Лука 20

20 къаьм

«Лъод Дул ихтияр нилӀийо?»

1Вагьагло водла̄ъ Иерусалимлиъ гаьгьийа Аллагьлила билӀоъ ваъза-насигьат богьна Рохеллис Хабар Иса мегьцалаъ, гьулиъ мокъойо букъа̄ кашишлана, диниябла аьлимлана, гьаькимлана. 2Гьолло Исахъа нисолло:

– Лъо изно нилӀнад Ми аьдамла̄л вагьло ваъза-насигьатла йовагьца? Лъод Дул вагьалълъол ихтияр нилӀна?

3Иса гьоллохъа нисос:

– Гьаᵸкъкъа мизохъа До гьоᵸс жо нисолал. 4Нисаъче, Ягья аварагли гьаᵸсаъкьа̄, йана аьдамла̄ш ихтияр михъонад лъӣд мунагьла чурзи йовагьца зукъойо?

5Гьолло̄л сидхъа-гьоᵸсо бикълабашал муьхобалъийо: гьаᵸсаъкьа̄ изно зукъойолӀо нисода, суд миже Ягьякьа боьважеэшлӀо нисолас Гьолцо. 6Нагагь иле нисода, аьдамла̄ш ихтияр зукъойолӀо нисона, къацӀцӀо халкъила кьала̄ йийакьена бийакьас иле, судлӀо нисода гьолло̄л аьдамла боьважча Ягья гьаькъаб авараг гаьгьийакьа.

7– Илол на̄кьа изно михъойолъи йикъаъас, – лӀо нисона жаваб нилӀийо гьогло.

8Исана гьоллохъа нисона гей:

– Гьинина лъо изно нилӀийона нисаъас, – лӀо.

Чикейа̄ элла̄кьас хабар

9Бета Гьолцо, мисална бакъона, халкъилал вагьаддийо хабар ме̄йал уьᵸхолъийо:

– Гьоᵸс пуланаб сукӀо гунна гей кӀодас аьгь. Гьолона элла̄хъа нилӀна, гьули сукӀо эᵸкьена гей цӀихода̄ балӀо мицаъ тели мехлаъ эцал. 10КӀодо бикъолъ, гьолцо сукӀо элла̄дой эᵸгьна гей гьоᵸс лагъ гьинил мехецас кӀодас бутӀа бокӀал. Амма гьолло гьули лагъ а̄ькьенна оьчӀчӀо кьа̄ь эᵸгьна гей. 11Гьогцо сукӀо бадина лагъ эᵸгьна гей элла̄дой, амма гьогло гьугина а̄ькьенна, инжит огьна, кьа̄ь оьчӀчӀо уьᵸхонна гей. 12Лъанас э̄ᵸйона, вагьалла̄зу а̄ькьенна, лаьхъла̄сна оцӀинна, тӀотӀна гей. 13Ахирна аьгьбала бетӀергьалли нисона гей: «Сийод до йовал, до дил йилӀа аццас оьжо эᵸйал. Суд йикъал, гьули эгалъ, гьолцокьадана намус ба̄хъал гьогго̄л», – лӀо. 14Амма оьжо эгалъ, элла̄ сидхъа гьоᵸсо бикълабашена пикро богьна гей: «Вагьди гей ирсилав, гьуди икьеда, илол ирс михъас». 15Аьгьбаъаш гисана оцӀна, аькьенна икьена тӀотӀна гей элла̄ гьули оьжо. Гьаᵸже венахийала бетӀергьалли сийод гьоллол йовал? 16Эᵸкьанна эᵸкьена гьогго̄лна бийакьена аьгь бадлохъа нилӀас.

Энекзи бахъийа̄ нисона гей:

– Йахъа̄къала вагьаллийо жо.

Йоᵸсоъ кьухъеэш кьало

17Гьоллохъана говацӀона Иса нисойо:

– «Йоᵸсоъ кьухъаъаслӀо нисона йоᵸсохъалла̄ йечаннейо кьало, ахирна кӀетӀа букьаъ рекъази йо̄с», – лӀо нисона ТӀекликьа чахийа калималис маъна сийо гаьгьийона бикъешди мизол? 18СукӀо ахъдана гьолълъо кьалил эᵸхейо сукӀона галигзи ахъца, кьода̄кьа йекна йоᵸкъова гьолълъо кьалина гьули йеᵸхейо аьдамна наькъучӀа о̄с.

Къайсарлил ниццас гьаькъ

19Букъа̄ кашишла̄лна диниябла аьлимла̄на Иса кьапӀун охна эᵸдо голал атӀна зукъойо. Амма халкъилахъа гьийабачӀелъ, гьолло̄л муьгъатта̄ буьвакьна бечейо. Вагьло гьидекьас хабар ме̄йолъи гьоллол бикъейо. 20Гьоглол йатӀна зукъойо Иса нисойо нӣйади йаьжкьа охна ихтияр гаьгьийона диван богьцалана наиблихъа Гьуги нилӀал. Вагьалълъол гьогло муьгъалӀ аьдамлана беченна, ме̄йолӀо гьидес сукӀоба жуво̄л мацова гаьгьийас хелна богьна. 21Ме̄йа аьдамла̄ Исахъа нисолло:

– Йа̄ Муалим! Илол йикъеш Дибола сикӀаъкьа̄ гӯйо йаьжена каламна нитоназу битӀараб бахъцас. МотӀолиъ говацӀона иш богьцас аьмална гаьъа дибо. Гьаькъкъаб жоцой малъзи йо̄с битӀараб Аллагьлила гьид эᵸкьал. 22Ниса илохъа, илол йикъал йатӀна гей къайсарлил гьаькъ нилӀал бахъцади йаги бахъаъасди?

23Гьоллос гьилла-макро биджи бахъна Иса нисос:

24– Йегалаъче Дил динар. Лъойсди гьолълъокьа кьодо суратна ца̄на гей?

– Къайсарлис гей, – лӀо нисойо гьолло.

25– Вагьла̄ зогъда къайсарлис къайсарлил нилӀа, Аллагьлис – Аллагьлил нилӀа, – лӀо нисойо Иса гьоллохъа.

26Вагьла̄ гьоллохъа йахъеэш гьидел йатӀийо йаьже Исад халкъ гаьгьийаъ нисоллина. Гьолцола жавабли гьикмат богьна гьокӀа йоваъинна гьихбалъойо гьолло̄л.

Къиямасаб водиъ бувагъова̄ баьгъбаъилцалакьас хабар

27Исадой мокъос гьоᵸсо саддукейлалӀо нисоцаса, къиямасаб водиъ бувагъова̄ баьгъбаъилцалакьа боьважаъцаса, диниябла аьдамла. Гьолло Исахъа нисолца:

28– Йа̄ Муалим! Мусала къанонликьа, масала, гьоᵸс пуланаб сукӀо ахъхъал къована ба̄хъечӀе угъона зогъда, гьолцола истӀи гьоло ахъо йоᵸкъал нуцӀос угъова истӀил насло бахъалъгъа.

29Масала, зукъона гей алӀна ис. Йоᵸкъова ахъхъал къова ахъечӀе угъона гей аьᵸйдда̄ш ис. 30Гьолцос ахъо йоᵸкъона гей бацосола истӀи, гьулина угъона гей къова ба̄хъечӀе. 31Вагьалла̄ лъанасна ис угъона гей, бета гьоᵸссокун алӀнана ис къова ба̄хъечӀе бувагъона гей. 32Ахир гьоллос ахъона йугъона гей. 33Гьаьсил, къиямасаб водиъ гьоло алӀон истӀис ахъо лъойс ахъод йахъца?

34Гьоллол жаваб богьна Иса нисос:

– Дунияллила билӀоъ аьдамла ба̄хъна гей ахъхъа мовакъална, ахъхъа мейакьална. 35Амма ахиратлиъ, къиямасаб водиъ баьгъбаъинна муьгъатта̄, ахъо-бетӀергьалла ба̄хъаъас. 36Хел гаьччо абадияб малаиклислъийо оьмро бахъца ахиратлиъ аьдамла̄ш. Ахиратлила билӀоъ къацӀца̄ бувагъоваъас баьгъбаъилла̄ ба̄хъца Аллагьли Гьиндой ийабалӀейа Гьинис къовалъийа̄. 37Къиямасаб водиъ бувагъова̄ багъбаъилцалӀо Мусана нисос. ЙекӀецала тӀитӀас чаха̄чо калималиъ нисона гей Мусахъа, БетӀергьан «Ибрагьимисна, Исакъисна, Якъубисна Аллагь гей», – лӀо. 38Аллагь – бувагъова̄с Аллагь гаьъа, чӀагоябла̄с Аллагь гей. Гьолцол къацӀцӀа̄ чӀагоябла гей.

39Гьолълъогъа муьгъатта̄ гьоᵸсо диниябла аьлимла̄ нисойо:

– Йа̄ илос Муалим! Ми йилӀа битӀун нисойо, – лӀо.

40ТӀокӀаб гьоᵸссукӀона гьоьшшона нисолал кӀези ахъеэш.

«Давудила умматлис оьжо гаьъа Масигь»

41Гьолцо кьа̄ьна гьоллохъа нисолло:

– Суд аьдамла̄ Масигь Давудила умматлис оьжо гейлӀо нисос? 42Давуди гьинила забурлиъ#20:42 Забур – туркила̄с ТӀек. нисона геййа̄ъ: «БетӀергьан Аллагьли диела Кьодда̄ла БетӀергьаллихъа нисона: „Диела кӀетӀакьала рахълиъда̄ къе̄ эче, 43до тушмалла Дибола хаьбала̄дой аьᵸйда̄ мицна̄кьа бейачелцал“». 44Вагьла̄ гьини Давуди Масигьлихъа гьинис Кьодда̄с БетӀергьанлӀо нисослаъ, нигъад Масигь Давудила умматлис оьжо ахъца?

«Гьоᵸсо диниябла аьлимла̄кьас цӀуми ба̄хъ миже!»

45КъацӀцӀо халкъ Гьолцохъа энекзи бахъна гаьгьийаъ, Гьинила асгьабла̄хъа Иса нисойо:

46– Вере, йихало лъицӀона лъичӀена мекье-гугьцаса, халкъ къацӀобака̄цо гьидел салам бовал баццаса, синагогла̄ъ кӀетӀа мица̄ъ къе̄ бецал баццаса, бес-хулӀа̄цо аьйдаба̄кчаша вагьадло диниябла аьлимла̄дойс атада̄ цӀуми ба̄хъна бече миже. 47Язихабла къоролла̄с боцӀи-ризкъина гьолло муьхъча, гьула̄зу аьдамла̄л йега̄лъгъа йихала̄ доьъа̄на йовагьца. Вагьли тели йо̄ваъан, гьоллол лъакъейа̄ъас тамбигь михъос.

Currently Selected:

Лука 20: KapPROLUK

Highlight

Copy