Kwɑn 32

Kɑ̈ll-ɑ Løøg Nɑm Urdun kì Wɑɑng Cyɑ̈ɑ̈ng Mwøl

(Jølø 3.12-22)

1Gøl Ruben kí gøl Gɑd yï gen ɑ́dɑ dhög mø gïïr, kɑ lidh yi gen kinni piny Yɑdher geki piny Gilyɑd bɑ kɑ̈jj mø døøj kipe jɑmmì. 2Akedhi gen yï Mosɑ̀ geki Eliɑdhɑr kí jɑggi Isrɑil møg-ɑ kyeelø, kɑ ge okööbø kinni, 3-4“Piny-ɑ ɑ́køny tyëng Isrɑil yi Jwøng-ɑ Ácwɑ̈ɑ̈j ki mɑge, kɑ gø mɑg gen, piny myërri Atɑröth, Dïbön, Yɑdher, Nimrɑ̀, Kicbön, Eleɑlè, Sibmɑ̀, Nebö kí Beön; bɑ piny me døøj kipe jɑmmì, o yï wøn dɑ jɑmmì. 5Wø kwɑjj-ɑ yïn, mëggí wøn pinyɑni ɑ́ mi wøn, wø ko wëggí kedhi løøg Nɑm Urdun.”

6Alöggi Mosɑ̀ kinni, “Wu dwɑdd-ɑ dööngø kì keny, o wɑddi wun kedhi gen be liny? 7Wude ɑ dwɑddu wëggi pëthi tyëng Isrɑil nyönhø, o ge bwøg gen ki kedhi piny-ɑ ɑ́mëggi gen yi Jwøng-ɑ Ácwɑ̈ɑ̈j? 8#Kwɑn 13.17-33 Bene gïn-ɑ ɑ́gwøg yi wëëg wun ɑnɑn keny-ɑ ɑ́örɑ gen be lyewwi piny, teedø ying-ɑ Gɑdic Berniyɑ̀. 9Akedh gen kɑ ge wɑ̈dh-ɑ Töör Acköl, ɑdwöög gen kɑ teedø pɑng yi gen ki kwøbbi pyed, ɑdhɑ̈li ji ki kedhi piny-ɑ ɑ́mëggi gen yi Jwøng-ɑ Ácwɑ̈ɑ̈j. 10#Kwɑn 14.26-35 Jwøng-ɑ Ácwɑ̈ɑ̈j pyëwe ɑ́ceg rënyø kì cyɑ̈ngɑni, ɑkööbe kinni, 11“Yɑ ɑ́köngi kinni bong dhɑnhø men-ɑ ókedhi pinyɑni, ngɑn runne bɑ pyɑ̈r ɑ́ryew gïti mɑl, ɑ løg tyëng-ɑ ɑ́kɑ̈ɑ̈l Rïp, ge pɑ kedhi piny-ɑ ɑ́mëggɑ Abrɑhɑm, kí Isɑɑk, kí Yɑgob, mɑ́ ge ɑ́bɑ̈nyi lïngi kwøbbɑ.” 12Kɑ döng ɑ́ Kɑlib wɑ̈d Yepunɑ̀ geki Jöcwø wɑ̈d Nun, mɑ́ gen ɑ ɑ́mïdhi kwøbbi Jwøng-ɑ Ácwɑ̈ɑ̈j. 13Jwøng-ɑ Ácwɑ̈ɑ̈j pyëwe ɑ́ceg-ɑ rënyø ki ji, ɑkölle ji twɑ̈lø kì yij ryɑng ki runn pyɑ̈r ɑ́ngwen, gïti kɑ ɑ́thumi jøgɑni ki thøø bënn. 14Anɑn wu dwɑdd-ɑ døøg kej wëëg wun, wun ɑ́ rïj me rɑj, men cigi kɑ̈ni kömi Isrɑil ki ryɑ̈g, keny-ɑ órënyi pyëw Jwøng-ɑ Ácwɑ̈ɑ̈j? 15Keløg wu óbɑ̈nyø ki lugø kì bɑng Jwøng-ɑ Ácwɑ̈ɑ̈j, wu gøl Ruben kí gøl Gɑd, Jwøng-ɑ Ácwɑ̈ɑ̈j pyëwe ceg-ɑ rënyø ki ji møg bënn, kɑ gï wiye piny kì yij ryɑng men, ji thuw-ɑ gööj wun.”

16Alöggi gen kinni, “Wiy dyëgi wøn gëddi yi wøn ki kyell, o wø gëëd wøn ki kɑ̈ddi dör kipe mɑ̈nni wøn geki nyigi wøn kì keny. 17Codhe o wø kedhi wøn be liny wøki wɑddi wøn, tyëng Isrɑil gïti keny-ɑ óthumi piny-ɑ bɑ mi gen ki mɑgø. O keny-ɑ óying wøn kej liny, pëthi wøn ócög ge pɑ lïngø kipe jɑmmi wøn geki nyigi wøn, mɑ́ ge ɑ́gëddi ki kɑ̈jj-ɑ pɑ yood gen yi tyëng pönhï. 18Wø pɑ dwöög pɑc gïti keny-ɑ órum tyëng Isrɑil møg-ɑ kyeelø ki mɑgi kɑ̈jji gen. 19Wø pɑ kɑ̈bbi ki piny kì løøg Nɑm Urdun, mɑ́ wø ɑ́rum ki kɑ̈bbø kì løøng-ɑ wɑɑng cyɑ̈ɑ̈ng mwøl èn.”

20Alöggi Mosɑ̀ kinni, “Keløg wu kømm-ɑ dyër, gwir wun ri wun kipe liny ɑnɑn kì bøli Jwøng-ɑ Ácwɑ̈ɑ̈j. 21Bɑ̈ɑ̈n wun Nɑm Urdun wuki jøliny wun, kɑ wu nyïɑ̈ggi wun ki tyëngmɑ̈ɑ̈nø gïti keny-ɑ ótyɑɑm tyëngɑni yi Jwøng-ɑ Ácwɑ̈ɑ̈j, 22Kɑ pinyɑni kwɑnye. Orume, o wu dwöög wun, e kwöör wun løøgø kì bøli Jwøng-ɑ Ácwɑ̈ɑ̈j, kí bøli tyëng Isrɑil. Codhe o Jwøng-ɑ Ácwɑ̈ɑ̈j yïëye kinni piny-ɑ løøg Nɑm Urdun kì wɑɑng cyɑ̈ɑ̈ng mwøl bɑ mi wun. 23De yɑ köbb-ɑ wun kinni keløg wu koo cungi kì kömi dhøggi wun, ngɑ̈ny wun wøw kinni wu ɑ́røngi kì bøli Jwøng-ɑ Ácwɑ̈ɑ̈j. O wu pɑ bødh ki cɑyø yi Jwøng-ɑ Ácwɑ̈ɑ̈j kipe orøngɑni. 24Gëddu nyigi wun ki kɑ̈dd, kɑ dyëgi wun gëddi wun ki kyell, kɑ wu cungi wun kì kömi dhøggi wun ceth!”

25Kɑ gøl Gɑd geki gøl Ruben okööbø kinni, “Møg-ɑ ɑ́kwøb yi yïn ógwøg yi wøn, jɑldwøng! 26Mɑ̈nni wøn kí nyigi wøn kí dhögi wøn, ge ódöng kì myërri Gilyɑd keny. 27De wø kedh-ɑ be liny Jwøng-ɑ Ácwɑ̈ɑ̈j, Nɑm Urdun óbɑ̈ɑ̈n yi wøn, wø kedh-ɑ be nyɑɑg ni men-ɑ ɑ́kwøb yi yïn.”

28 # Jöc 1.12-15 Aceg ókwërø Eliɑdhɑr, kí Jöcwø wɑ̈d Nun geki jøg-ɑ jɑgg yi Mosɑ̀ kinni, 29“Keløg jø gøl Gɑd kí gøl Ruben Nɑm Urdun óbɑ̈ɑ̈n yi gen, kɑ ge kedh-ɑ be nyɑɑg ni møg-ɑ ɑ́ceg yi Jwøng-ɑ Ácwɑ̈ɑ̈j, kɑ wu køny yi gen ki mɑgi pinyɑni, mëggu gen piny Gilyɑd ɑ́ mi gen. 30De keløg ge pɑ nyïɑ̈ggi kyeel ki wun, ge ónëng ɑ Kɑnɑɑn ki piny ni wun.”

31Alöggi jø gøl Gɑd geki gøl Ruben kinni, “Møg-ɑ ɑ́kwøb yi Jwøng-ɑ Ácwɑ̈ɑ̈j ógwøg yi wøn, jɑldwøng. 32Nɑm Urdun óbɑ̈ɑ̈n yi wøn, kɑ wø kedh-ɑ piny Kɑnɑɑn be nyɑɑg ki liny Jwøng-ɑ Ácwɑ̈ɑ̈j, de piny wøn ying-ɑ løøg Nɑm Urdun løøng.”

33Codhe, kɑ Mosɑ̀ piny Rɑ̈dh Sïön rɑ̈ɑ̈dh tyëng Amör, geki piny Og rɑ̈ɑ̈dh Bɑcɑn kí kɑ̈ddi gen, kí myërri gen mëgge gøl Gɑd kí gøl Ruben geki budi gøl Mɑnɑsè wɑ̈d Yosep. 34-36Kɑ kɑ̈ddi dör, ɑ løg Dïbön, kí Atɑröth kí Aröeer, kí Atröth Cöpɑn, kí Yɑdher, kí Yogbeɑ̀. Kí Bet Nimrɑ̀, kí Bet Arɑn døøg ki gerø yi gøl Gɑd. 37-38Kɑ Kicbön, kí Eleɑlè, kí Kiriɑtɑim, kí Nebö, kí Bɑɑl Meon (nyingɑni ɑ́wil), kí Sibmɑ̀, ge døøg ki gerø yi gøl Ruben. Kɑ̈dd-ɑ ɑ́døøg ki gerø yi gen, ɑ́cɑ̈ggi yi gen ki nying mø nyɑ̈n.

39Kɑ gøl Mɑkir wɑ̈d Mɑnɑsè Gilyɑd mɑnye, kɑ tyëng Amör møg-ɑ ɑ́ying yije cyedde, kɑ pëgg-ɑ yije. 40Codhe, ɑmëggi gøl Mɑkir Gilyɑd yi Mosɑ̀, kɑ gølɑni pëgg-ɑ yije. 41Akedh Yɑir wɑ̈d Mɑnɑsè, kɑ ómɑ̈gø kí myërr møøgø, ɑcɑge myërrɑni gɑ “Myërri Yɑir.” 42Kɑ Nöbɑ̀ ókedhø, ɑpɑ̈ɑ̈re kömi kɑɑl Kenɑth kɑ gø mɑge. Acɑge gøn ɑ́ Nöbɑ̀ ni nyinge.

Currently Selected:

Kwɑn 32: shkDCB

Highlight

Copy

Compare