Kedhø 4

Thödhi Mosɑ̀ yi Jwøk ki Tegø Mɑ Ngɑ̈ngø

1Kɑ kwøbbi Jwøng-ɑ Ácwɑ̈ɑ̈j løøg yi Mosɑ̀ kinni, “De keløg tyëng Isrɑil óbɑ̈nyi ki yïëyø, kɑ ge ódhɑ̈lø lïngi kwøbb-ɑ óköbbɑ gen, göögɑ kidï, keløg ge ókööbø kinni yï nuti cwöbø kì bølɑ.”

2Apyëjii yi Jwøng-ɑ Ácwɑ̈ɑ̈j kinni, “Á ngø ɑ cingí ɑnɑn?”

Kɑ Mosɑ̀ okööbø kinni, “Lodh.”

3Kɑ Jwøng-ɑ Ácwɑ̈ɑ̈j okööbø kinni, “Leeng piny.” Kɑ gø leenge piny. Kɑ ree løge thwöl, kɑ Mosɑ̀ reng-ɑ cyɑ̈n. 4Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Rïj cingí kɑ mɑɑg kì yëbe.” Kɑ cinge rïïje, ɑmɑge gøn, kɑ ree løge lodh kì cinge. 5Kɑ Jwøng-ɑ Ácwɑ̈ɑ̈j okööbø kinni, “Gwøg møgɑni kipe kinni o ge yïëy gen kinni, bɑ Jwøøg kweyyi gen; Jwøøg Abrɑhɑm, kí Isɑɑk, kí Yɑgob ɑ ɑ́cwöb kì bølí.”

6Kɑ köbbi yi Jwøng-ɑ Ácwɑ̈ɑ̈j këti kinni, “Cød cingí thɑ ógødhí.” Kɑ cinge cøde, kɑ gø dwööge wɑ̈g e tɑr nɑ ɑ́piy. 7Aköbbe gøn kinni, “Dwøøg cingí thɑ ógødhí.” Adwøøge gøn, kɑ gø dwööge wɑ̈g e pɑ̈ɑ̈rø ki dële. 8Kɑ Jwøng-ɑ Ácwɑ̈ɑ̈j okööbø kinni, “Keløg ge pɑ yïëy ki kwøbbí, wɑlɑ̀ ge pɑ yïëy ki ngïji tyeli mɑl, ge óyïëy ki ngïny-ɑ kyeelø. 9Ocög ge pɑ yïëy ki ngïjjɑni ryeet, kɑ yï kɑ̈bbí ki pïi Kiir, kɑ ge køny piny keny-ɑ thwøwø. Pïgɑni ceg-ɑ gwøg gɑ remø.”

10Kɑ Mosɑ̀, Jwøng-ɑ Ácwɑ̈ɑ̈j köbbe kinni, “Wuö, yɑ kwïj kwøb kër-ɑ ɑ́pïïdhɑ gïti kɑ̀ kööb wɑ ɑnɑn, mɑ́ dhøgɑ peeg geki lebɑ.”

11Aköbbii yi Jwøng-ɑ Ácwɑ̈ɑ̈j kinni, “Á men ɑ ɑ́göggi dhɑnhø ki dhøg? O bɑ men ɑ nyi løg dhɑnhø ming, wɑlɑ̀ ɑ nyi wëggii dhɑ̈lø ki kwøb; ɑ nyi løg dhɑnhø ngɑn nëënø wɑlɑ̀ cwør, pɑth ki yɑn, yɑ Jwøng-ɑ Ácwɑ̈ɑ̈j? 12Anɑn kedh, dhøgí ókøny yi yɑn ki kwøb, o yï ópwönyi yi yɑn ki møg-ɑ ókømmi yi yïn.”

13Kɑ Mosɑ̀ okööbø kinni, “Yɑ kwɑjj-ɑ yïn Wuö, öd ki ngɑn megø.”

14Kɑ Jwøng-ɑ Ácwɑ̈ɑ̈j mɑg yi liny ki Mosɑ̀. Kɑ okööbø kinni, “Aɑron pɑth ki ómyëw? Ngɑ̈nyi yi yɑn kinni nyii kööbø kidøøj. Bï-ɑ be yïddø ki yïn ɑnɑn, o pyëwe ómïni keny-ɑ ólidhe yïn. 15Wu ókööbø ki en, kɑ köbbí møg-ɑ ókwøbe, wu ókøny yi yɑn ki kwøb, o gïg-ɑ ógwøg yi wun, óköbbɑ wun. 16En ɑ ókööbø ki ji ɑ́ kej dhøgí, o yï óbëëdø yï bɑ kej Jwøk kì yïe. 17Kɑ lodh men kɑ̈llí kì cingí, en ɑ ógöög yi yïn ki gïïngɑ̈ngø.”

Døøgi Mosɑ̀ Rïp

18Kɑ Mosɑ̀ ókedhø, kɑ døøg-ɑ yï Yethrø øre, kɑ gø köbbe kinni, “Yɑ kwɑjj-ɑ yïn, wiy yɑ døøgɑ yï wɑddi wøn møg-ɑ Rïp, o ge lidh yi yɑn mɑ nudd ge onëënø.” Kɑ Mosɑ̀ köbbi yi Yethrø kinni, “Kedh ki mër.”

19Kɑ Mosɑ̀ köbbi yi Jwøng-ɑ Ácwɑ̈ɑ̈j kì Midyɑn kinni, “Kedh, døøg Rïp, tyëng-ɑ ɑ́dwɑddi nɑ̈gi yïn ɑ́thøw bënn.” 20Kɑ Mosɑ̀ cyëge kwɑnye geki wɑ̈dde, kɑ gï cïbe kömi ɑderø, codhe, kɑ døøg-ɑ piny Rïp, loodh Jwøk okɑ̈llø yi en kì cinge.

21Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Kedhí Rïp, gwøg gïïngɑ̈ngø møg-ɑ ɑ́cïbɑ cingí kì bøli rɑ̈dh, de pyëwe ógwøgɑ e teeg, o ji cög gï pɑ wëgge kedhø. 22Kɑ rɑ̈dh köbbí kinni, Jwøng-ɑ Ácwɑ̈ɑ̈j ɑ́kööb kinni, ‘Isrɑil bɑ wɑ̈dɑ, wɑ̈n-ɑ kɑyø. 23#Kedhø 12.29 Yï ɑ́köbbɑ kinni, gøny wɑ̈dɑ o yɑ mɑlle, kɑ yï óbɑ̈nyø ki gønyii, kì bɑng menɑni, wɑ̈dí wɑ̈n-ɑ kɑyø nɑ̈gɑ’ nɑ̈gø.’ ”

24Kì keny-ɑ ɑ́nïni yi gen ge kedh-ɑ Rïp, ɑrøøm Mosɑ̀ geki Jwøng-ɑ Ácwɑ̈ɑ̈j, kɑ Mosɑ̀ gø dwɑdde nɑ̈gø. 25-26Kɑ Dhiporɑ̀ ókɑ̈bbø ki óbɑyi kït me thiinh, kɑ gø ngøle wɑ̈de, kɑ dël-ɑ ɑ́ngule wɑ̈g gɑ̈ɑ̈je ri tyelli Mosɑ̀, kipe kwööng ngøl. Akööb Dhiporɑ̀ kinni, “Yï bɑ jɑlnywööm remø kì yïɑ.” Codhe kɑ Mosɑ̀ wiy yi Jwøng-ɑ Ácwɑ̈ɑ̈j.

27Kɑ Aɑron köbbi yi Jwøng-ɑ Ácwɑ̈ɑ̈j kinni, “Kedhí be pɑɑri Mosɑ̀ yij pɑ̈l.” Kɑ ókedhø, ɑyode gøn kì Kïti Jwøk. Kɑ gø mɑ̈dhe, gø nuume’ nuumø. 28Kɑ Aɑron köbbi yi Mosɑ̀ møg-ɑ ɑ́kwøb yi Jwøng-ɑ Ácwɑ̈ɑ̈j, kí gïg-ɑ per gen ɑ́örii, kí gïïngɑ̈ngø møg-ɑ ɑ́köbbii kinni gwøge gïn. 29Kɑ Mosɑ̀ ókedhø geki Aɑron, kɑ jøgdøngi Isrɑil cøng yi gen. 30Kɑ kwøbb-ɑ ɑ́köbbi Mosɑ̀ yi Jwøng-ɑ Ácwɑ̈ɑ̈j lwøb yi Aɑron bënn, kɑ gïïngɑ̈ngø møgɑni gwøge kì bøli jøgɑni. 31Kɑ teedø oyïëyø. Keny-ɑ ɑ́lïng gen kinni Jwøng-ɑ Ácwɑ̈ɑ̈j ɑ́bï yï gen, kɑ guun-ɑ guud nyingi gen lidh yi en, ɑbøødh gen ri gen piny, kɑ mɑl yi gen.

Currently Selected:

Kedhø 4: shkDCB

Highlight

Copy

Compare