Röm 11
11
Lɑ̈mpyëw Jwøk ki Isrɑil
1 #
Pïl 3.5
Yɑ ceg-ɑ pëjjø kinni: Jwøk jie ɑ́bɑnye? Gï nuti bɑɑny en! Yɑn kiriɑ, yɑ bɑ wɑ̈d Isrɑil, kwɑɑr Abrɑhɑm, kì gøl Ben Yɑmïn. 2Jwøk jie nuti bɑɑny en, gen ɑ ji-ɑ ɑ́kwønge ki myegø. Møg-ɑ kømmi yi wɑ̈nyi kwërø ngɑ̈nyi yi wun, keny-ɑ ɑ́gøøny tyëng Isrɑil yï Jwøk yi Eliyɑ̀, ɑ ɑ́kööbe kinni, 3#1 Rɑ̈nhì 19.10, 14 “Wuö, jøtöng møgí bënn ɑ́nɑ̈g yi gen, kɑ këlli lɑm møgí cøør gen piny; yɑ ketɑ ɑ ɑ́döng, o ge dwɑdd-ɑ nɑ̈gi yɑn.” 4#1 Rɑ̈nhì 19.18 Kwøbbe ɑ́løøg ɑ dï yi Jwøk? Jwøk ɑ́löggi kinni, “Riɑ ɑ́wïyɑ ki jøg mø kwɑnni gen bɑ ɑ́lïp ɑ́bïryew, mø nuti mɑɑl Bɑɑl, jwøng-ɑ pɑth ki dyër.” 5Anɑn thyew, dɑ ji mø nøg, mɑ ɑ́yieny yi Jwøk kì bɑng dhwɑ̈ng-ɑ nyi kɑ̈ɑ̈l yïe. 6Myëg mee kɑ̈ɑ̈l-ɑ bɑng dhwɑ̈ng-ɑ kɑ̈ɑ̈l yïe, de pɑ køøl-ɑ kömi gïg-ɑ ɑ́gwøg yi tyëng-ɑ ɑ́myege. Mɑ́ keløg myëëg Jwøk di køøl-ɑ kömi gïg-ɑ gwøg yi ji, dhwɑ̈nge pɑ di bëëd ɑ́ dhwɑ̈ng-ɑ dyër.
7Dɑ́ kidï? Gïn-ɑ ɑ́yɑb yi tyëng Isrɑil nuti yood gen. Bɑ ɑkun-ɑ thiinh men-ɑ ɑ́yieny yi Jwøk ɑ ɑ́yodii, de teen-ɑ kyeelø ɑ́meng, kɑ cwöddi Jwøk ocögø gï pɑ lïngi yi gen. 8#Jølø 29.4; Icɑ 29.10 Nɑ kɑ̀ kööb wɑ̈nyi kwërø kinni, “Wɑ̈thi gen ɑ́gwøg ge gug yi Jwøk, kɑ pëthi gen gwøge ge nøg, kɑ gï mëgge nying mø pɑ nëënø, kí yïthh mø pɑ lïngø.” 9#Wör 69.22-23 (LXX) O Debïd okööbø kinni,
“Wiy ge rënyi yi gïgcɑmm-ɑ rëëj gen,
wiy ge pɑ̈nhhi gen, wiy ge cɑy.
10Wiy ge cør gen, o ge cög ge pɑ nëënø;
kɑ wiy ge tor gen yi ɑkørri gen kì yethi cyɑ̈ng bënn.”
11Yɑ ceg-ɑ pëjjø kinni, “Kɑ ɑ́bɑ̈jji tyëng Isrɑil kinøw, ge ɑ́di wiyø yi Jwøk ki mendwøng?” Ge nuti wiyø ki mendwøng! De kɑ ɑ́bɑ̈nyi gen ki yuu Jwøk, Jwøk wïje ɑ́løge be yieli tyëngpɑth ki Yeud. Møgɑni bɑ kipe kinni o tyëng Isrɑil mɑg yi tyiel kipe kɑ ɑ́kwɑɑny kɑ̈jji gen yi tyëngpɑth ki Yeud. 12Orøøg Yeud ɑ́kɑ̈ni kömi piny ki gyëdh mø døngø; o tyëngpɑth ɑ́yïddi ki gyëdh kì bɑng nøgi yïëyi Yeud. Kɑ̀ bëëd møgɑni kinøw, gyëdhhi Jwøk koo pëddi døngø keløg tyëng Isrɑil bënn óthumi ki dwöög kö Jwøk?
Yieli Tyëngpɑth ki Yeud
13-14De ɑnɑn, wun ɑ tyëngpɑth ki Yeud, yɑ köbb-ɑ wun kinni, yɑ bɑ jɑlwöödø kipe wun, o kwøbbi kɑ ɑ́yïëy wun nyii kømmø yi yɑn kì bøli Yeud, møg-ɑ bɑ wɑddi wøn. Kɑ ɑ́lïngi gen møgɑni, kɑ ge mɑg yi tyiel kì bɑng yïëyi wun. De kwï gen bɑ møg-ɑ ódwöög tung-ɑ di wun, o ge óyiel ceth. 15Mɑ́ keny-ɑ ɑ́bɑɑny gen, dhɑnhø bëne ɑ́mërri ki Jwøk. De óbëëd ɑ dï keny-ɑ óyïëëy gen? Óbëëd e nɑ dwöög wɑ̈g kì yij thøø!
16Keløg budi ópun mëgg-ɑ Jwøk, ópunɑni bëne bɑ mi Jwøk thyew; o keløg byeri yɑdh mëgg-ɑ Jwøk, bɑ̈ddi yɑnhɑni bɑ mø Jwøk thyew. 17Kwï bɑ̈ddi yɑdh dhetun men-ɑ ɑ́ceg ki pidhø ɑ́rum ki ngølø, kɑ ree mɑ̈gi ki bɑɑd yɑdh mɑ ɑ́kɑ̈ɑ̈l kì pɑ̈l. Wun ɑ tyëngpɑth ki Yeud, wu pɑ̈r ki bɑɑd yɑdh men-ɑ ɑ́kɑ̈ɑ̈l kì pɑ̈l, o ɑnɑn wu onywɑ̈gø wuki Yeud ki gyëdhh-ɑ ɑ́yod yi gen kì bɑng yïëyø. 18Tyëng-ɑ ɑ́ngøl ni bɑ̈ddi yɑdh ko benyí. Yï thwøg-ɑ dï, yï bëëd ɑ ri byerr, o pɑth ki byerr ɑ bëëdø kì rií?
19De yï ókööbø kinni, “Bɑ̈ddi yɑnhɑni ɑ́ngøl kɑ per kinni o yɑ mɑɑg kɑ̈jji gen.” 20Møgɑni bɑ dyër. Ge ɑ́ngøl kɑ per kɑ̀ nuti yïëëy gen, o yï bëëdø kì kenyɑni kɑ per kɑ ɑ́yïëëy. De yï ko thwøg kipe møgɑni, lɑ̈w keløg yï ceg-ɑ böggø. 21Yeud nuti wiyø yi Jwøk gï pɑ cɑye, ngö ɑ́ gen ɑ pɑ̈r dïl bɑ̈ddi yɑdh; yï orumø kinni yï ówiye yï pɑ cɑye? 22Anɑn, lidh døøji Jwøk geki keji pyëwe; pyëwe keej ki tyëng-ɑ ɑ́pɑ̈ɑ̈dh, de pyëwe med ki yïn, keløg yï ócög yï mɑ̈gø kì ree. De keløg yï pɑ mɑ̈gi kì ree, yï bɑ men ngøl piny thyew. 23Keløg Yeud ówïyø pëëmø, ge dwøøg-ɑ kɑ̈jj-ɑ ɑ́di gen; mɑ́ gïn ni menɑni ócuggø gwøgø yi Jwøk. 24Wu tyëng-ɑ pɑth ki Yeud, wu pɑ̈r ki bɑɑd yɑdh dhetun me twïyø kì pɑ̈l, kɑ ngøl piny; de nuti weddø; ɑ́kɑ̈ɑ̈l kɑ mɑɑg ri yɑdh dhetun men-ɑ ópidhø. Yeud pɑ̈r ki yɑnh-ɑ bɑ ɑpidh, o dwøøgi gen ri yɑnh-ɑ ɑ́ngul gen bɑ gïjø me gwøge yööd yi Jwøk.
Lɑ̈mpyëw Jwøk ki Ji Bënn
25Wun ɑ nyiimïɑ, yɑ pɑ dwɑddi kinni, o kwøbb-ɑ ɑkɑnn møgɑni bëëd ge kwïj yi wun, o wu mɑ̈ɑ̈ne rumø kinni wɑ̈thi wun pel. Kwøbb-ɑ ɑkɑnn møgɑni bɑ kinni, tegi muddi tyëng Isrɑil óthumi kì bɑng nyɑ keny me thiinh. 26#Icɑ 59.20 (LXX) O bene kër-ɑ óyieel Isrɑil bëne. Ni kɑ̀ kööb wɑ̈jji kwërø kinni,
“Yïëdi óbï e kɑ̈ɑ̈l-ɑ Dhɑyøn,
o rɑj ókɑ̈ɑ̈le wɑ̈g kì kelli kwɑrri Yɑgob.
27 #
Jer 31.33-34
Møgɑni ónywɑg yi wøki gen
kì bøli keny-ɑ ólɑ̈ɑ̈nyɑ orøøg gen.”
28Anɑn, kɑ̀ bɑɑny Wöndøj yi tyëng Isrɑil, pɑ̈r ki kinni, ge ɑ́mɑ̈ni ki Jwøk, kiper wun, wu tyëng-ɑ pɑth ki Yeud. De kì tung-ɑ kyeelø, ge mɑɑr yi Jwøk kì bɑng kweyyi gen, mɑ́ ge bɑ tyëng-ɑ ɑ́yieny yi Jwøk. 29Mɑ́ Jwøk gyëdhh-ɑ mëgge ngɑn-ɑ yieny yi en, pɑ nyi wɑɑre. 30Keløg ɑ́ per wun, wu tyëng-ɑ pɑth ki Yeud, dhø Jwøk ɑ́pyem yi wun cøn, de ɑnɑn, Jwøk pyëwe ɑ́lɑ̈ɑ̈m ki wun, kipe kɑ ɑ́pëëm tyëng Isrɑil. 31Ki yuu ni menɑni ceth, kì bɑng lɑ̈mpyëw men-ɑ ɑ́yod yi wun, ɑpyeem dhø Jwøk yi Yeud ɑnɑn, kipe kinni o pyëw Jwøk ólɑ̈ɑ̈me ki gen thyew. 32Mɑ́ ji bënn ɑ́göjji pëëmø yi Jwøk, kipe kinni o lɑ̈mpyëwe ónyodhe kì ri ji bënn.
Lenhi Jwøk
33 #
Icɑ 55.8
Kɑ̈ɑ̈r Jwøk dwøng nɑ ngø! Peli wïje geki dïde bong cögi gen! Bong dhɑnhø me cuggi yodi kër-ɑ nyi løøge kwøb geki yëth-ɑ gööge. 34#Icɑ 40.13 (LXX) Nɑ møg-ɑ kømmi yi wɑ̈nyi kwërø kinni,
“Á men ɑ ngɑ̈nyi rummi Jwøk?
Á men ɑ cuggi cïjii?
35 #
Ayub 41.11
Á men ɑ ɑ́pɑ̈nyii ki thödhø gïïpiny,
kipe kinni o gø ólonye ki thödhø?”
36 #
1 Kör 8.6
Mɑ́ gïg-ɑ nud bënn ɑ́cwɑ̈j-ɑ yi en; o gïïpiny bëne bëëd ɑ ree; gïn-ɑ́ møge. Wiy nyingi Jwøk lenhi gïti ɑtheer! Amen.
Currently Selected:
Röm 11: shkDCB
Highlight
Share
Copy
Want to have your highlights saved across all your devices? Sign up or sign in
Shilluk DC Bible © Bible Society in South Sudan, 2011.
