Mark 3
3
Yěsû a parə̀ ŋònə̀ nɨ taʼà àpô e à lə̀ kwɨghə̀nə
(Mat 12.9-14; Luk 6.6-11)
1À lə̀ pə amwuə yɨ̀tse nkwùə̀, Yěsû a kẅirə̀ ndèrə̀ amwuə ndâ àshwatə̀ pɨ̀Jew. Ŋònə̀ ɨ̀tse à lə̀ pə amwuə ndâ ghu nɨ taʼà àpô e à lə̀ kwɨghə̀nə 2Pànə̀ pɨ̀tse amwuə pobə lə̀ tə̂ àtwuə̀ nnaŋə̀ a nɨ zəənə̀ lo Yěsû à parə̀ a ŋònə̀ wə̀ amwuə njyə̂ àlaʼà pɨ̀Jew, mbə̀ʼə zəənə̀ ànwùə̀ nɨ mbə̀ʼə pobə chyâ ɨ̀sàʼa ghu aŋunə ze. 3Yěsû à lə̀ shwəŋə̀ ambo ŋònə̀ wa nɨ àpô e a lə̀ kwɨghə̀nə la lo, “Lòo a ɨ̀shyə̂ ndàŋə̀ ntəəmə̀ a mbyə̀.”
4Tsaʼnə a lə̀ làŋə̀nə ntəəmə̀ la, Yěsû a pə̀ŋə̀ mbyiitə̀ ambo pobə lo, “Mbòomə ɨ̀wəənə̀ à nèrə̀ lo pə̀ənə̀ ghɨ̀rə̀ la ɨla njyə̂ àlaʼà? Ɨ̀pòŋə̀ kə̀ a tɨ̀pòŋə̀? Nchwarə̀ kə̀ nzhwuutə̀?” Tsaʼnə à lə̀ pyiitə̀nə la pobə zhwemnə̀ a ghobə.
5A naŋə̀ a ghobə moʼo moʼo nɨ àsinə̀ ɨ̀sɨghə̀, la nsòmnə̀ aŋunə pobə ka mɨ̀zùŋə ntiinə pobə lə̀ nàanə̀nə mɨ̀ntɨŋmə̀ ɨ̀mobə, ntyiʼə̀ nshwəŋə̀ ambo ŋònə̀ wa lo, “Shwùumə̀ ɨ̀faanə̀ àpô o.” À lə̀ shwùumə̀ àpô e zèrə a zùŋə̀ nkẅirə̀ ntɨ̀ŋnə̀. 6Pɨ̀Farìsî pa lə̀ furə̀ ndzùŋə̀ ngə̀ ngẅìimə̀ àshwatə̀ pobə pɨ pànə̀ pɨ Heròdə̀ a nɨ tyankə̀ tsaʼnə pobə làŋə̀ zhwuutə̀ e.
Ɨ̀pùŋə̀ pə̀ənə̀ zùŋə̀ a Yěsû a nɨ̀pwùnə atəŋə
7Yěsû pobə ɨ̀zùŋə̀ ndzùmə̀ ɨ̀pe lə̀ furə̀ ndèrə̀ a nɨ̀pwùnə atəŋə Galìlyə̂. Àpùŋə̀ pànə̀ pɨ̀noʼnə nɨ a lə̀ furə̀nə a Galìlyə̂ ghobə Judyà a lə̀ tyiʼə̀ mmə ndzùŋə̀ e. 8Pɨ̀tse pànə̀ lə̀ furə̀ a Yèrusalèmə̀, pɨ̀tse furə̀ a Idumyà, pɨ̀tse furə̀ a ndzìnə nchyə Jodànə̀, nkɨ furə̀ amwuə ɨ̀laʼà a nɨ̀pwùnə Tayə̀ ghobə Sidònə̀. Àpùŋə̀ pànə̀ pɨ̀noʼnə zə a lə̀ tô ambo ze ntiinə pobə lə̀ zuʼnə mɨ̀nwùə̀ nɨ a lə̀ ghɨ̀rə̀nə. 9Yěsû a zəənə̀ lo àpùŋə̀ pànə̀ za a tô nnoʼò tɨsɨŋnə, nshwəŋə̀ ambo ɨ̀zùŋə̀ ndzùmə̀ ɨ̀pe lo, pobə lòo àkànwuʼə ntô ŋŋâ nɨ ze lo â kwuunə̀ amwuə mbə̀ʼə pànə̀ pɨ̀ghu kaŋə nyə̀nkə̀ e. 10A lə̀ kɨ pə la nɨ a parə̀ mə pànə̀ pɨ̀noʼnə. Ànwùə̀ zèrə zə a lə̀ ghɨ̀rə̀ lo pɨghoonə pɨ̀noʼnə tyiʼə̀ ntinə̀ ntô lo pètə̀ e. 11Nkwùə̀ za ɨ̀tsùmə̀ nɨ ɨ̀zhwùə̀ tɨ̀pòŋə̀ zəənə̀nə e, pobə pa nkunə̀ a mbyə̀ ze, nkyiinə̀ nshwəŋə̀ lo, “Ghò la Moonə̀ Nẅùə̀.”
12La Yěsû a kwàtə̀ a ghobə nshwəŋə̀ lo kò pobə laʼa ngɨ̀rə̀ pɨ zhyə̂ a ŋònə̀ nɨ à pənə ẅèrə.
Yěsû a tsoʼò ngàŋə ntwuumə̀ ɨ̀ze za ntsòbə̀ ɨpaa
(Mat 10.1-4; Luk 6.12-16)
13Yěsû à lə̀ nkoʼò ndèrə̀ àtwuə̀ mbarə̀ nfuŋə̀ pànə̀ nɨ à lə̀ tàʼnə lo fuŋə̀. Pobə kɨ ntô ambo ze, 14a ghə̀ amwuə pobə ntsoʼò pànə̀ ntsòbə̀ ɨpaa nɨ à lə̀ fuŋə̀nə nɨ ngàŋə ntwuumə̀ ɨ̀ze ntyiʼə̀ nshwəŋə̀ ambo pobə lo, “Ntsoʼò a wɨghə lo nɨ̀ pə pə̀ənə̀, mbɨ tsàa a wɨghə lo nɨ̀ ghə̀ nchwìitə̀ ntwuumə̀ Nẅùə̀, 15nɨ̀ kɨ mbə nɨ ɨ̀tɨ̀ŋnə̀ a nɨ fuukə̀ ɨ̀zhyə̂.”
16Pànə̀ pyə̀ nɨ à lə̀ tsoʼnə la à lə̀ pə Shimùnə̀ nɨ à lə̀ ŋânə nɨ̀linə̀ ɨ̀tse lo Pità. 17Jemə̀ pobə momaa e Jònə nɨ pobə lə̀ pənə ɨ̀poonə̀ pɨ Zebedì. A lə̀ chwùə̀ nɨ̀linə̀ ɨ̀tsobə lo Boanerges nɨ nɨ pənə lo, “Ɨ̀pômbyàŋnə̀ pɨ nɨ̀fàŋə̀.” 18A lə̀ kɨ ntsoʼò Andrù nɨ Filibə̀ nɨ Bartholomew nɨ Matyù nɨ Thomas nɨ Jemə̀ moonə̀ Àlfeyùsə̀, ntsoʼò a Tàdyusə̀ nɨ Shimùnə̀ ŋwùə̀ Kanàanə̀, 19nɨ Yudà Iskaryòtə̀ nɨ a lə̀ shwùunə̀nə a Yěsû.
Pɨ shwəŋə̀ lo Yěsû à chyə̂ nɨ ɨ̀fò pɨ ɨ̀zhyə̂ amwuə nɨ̀pùmə̀ ɨ̀tse
(Mat 12.22-32; Luk 11.14-23; Luk 12.10)
20Yěsû à lə̀ furə̀ nkwə̂ a ɨmwuə alyiʼə. Àpùŋə̀ pànə̀ yè noʼnə a kɨ nchi nshwatə̀ amwuə ndwuumə̀ nɨ ka à lə̀ pə e nɨ ɨ̀sàanə̀ nɨ mbə̀ʼə pobə ɨ̀zùŋə̀ ndzùmə̀ ɨ̀pe nwuunə̀ ndzɨghə̀. 21Nkwùə̀ nɨ ngẅàrə̀ Yěsû ɨ̀ lə̀ zuʼnə pànə̀ mə nshwəŋə̀ lo à paarə̀ la, pobə lə̀ ghə̀ lo tə pyamnə̀ e.
22Pɨ̀nèrə̀ mbòomə pɨ̀tse nɨ pɨ lə̀ furə̀nə a Yèrusalèmə̀ nshwuʼə̀ ntô lə̀ shwəŋə̀ lo, “À wə̀ nɨ Beelzebùbə̀ nɨ à pənə ɨ̀fò pɨ ɨ̀zhyə̂ a nɨ̀pùmə̀ ze. À wa ndòo la ɨ̀tɨ̀ŋnə̀ ɨ̀fò pɨ ɨ̀zhyə̂ nfuukə̀ a pyə̀ ɨ̀zhyə̂ ghu.” 23La Yěsû a fuŋə̀ a ghobə mbyiitə̀ ambo pobə amwuə ɨ̀shwəŋnə̀ pɨ̀nàanə nàanə lo, “Satàanə̀ a kantə̀ Satàanə̀ lə ɨla?” 24Àlaʼà a tə mbə la ngàpə̀ ntəəmə̀ a mɨ̀kwurə̀ mɨ̀kwurə̀ ndzòŋnə̀ mbɨ̀ŋmə̀ e, àlaʼà ghu a laʼa ntəəmə̀ e apə̀. 25Ngẅàrə̀ tə mbə la ngàbə̀ ɨ̀pɨ̀ŋmə̀ e mbə a mɨ̀ntswùə̀ mɨ̀ntswùə̀ lo zòŋnə̀ pobə nɨ pobə, ngẅàrə̀ ghu ɨ laʼa ntəəmə̀ e apə̀. 26Satàanə̀ a kɨ nchi mbəla ndòo a ɨ̀shyə̂ ntyiʼə̀ mmə ndzòŋnə̀ ɨ̀pɨ̀ŋmə̀ e ngàbə̀, yi ǎ kunə̀, ànwùə̀ Nɨ̀fò e â myə̀. 27A ndəŋə ndəŋə lo, mbə̀ʼə ka ŋwùə̀ a pəʼə̀ e nkwuunə̀ a ndâ ngàŋə̀ mɨ̀tɨ̀ŋnə̀ ndyàa ɨ̀pwuumə̀ ɨ̀pe tɨghu a pyə̀ nkô e nkorə̀ zaʼà mbòŋə̀ kwuunə̀ lyàa ɨ̀pwuumə̀ ɨ̀pe.
28Ǹshwəŋə̀ tyiʼə̀ nkǔŋə nkuŋə ambo pɨghə lo, “Pɨ̌ waʼà ɨ̀fànə̀ mɨ̀nwùə̀ pə̀ənə̀ tyiʼə̀ ɨ̀tsùmə̀ pobə mɨ̀ndzòomə̀ mɨ̀tsùmə̀ nɨ pə̀ənə̀ zòomə̀nə a Nẅùə̀ ghu. 29La mbə̀ʼə pɨ laʼa ngwaʼà e tɨ̀pòŋə̀ ŋònə̀ wa nɨ à zòomə̀nə Àzhwùə̀ Nẅùə̀ la apə̀, ntiinə a ghɨ̀rə̀nə la tɨ̀pòŋə̀ nɨ a ghoŋə̀nə nɨ nkuŋə̀.” 30Yěsû à lə̀ shwəŋə̀ a lenə la ntiinə pobə lə̀ shwəŋə̀nə lo, “À wa nɨ àzhwùə̀ tɨ̀pòŋə̀.”
Mǎ pɨ Yěsû pobə pɨ̀momaa pɨ Yěsû
(Mat 12.46-50; Luk 8.19-21)
31Lenəla, mǎ pɨ Yěsû pobə pɨ̀momaa pɨ Yěsû lə̀ tô ntəəmə̀ a àpyìinə, ntsàa ntwuumə̀ nfuŋə̀ e. 32Àpùŋə̀ pə̀ənə̀ a lə̀ nwuunə̀ nkamnə̀ e, nshwəŋə̀ ambo ze lo, “Mǎ o pobə pɨ̀momaa ɨ̀pô pə a àpyìinə ntàʼà o.”
33Yěsû a pyiitə̀ lo, “Mǎ mə̀ pobə pɨ̀momaa ɨ̀pâ la pɨ̀wə̌?” 34Mbə̀ŋə̀ nnaŋə̀ pànə̀ nɨ pɨ lə̀ nwuunə̀nə a nɨ̀pwùnə ze, nshwəŋə̀ lo, “Lə̌ pɨ̀mǎ ɨ̀pâ pobə pɨ̀momaa ɨ̀pâ! 35Ŋònə̀ wa ntsùmə̀ nɨ a wa ngɨ̀rə̀ ànwùə̀ nɨ Nẅùə̀ a tàʼnə la, a momaa mə̀ ghu mbyàŋnə̀, mbə ghu mə̀ngyə̌ nkɨ mbə mǎ mə̀.”
Currently Selected:
Mark 3: pny
Highlight
Share
Copy
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy