Kwɑn 36
36
Gïg-ɑ nyi Lɑg yi Mɑ̈nn-ɑ Ónywømø
1Jø gøl Gilyɑd wɑ̈d Mɑkir wɑ̈d Mɑnɑsè, wɑ̈d Yosep, ge ɑ́kedhi yï Mosɑ̀ geki jɑgg-ɑ kyeelø, 2#Kwɑn 27.7 kɑ ge okööbø kinni, “Yï ɑ́köbbi yi Jwøng-ɑ Ácwɑ̈ɑ̈j kinni i pɑ̈ngí piny kì kelli tyëng Isrɑil, e leng kɑ wél. Yï ɑ́köbbe thyew kinni i mëggí nyigi Dhelopekɑd ówï wøn piny wïyi gen. 3De lidh, keløg ge onywømø kì kɑl megø, pinyɑni ceg-ɑ gwøg ki mi gøl-ɑ ɑ́nyömi, kɑ piny-ɑ ɑ́mëggi wøn ónungø. 4Keny-ɑ óbëën Runi Dwöggø, piny Dhelopekɑd kedh-ɑ yï gøl-ɑ nywøm nyige, o pɑ yod yi wøn këti.”
5Codhe ɑmuuj cigg møg yi Mosɑ̀ ge kɑ̈ɑ̈l-ɑ yï Jwøng-ɑ Ácwɑ̈ɑ̈j kinni, “Møg-ɑ kømmi yi gøl Mɑnɑsè bɑ dyër, 6bene ɑ pere kööb Jwøng-ɑ Ácwɑ̈ɑ̈j kinni, nyigi Dhelopekɑd ócuggø nywømø yi cwøw-ɑ dwɑddi yi gen, de nywøøm gen yi kwɑrri Mɑnɑsè kweyi gen. 7Piny-ɑ muuj ɑ́ mi wïj kɑl kì Isrɑil cög ɑ́ mi gølɑni ceth. 8Nyɑndhɑjø men lɑ̈gi ki piny kì Isrɑil nywøm yi wïj gøl gen ceth, keny-ɑ ógwøøgii kinøw, ji ólɑg piny-ɑ bɑ mi kweyi gen kì Isrɑil, 9o piny kɑl nyi cöge ɑ́ mee ceth.”
10Kɑ møg-ɑ ɑ́köbbi Mosɑ̀ yi Jwøng-ɑ Ácwɑ̈ɑ̈j gwøg ceth yi nyigi Dhelopekɑd, 11Kɑ woɑni Mɑklɑ̀, Tirdhɑ̀, kí Oglɑ̀, kí Milkɑ̀ kí Nöö nywøm yi nyiiwï gen. 12Ge ɑ́nywøm yi kwɑrri Mɑnɑsè wɑ̈d Yosep, kɑ piny gen ocögø ɑ́ mi wïj gøl gen.
13Møgɑk bene gen cigg geki kwöng møg-ɑ ɑ́cïgi tyëng Isrɑil yi Jwøng-ɑ Ácwɑ̈ɑ̈j ki dhø Mosɑ̀, kì thwøri Moɑb, kì kömi Nɑm Urdun, kì bøli Yerikö.
Currently Selected:
Kwɑn 36: shkDCB
Highlight
Copy
Compare
Share
Want to have your highlights saved across all your devices? Sign up or sign in
Shilluk DC Bible © Bible Society in South Sudan, 2011.
