Kwɑn 20
20
Gïg-ɑ Ácwöb kì Gɑdic
(Kedhø 17.1-7)
1Kɑ tyëng Isrɑil bënn wɑ̈dh-ɑ pɑ̈ɑ̈l Sin, kɑ ge ogudø kì Gɑdic.
Kɑ Miryɑm othøø kɑ kony kì kenyɑni. 2Ábong-ɑ pï kì keny-ɑ ɑ́guddi yi gen, codhe kɑ teedø ri gen cøng gen buti Mosɑ̀ geki Aɑron. 3Aköör gen kì wïj Mosɑ̀ ge okööbø kinni, “Di løg me lɑ̈w ke di thøw wøn, kì bøli Kemi Kwëër Jwøng-ɑ Ácwɑ̈ɑ̈j kyeel ki wɑddi wøn tyëng Isrɑil møg-ɑ ɑ́thøw. 4Wøde ɑ ɑ́kɑ̈ɑ̈l wøn yij ryɑng keny? Wø ɑ́kɑ̈ɑ̈lí be thøø wøki dhögi wøn? 5Wøde ɑ ɑ́kɑ̈ɑ̈l wøn wɑ̈g kì Rïp, ɑ kɑ̈ɑ̈l wøn keny-ɑ rɑj ni men, keny bong gïn twïy kì yije? Bong byel, bong nywøli yenh møg cɑm, o men-ɑ́ bong pïg mɑdh!” 6Kɑ Mosɑ̀ odhwödhø kì buti teedø, kɑ ge kedh-ɑ dhø Kemi Kwër geki Aɑron. Kɑ wɑ̈thi gen kuul gen piny bøli gen ónywɑ̈ddø’ piny, kɑ mɑ̈ɑ̈r Jwøng-ɑ Ácwɑ̈ɑ̈j omënyø kì kömi gen.
7Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, 8“Kwɑny lonh-ɑ bøli Sɑnduug Cigg, kɑ teedø bënn cwööl, wuki Aɑron, kɑ nyɑ kïn-ɑcɑ̀ köbbi wun, ge olïngø kinni, kɑ̈ne wɑ̈g ki pïge. Yï ókɑ̈ni wɑ̈g ki pï kì kenyɑni, kɑ ge omɑ̈dhø geki dhögi gen.” 9Akedh Mosɑ̀ kɑ lodh dwɑɑye ni kɑ ɑ́köbbii yi Jwøng-ɑ Ácwɑ̈ɑ̈j.
10Kɑ Mosɑ̀ geki Aɑron teedø bëne cwøøl gen buti nyɑ kït, kɑ Mosɑ̀ okööbø kinni, “Anɑn lïng wun tyëngpëëmø, kɑ̈ni wøn wɑ̈g ki pï kì ri nyɑ kït men kiper wun?” 11Codhe ɑgøøj nyɑ kïnɑni yi Mosɑ̀ ki lodhe tyel ɑ́ryew, kɑ pïngø ceg-ɑ ì bɑɑw kì wɑ̈g kì ri nyɑ kït, kɑ teedø bëne omɑ̈dhø geki jɑmmi gen.
12De Mosɑ̀ geki Aɑron ge ɑ́cyɑ̈r yi Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j ɑ́kööb kinni “Mɑ́ yɑ nuti yïëëy wun, kɑ yɑ ocögø yɑ pɑ kwër yi wun kì bøli tyëng Isrɑil, ge koo peej-ɑ yi wun piny-ɑ ɑ́mëggɑ gen.”
13Møgɑni ɑ́cwöb-ɑ Merïbɑ̀,#20.13 Merïbɑ̀: Nyingɑni wɑng-ɑ “kejkøør” ki dhøg Ibru. mɑ́ tyëng Isrɑil ɑ́köör kì ri Jwøng-ɑ Ácwɑ̈ɑ̈j kì kenyɑni, ɑnyudhe ree gen kinni bɑ Kwërø.
Bɑ̈nyi Rɑ̈ɑ̈dh Edöm ki Bɑ̈ɑ̈ni Isrɑil Pinye
14Mosɑ̀ ɑ́öd kì Gɑdic ki jøg mø kedhi yï rɑ̈ɑ̈dh Edöm, o gø köbbi gen kinni, “Wø nyiiwöw, tyëng Isrɑil wø okööbø kinni, orɑng-ɑ ɑ́rɑngi wøn ngɑ̈nyi yi yïn, 15kër-ɑ ɑ́dhwödh kweyyi wøn, kɑ ge dɑ̈g-ɑ Rïp, kun-ɑ ɑ́bëëd wøn ki runn mø gïïr, thyew nyingi wøn ɑ́guud yi tyëng Rïp, 16ɑywøøg wøn kö Jwøøg wøn, Jwøng-ɑ Ácwɑ̈ɑ̈j, ɑlïnge, ɑöre wëywön-ɑ ɑ́pëëj wøn wɑ̈g kì Rïp. Anɑn wø ying-ɑ Gɑdic kɑɑl-ɑ tøg pödhí. 17Wø kwɑjj-ɑ yïn wiy wø bɑ̈ɑ̈n wøn pinyí. Wø pɑ kɑ̈l yij pwödhø, wø pɑ kɑ̈l yij bɑg, de wø óbødh yöö,#20.17 yöö; wɑlɑ̀ yuu wëll. Yuuɑni ɑ́bëëd thyew, e nyi cwøl ɑ́ yuu rɑ̈dh. wø pɑ rudi tuung kyëj wɑlɑ̀ tuung cɑɑm gïti keny-ɑ ópöödh wøn myërrí, o wø pɑ mɑ̈dhi ki pï kì yethi yïïthi wun.”
18De tyëng Edöm ɑ́löggi kinni, “Wø ɑ́bɑ̈nyi, wu pɑ kɑ̈l yij piny wøn. Keløg wu óbï, wɑ ceg-ɑ nyɑɑg.”
19Kɑ tyëng Isrɑil okööbø kinni, “Wø óbødh yöö, de keløg wø ómɑ̈dhi ki pï wɑlɑ̀ gïg-ɑ kwølli yi wøn ómɑ̈dhø, pïgɑni ceg kɑ colø yi wøn, gïn-ɑ dwɑddi yi wøn bɑ bɑ̈ɑ̈ni piny yøw.”
20Kɑ tyëng Edöm cig-ɑ kwøb kinni, “Wø ɑ́bɑ̈nyi!” Kɑ ge odhwödhø gɑ yɑy me dwøng ge kedh-ɑ be nyɑɑg ki tyëng Isrɑil. 21Codhe, ɑkëjji tyëng Isrɑil ge kɑ̈ll-ɑ yöö megø, mɑ́ ge ɑ́mɑ̈ɑ̈n bɑ̈ɑ̈ni piny Edöm yi tyëng Edöm.
Thøwi Aɑron
22Tyëng Isrɑil ɑ́dhwödh bënn kì Gɑdic kɑ ge wɑ̈dh-ɑ Kïti Ör, 23ki tøg piny Edöm. Codhe, ɑköbbi Mosɑ̀ geki Aɑron yi Jwøng-ɑ Ácwɑ̈ɑ̈j kinni, 24“Aɑron pɑ kedhi piny-ɑ ɑ́kwøb yi yɑn kinni mëggɑ’ tyëng Isrɑil, ceg-ɑ thøø, mɑ́ dhøgɑ ɑ́pyem yi wun ryeet kì Merïbɑ̀. 25Kïdhí Aɑron wïj Kïti Ör geki Eliɑdhɑr wɑ̈de, 26Kɑ ógudhi kwër mø Aɑron luny wɑ̈g, kɑ ge løny ri Eliɑdhɑr kì kunɑni. Aɑron thøw-ɑ kunɑni ceth.” 27Kɑ møg-ɑ ɑ́kwøb yi Jwøng-ɑ Ácwɑ̈ɑ̈j gwøg yi Mosɑ̀. Ge ɑ́yedhi wïj Kïti Ör ge onennø yi teedø bëne, 28#Kedhø 29.29; Kwɑn 33.38; Jølø 10.6 ɑluny ógudhi kwër wɑ̈g yi Mosɑ̀ kì ri Aɑron, kɑ gï lønye ri Eliɑdhɑr. Kɑ Aɑron othøø kì wïj kït kunɑni. Adwöög Mosɑ̀ piny geki Eliɑdhɑr. 29Áyod yi tyëng Isrɑil kinni Aɑron thøø, ɑywøøgii yi teedø ki cyɑ̈ng pyɑ̈r ɑ́dɑ̈g.
Currently Selected:
Kwɑn 20: shkDCB
Highlight
Copy
Compare
Share
Want to have your highlights saved across all your devices? Sign up or sign in
Shilluk DC Bible © Bible Society in South Sudan, 2011.
