Ɨ̀fàʼà 28
28
Ànwùə̀ nɨ a lə̀ ghɨ̀rə̀nə a àlaʼà Maltà
1Tsaʼnə pəə lə̀ chwarə̀nə a nɨ̀wɨghə̀ nfurə̀ a ɨsɨghə la, pɨ lə̀ tiitə̀ a wəə lo nɨ̀linə̀ nɨ àpàbə ɨ̀shyə̂ ghu nɨ nchyə kamnə̀nə la Maltà 2Mbòomə pànə̀ pɨ ghu à lə̀ pòŋə̀ ka mɨ̀zùŋə, pobə kẅiirə̀ a wəə ɨ̀shìʼnə̀. Tsaʼnə mbə̀ŋə̀ ɨ̀ lə̀ mənə ndô la, ɨlyiʼə lə̀ mə nfî, lenəla pobə tyiʼə̀ nchwùə̀ ɨ̀mǔ nkẅiirə̀ a wəə. 3Pàolò à lə̀ shwatə̀ nɨ̀pyiŋə̀ nɨ nkẅuunə̀ mmə ntòonə̀ amwuə ɨ̀mǔ, ɨ̀nyoorə̀ ɨ̀ furə̀ amwuə ntiinə ɨ̀mǔ lə̀ pənə ndwùumə̀ ndwuumə̀ àpô e ntsəŋnə̀ e aŋunə. 4Tsaʼnə ngàŋə àlaʼà zə̀ lə̀ zəənə̀nə ɨ̀nyoorə̀ za ɨ̀ tsəŋnə̀ aŋunə àpô e la, pobə lə̀ tyiʼə̀ nshwəŋnə̀ pobə nɨ pobə lo, “À patə nkɨ̀ɨrə̀ pə a nɨ̀wɨghə̀ nchyə la, ka pɨ̀Nẅùə̀ pə myàʼtə̀ e lo â chyə̂ ghù ntɨ̀ŋnə̀.” 5La Pàolò à lə̀ zàrə̀ ɨ̀nyoorə̀ za amwuə ɨ̀mǔ la ka ànwùə̀ àtse ghɨ̀rə̀ e a ye. 6Pobə lə̀ tyiʼə̀ mmə nkwàŋə̀ lo ǎ mòrə̀, kə̀ lo ǎ wùutə̀ kunə̀ kwɨghə̀. La tsaʼnə pobə lə̀ tyiʼnə mmə mbyabə̀ aŋunə ntyə̌ sàa ka zəənə̀ a ghobə ànwùə̀ àtse a ghɨ̀rə̀ e la, pobə lə̀ pə̀ŋə̀ mɨ̀ntɨŋmə̀ ɨ̀mobə ntyiʼə̀ nshwəŋə̀ lo Pàolò a nẅùə̀ ɨ̀tse.
7A nɨ̀pwùnə nɨ alyiʼə ghu, ɨ̀swùumə ɨ̀tse ɨ lə̀ pə ghu mbə yɨ̀ ɨ̀fò Maltà nɨ nɨ̀linə̀ ɨ̀tse lə̀ pənə Publius. A lə̀ kẅiirə̀ a wəə ntwuʼtə̀ a wəə ɨ̀shìʼnə̀ aŋunə njyə̂ ɨtarə. 8Tǎ pɨ Publius a lə̀ nwuunə̀ a ɨ̀kwùunə mmə ngòonə̀ a fibà ghobə àkòʼo, Pàolò a kwuunə̀ a ndâ ntsirə̀ e, nchàʼtə̀ a Nẅùə̀ nnùŋə̀ mbô aŋunə ze a fiitə̀ 9Nkwùə̀ nɨ ànwùə̀ zə lə̀ lòo nɨ alyiʼə la, pànə̀ pɨ̀tsùmə̀ nɨ pɨ lə̀ mənə ngòonə̀ àlaʼà Maltà lə̀ tô Pàolò a ghɨ̀rə̀ pobə fiitə̀. 10Pobə lə̀ ŋâ ɨ̀pwuumə̀ pɨ̀noʼnə ambo pəə. Nkwùə̀ nɨ pəə lə̀ tyiʼnə mmə ndèrə̀, pobə lə̀ chi ŋŋâ ɨ̀pwuumə̀ nɨ kùʼnə̀nə aŋunə àkwùə̀ nɨ̀yìinə̀ àzəə.
Pobə furə̀ a Maltà ndèrə̀ a Romə̀
11Ɨ̀ŋwɨgrə̀ ɨtarə lə̀ làŋə̀ pəə kwuunə̀ àpaŋə̀ nɨ a lə̀ furə̀nə a Àlèzandryà nɨ pɨ lə̀ mənə nfuŋə̀ nɨ “Mɨ̀fâ mɨ pɨ̀Nẅùə̀.” Pəə lə̀ pyə̀ ngoŋə̀ ghu la ntiinə à lə̀ pənə nkwùə̀ ghɨɨmə. 12Pəə lə̀ pyàa a Sìrakùsə̀ nchyə̂ ghu njyə̂ ɨtarə, 13nfurə̀ alyiʼə ghu nkwuunə̀ a Rhegium. Taʼà njyə̂ à lə̀ làŋə̀ fèrə̀ a furə̀ a pàa mɨ̀tùŋə nkoʼò ntinə̀ àpaŋə̀, njyə̂ ɨ̀ laanə̀ pəə ghə̀ mbyàa Puteoli. 14Pəə lə̀ zəənə̀ pɨlyimə pɨ̀tse a ndzùmə̀ Yěsû ghu nɨ pobə lə̀ tàʼnə lo pəə pɨ pobə chyə̂ aŋunə taʼà ngàbə̀ lenəla pəə lèrə̀ a Romə̀.
Àfàʼà Pàolò a àlaʼà Romə̀
15Pɨlyimə ɨ̀pəə a ndzùmə̀ Yěsû lə̀ zuʼù lo pəə tô mbyàa, pɨ̀tse furə̀ a Mɨ̀tàanə Apyùsə̀, pɨ̀tse furə̀ amwuə pɨ̀kɨyii mɨ̀ndâ mɨ àzhwùutə̀ mɨntarə ntô pəə pɨ pobə pwùumə̀. Nkwùə̀ nɨ Pàolò a zəənə̀nə a ghobə, à lə̀ ŋâ a mɨyàa ambo Nẅùə̀, ntɨŋmə̀ e ɨ zùŋə̀ ntɨ̀ŋnə̀. 16Nkwùə̀ nɨ Pàolò à lə̀ pyàanə a Romə̀, pɨ lə̀ myàʼtə̀ e lo â pə nchyə̂ ze nɨ ze pobə taʼà soyì lo â tə mbyabə̀ e. 17Njyə̂ lə̀ làŋə̀ ɨtarə, Pàolò a fuŋə̀ ɨ̀twuə̀ pɨ̀Jew nɨ pɨ lə̀ pənə a Romə̀ pobə tô nshwatə̀. Nkwùə̀ nɨ pobə lə̀ nwuunə̀ a ɨ̀shyə̂ Pàolò a shwəŋə̀ ambo pobə lo, “Pɨlyimə ɨ̀pâ, ka ndə̀ ghɨ̀rə̀ mə̀ ànwùə̀ tɨ̀pòŋə̀ àtse ambo pə̀ənə̀ ɨ̀pə̀ənə̀, kə̀ aŋunə mbòomə àlaʼà nɨ pɨ̀tǎ ɨ̀pə̀ənə̀ lə̀ pənə nɨ ẅèrə, la pɨ lə̀ chyâ mə̀ a ɨ̀tsaŋə̀ a Yèrusalèmə̀ ŋŋâ ambo pànə̀ pɨ Romə̀. 18Pobə lə̀ naŋə̀ ɨ̀sàʼa mə̀ mmə ntàʼà lo myàʼtə̀ mə̀ ntiinə ka pobə lə̀ zəənə̀ a ghobə ànwùə̀ àtse nɨ ndə̀ ghɨ̀rə̀nə nɨ mbə̀ʼə pɨ tyiʼə̀ nzhwuutə̀ mə̀ zhwuutə̀nə. 19La ka pɨ̀Jew lə̀ pyiimə̀ a ghobə ànwùə̀ ghu, lenəla, a tyiʼə̀ ntsàarə̀ mə̀ ǹshwəŋə̀ lo pɨ̀ tsàa ɨ̀sàʼa ghu ambo Kaasà. Ka mɨ̀ŋə̀ àtwuə̀ ɨ̀pɨ̀ŋmə̀ mə̀ ndə̀ pə mə̀ nɨ ànwùə̀ àtse a nɨ shwəŋə̀ mbə̀ʼə pə̀ənə̀ ɨ̀pâ. 20Lə̌ ɨ̀sùmə ànwùə̀ nɨ ǹfuŋə̀nə a wɨghə lo pə̀ənə̀ shwəŋnə̀ mbə̀ʼə mɨ̀tsaŋə̀ mə nɨ mɨ pənə ambo mɨ̀ŋə̀ ntii ŋònə̀ wa nɨ pànə̀ pɨ Israel lə̀ mənə mbyabə̀ lo â tô la.”
21Pobə kẅùə̀ ambo ze lo, “Pəə pirə̀ mə a wəə tɨ kẅiirə̀ àŋwàʼnə̀ àtse nɨ a furə̀nə a Judyà mbə̀ʼə o; ka ndyimə ɨwəə ghùtse a kɨ nchi furə̀ e ghu ntô nshwəŋə̀ ànwùə̀ tɨ̀pòŋə̀ àtse mbə̀ʼə o. 22La pəə kòŋə̀ a nɨ zhyə̂ ànwùə̀ nɨ wə̀ wə̀ nshwəŋə̀, ntiinə pànə̀ pə nshwəŋnə̀ aŋunə ghò alyiʼə àtsùmə̀ lo àshwatə̀ zə̀ nɨ wə̀ pənə amwuə lə ka a pòŋə̀ e.”
23Lenəla pobə lə̀ kàʼà njyə̂ pobə pɨ Pàolò tyiʼə̀ ntô njyə̂ ghu pobə pɨ̀noʼnə tô ntsirə̀ e alyiʼə nɨ à mənə nchyə̂. À lə̀ shwəŋnə̀ a nɨ pìʼnə̀ a ngẅùʼə tə mbyàa a nkwə̌ mmə nchwìitə̀ ntwuumə̀ mbə̀ʼə ànwùə̀ Nɨ̀fò Nẅùə̀ ambo pobə. À lə̀ nèrə̀ a ghobə nɨ ɨlyiʼə pɨ̀tse amwuə àŋwàʼnə̀ pɨ̀mbòomə pɨ Mǔsî farə amwuə àŋwàʼnə̀ ngàŋə̀ ntwuumə̀ Nẅùə̀, mmə nkyiitə̀ a nɨ ghɨ̀rə̀ pobə zhyə̂ lo ànwùə̀ Yěsû a chyə̂ mbə nkǔŋə nkuŋə. 24Pobə pɨ̀tse lə̀ pyiimə̀ lo àshwəŋnə̀ e a nkǔŋə nkuŋə, la pobə pɨ̀tse kɨ ntwuunə̀ a ghobə. 25Lenəla pànə̀ pɨ̀ghu lə̀ furə̀ alyiʼə ghu a mɨ̀ntswùə̀ mɨ̀ntswùə̀. Pàolò a tyiʼə̀ nshwəŋə̀ lo, “Àzhwùə̀ Nẅùə̀ a lə̀ shwəŋnə̀ ɨ̀shìʼnə̀ tsaʼnə ngàŋə̀ ntwuumə̀ Nẅùə̀ Ìsayà à lə̀ ŋwàʼnə̀nə ambo pɨ̀tǎ pɨ̀tǎ ɨ̀pəənə̀ lo:
26‘Ghə̀ nshwəŋə̀ ambo pànə̀ pə lo
Nɨ̌ zuʼù tə zuʼù la zhyə̂ a wɨghə apə̀,
nɨ̌ naŋə̀ kẅirə̀ naŋə̀, la zəənə̀ a wɨghə apə̀,
27ntiinə mɨ̀ntɨŋmə̀ pànə̀ pə̀ porə̀ mə,
pobə nàanə̀ mɨtugrə ɨ̀mobə,
nkɨ nkẅupə̀ ɨ̀myə̂ ɨ̀mobə.
A ghoŋə̀ tə pə a lenə, yi mbə̀ʼə pobə zəənə̀ nɨ ɨ̀myə̂ ɨ̀mobə,
ndzuʼù nɨ mɨtugrə ɨ̀mobə,
nzhyə̂ amwuə mɨ̀ntɨŋmə̀ ɨ̀mobə
mbə̀ŋə̀ nkẅirə̀ ntô ambo mɨ̀ŋə̀, mbarə̀ a ghobə. Lə̌ tsaʼnə Nẅùə̀ à shwəŋə̀nə.’”
28Pàolò a tyiʼə̀ mmyàanə̀ nshwəŋə̀ lo, “Nɨ̀ chyə̂ a nɨ zhyə̂ lo ntwuumə̀ Nẅùə̀ wa nɨ à fuukə̀nə pə̀ənə̀ amwuə ngəʼə̀ ntô ambo pànə̀ nɨ ka pobə pə ghobə pɨ̀Jew. Pobə pɨ zuʼù!” 29[Tsaʼnə Pàolò à lə̀ shwəŋə̀nə a lenə la, pɨ̀Jew lə̀ furə̀ nɨ àzaŋə̀ ntɨŋmə̀, ntyiʼə̀ nsaʼnə̀ pobə nɨ pobə.] 30Pàolò à lə̀ pìʼnə̀ a nɨ chyə̂ amwuə ndâ nɨ à lə̀ mənə ntwuə̀ àtwuə̀ nɨ ze aŋunə nguʼu ɨpaa, ntyiʼə̀ mmə nkẅiirə̀ a ŋwùə̀ ntsùmə̀ nɨ à lə̀ tônə lo zəənə̀ e. 31À lə̀ mə nchwìitə̀ ntwuumə̀ mbə̀ʼə ànwùə̀ Nɨ̀fò Nẅùə̀ ambo pobə, nkɨ mmə nnèrə̀ a ghobə nɨ mɨ̀nwùə̀ mbə̀ʼə Ndòʼnə̀mbyə̂ Yěsû Kristù, nshwəŋnə̀ nɨ àkwùukə̀ ntɨŋmə̀ a sàŋə̀ sàŋə̀.
Currently Selected:
Ɨ̀fàʼà 28: pny
Highlight
Copy
Compare
Share
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy
