӀащ:

– СыныщӀыхьэнущ уи деж.

ИщӀэртэкъым ар езым и нысэр арауэ зэрыщытыр.

– Сыт къызэптынур, си деж укъыщӀыхьэмэ? – жиӀащ абы.

17– Сэ къыпхуезгъэшэнщ си хъушэм щыщу бжэн цӀыкӀу, – жиӀащ Иудэ.

– Уихьэн шэсыпӀэ, ар къебгъэшэху? – жиӀащ цӀыхубзым.

18– Сыт хуэдэ шэсыпӀэ? – жиӀащ абы.

– Уи мыхъурыр, уи плӀэпсыр, уи Ӏэм ӀэщӀэлъ уи башыр, – жиӀащ адрейм.

Ахэр иритри, Иудэ щӀыхьащ цӀыхубзым деж; икӀи ар абы хуэхъуащ уэндэгъу. 19ИтӀанэ тэджри кӀуэжащ, и щхьэтепхъуэр зытрихыжри зихуэпэжащ и фызабэ щыгъынымкӀэ.

20Иудэм иригъэхьащ бжэн цӀыкӀур Адуллам къалэм щыщ и ныбжьэгъум, а бзылъхугъэм шэсыпӀэ зэрыхуихьар къыӀригъэхыжыну; ауэ абы ар игъуэтыжакъым. 21ИтӀанэ еупщӀащ а щӀыпӀэм щыпсэухэм, мыр жиӀэурэ:

– Дэнэ щыӀэ Енаим и гъуэгу Ӏуфэм теса къэхьпэр?

– Мыбдежым щыӀакъым къэхьпэ, – жаӀащ абыхэм.

22Арати, абы Иудэ деж къигъэзэжри, жиӀащ:

– Сэ згъуэтакъым ар; а щӀыпӀэм щыпсэухэм «Мыбдежым щыӀакъым къэхьпэ» жаӀащ.

23– Ирещтэ абы, ауэ дэ къытщымыдыхьэшх закъуэмэ, аращ, – жиӀащ Иудэ. – Хуозгъэхьат сэ мы бжэн цӀыкӀур, ауэ уэ ар бгъуэтакъым.

24Мазищ хуэдиз дэкӀри, къыжраӀащ Иудэ мыпхуэдэу:

– Тамарэ, уи нысэм, зинэ ищӀащ, арати, лъэщыджэ хъуащ ар зинэкӀэ.

– Дэфш ар, икӀи ирырагъэс ар, – жиӀащ Иудэ.

25Ауэ ар щрашажьэм, абы езым и тхьэмадэм деж игъакӀуэри мыпхуэдэу жрыригъэӀащ:

– Сэ уэндэгъу сызыхуэхъуар мы хьэпшыпхэр зейр арщ. АдэкӀи жиӀащ:

– ПцӀыхужрэ, хэт ей мы мыхъурри, плӀэпсри, башри?

26Иудэ къицӀыхужри, жиӀащ:

– Ар нэхъ захуэщ сэ нэхърэ, сэ ар естакъым Шэлэ, си къуэм.

ИкӀи екӀуэлӀакъым ар абы и ужькӀэ.

27И лъхуэгъуэр къыщысым, Тамарэ и ныбэм зэтӀолъхуэныкъуэ илъу къыщӀэкӀащ. 28Ар щылъхуэм, бынжэр пызыупщӀ фызыжьым япэ илъэгъуа Ӏэм ирищӀащ Ӏуданэ плъыжь, «мыр япэ къалъхуащ», жиӀэри. 29Ауэ Ӏэр зейм иригъэгъэзэжри, къикӀащ абы и къуэшыр. Фызыжьым жиӀащ:

– Уэ дауэ укъыфӀэкӀа къыппэувам?

ИкӀи фӀищащ абы цӀэуэ Пэрэц#38:29 Пэрэц – пасэрей журтыбзэкӀэ абы къикӀыр: гъуэгу пхрыщӀыкӀын.. 30ИтӀанэ къалъхуащ абы и къуэшыр, и Ӏэм Ӏуданэ плъыжьыр ищӀауэ. ИкӀи фӀащащ абы цӀэуэ Зэрахь#38:30 Зэрахь – пасэрей журтыбзэкӀэ абы къикӀыр: пщэдджыжь пшэкӀэплъ..

Currently Selected:

1 Мусэ 38: KbdNTGP2017

Highlight

Copy

Compare