Kedhø 30

Këli Bɑkur

(Kedhø 37.25-28)

1“Göög ki këli bɑkur, gwøøg ki yɑdh ɑ́lwiy. 2Gwøg ɑ́ óbɑr, bɑ̈re bɑ sentimïtïr pyɑ̈r ɑ́ngwen wïdɑ́bïj, o lɑ̈je bɑ sentimïtïr pyɑ̈r ɑ́ngwen wïdɑ́bïj, o döre bɑ sentimïtïr pyɑ̈r ɑ́bïngwen, o yïe dɑ tùng mø bɑ ɑkøj kì ri yɑnhɑni. 3Kɑ wïje mɑl, kí nyingi ngëdde, kí tùnge gøøj ki dhɑm dhïw. Kɑ ween ki dööli dhɑb. 4Kɑ ree göddi ki yëlli dhɑb ɑ́ryew møg nyi kɑ̈llii ki lødh. 5Gwøg lødhɑni gɑ yɑdh ɑ́lwiy, kɑ ge gøøj ki dhɑb. 6Kɑ këli bɑkur cïb bøli gëng, e rwööm ki Sɑnduug Cigg, ɑ yije di ópɑ̈nni cigg pyɑ̈rø, e rwöm ceth ki kum Sɑndug, keny-ɑ nyi yïddi wɑ. 7O köme nyi rɑ̈ɑ̈b yi Aɑron ki bɑkur kì mwøl yethi cyɑ̈ng bënn, kenyi kedhe be nɑ̈gi lɑ̈mbɑ̈ɑ̈. 8Nyi døøge’ rɑ̈b ki bɑkur kì böörø kenyi kedhe be cwinyi lɑ̈mbɑ̈ɑ̈, codhe, o bɑkur nyi duunge kì bølɑ yethi cyɑ̈ng bënn, kì ri rïjj bënn. 9Ko di bɑkur me pɑth ki mi kwër men rɑ̈b kì këlɑni, kɑ ko di kenø me rɑ̈b kì köme, ying-ɑ́ rïngø wɑlɑ̀ byëlø, kɑ ko di gïn køny wïje. 10Nyi kwër yi Aɑron tyelø ɑ́kyel kì yij run, o dhïwe. Nyi kwër ceth kì yethi rïjj bënn. Nyi kïnye ri tùnge ki remi gëdhhi orøg. Këlø menɑni bene kej kwër-ɑ dwøng kì yïɑ.”

Gwɑ̈ɑ̈j Kemi Kwër

11Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, 12“Keny-ɑ ókwɑɑn tyëng Isrɑil, muuj dhɑnhø ki gïn gøøme wëye kipe ri gen ókedhi yi gïnrɑj keny-ɑ ókwɑɑn gen. 13#Kedhø 38.25-26; Mt 17.24 Muuj ngɑn-ɑ kwɑɑn kelli ji ki ngyëny ɑ́tegg ge røm kɑ rumi kej kwër. 14Ngɑn-ɑ kedhi yethi kwɑn, cɑg kì ri ngɑn runne bɑ pyɑ̈r ɑ́ryew gïti mɑl, ceg-ɑ muujø ceth e thödh-ɑ Jwøng-ɑ Ácwɑ̈ɑ̈j. 15Kɑ ngetikɑ̈r ko muuj ki møg ngenyø kibøli ngɑn wɑnge cɑn, wɑlɑ̀ ngɑn wɑnge cɑn ko muuj ki møg nøg, mɑ́ e bɑ men mëggi Jwøng-ɑ Ácwɑ̈ɑ̈j, ɑ́ men gøøm bøli wëyi wun. 16O ɑ́tegø men-ɑ cøng yi yïn kì yï tyëng Isrɑil bëëde ɑ́ men nyi ngëëw ki jɑmm-ɑ dwɑddi kipe Kemi Kwër. O óbëëde ɑ́ pɑɑr kì bøli Wïi wun kinni, tyëng Isrɑil bøli wëyi gen ɑ́gøøm.”

Átɑɑy Dilɑl

17Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, 18#Kedhø 38.8 “Göög ki ɑ́tɑɑy dilɑl, o dööli thɑre bɑ dilɑl thyew, kɑ cïb kɑɑm Kemi Kwër geki këli lɑm, kɑ pɑ̈ng ki pï, 19o yije nyi kɑ̈bbi yi Aɑron geki wɑ̈dde ki pïg nyi lwøg gen cinggi gen geki tyelli gen, 20kenyi bëën gen ge kedh-ɑ yij Kemi Kwër, wɑlɑ̀ kenyi wɑ̈dhi gen buti këli lɑm, kenyi bëëd e dɑ gïn muuj ɑ́ men rɑ̈bbi Jwøng-ɑ Ácwɑ̈ɑ̈j. 21Nyi lwøg gen cinggi gen geki tyelli gen, kipe ge óthøw. Mïdhi gen ciggɑni, cɑg ɑnɑn gïti ɑtheer.”

Møøw Röny

22 # Kedhø 37.29 Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, 23“Kɑ̈bbí ki ryɑ̈ɑ̈ møg-ɑ yømi gen pëddi medø, gɑ røthøl pyɑ̈rø wïdɑ́dɑ̈g kí budi røthøl; kí ryɑ̈ mor me dhïw, me bɑ cɑ̈wwì. Kí røthøl ɑ́bïryew mø møøw sinɑmön, kí røthøl ɑ́bïryew mø lùm-ɑ yømi gen med. 24Kí møøw kɑsiyɑ̀ ɑ́ røthøl pyɑ̈rø wïdɑ́dɑ̈g kí budi røthøl, kí røthøl ɑ́bïdɑ̈g mø møøw dhetun men-ɑ dhïw, røm gen bënn ki rumi kej kwër. 25Kɑ ge gwøg gɑ møøw gïïnyø me yøme med, gwøg yi bødhø me cinge døj, o bëëde e bɑ møøw gïïnyø mi kwër. 26Gïny Kemi Kwër geki Sɑnduug Cigg ki møwɑni. 27Kɑ tɑrɑbedhɑ̀ mi gïncɑm gïïny geki jɑmme bënn, kɑ teggi lɑ̈mbɑ̈ɑ̈ gïïny geki jɑmmi gen bënn. Kɑ këli bɑkur gïïny. 28Kɑ këli lɑm gïïny geki jɑmme bënn, kɑ ɑ́tɑy gïïny geki dööli thɑre. 29Kwër gen bënn, o ge göög gen ki jɑmmi Kwëër Dwøng, o gïn nywɑl gen ceg-ɑ gwøg ki gïi kwër. 30Kɑ Aɑron gïïny thyew geki wɑ̈dde; kwër gen gɑ ókwërrɑ. 31Kɑ wɑ̈ddi Isrɑil köbbí kinni, menɑni bɑ møwɑ, møøw kwër men nyi gïïny kì ri rïjj bënn gïti ɑtheer. 32Ko gïïny dhɑnhø megø, o ko di møw me gwøg e nɑ en, mɑ́ e bɑ ɑkwër, bëëde ceth ɑ́ ɑkwër kì yï wun. 33Ngɑn-ɑ ógöögø ki men ni en, wɑlɑ̀ ngɑn kwɑny møwɑni kɑ gø gïnye, e pɑth ki ókwërø, ngøl ngɑnɑni wɑ̈g kì kelli jie.”

Bɑkur

34Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Kɑ̈bbí ki yenh-ɑ yømi gen med, kwɑny gen kɑ ge røm ge pɑ̈r bënn, kì ri meɑ̀, kí ɑniicɑ̀, kí gïïnɑ̀, kí lubɑn, 35reb gen, kɑ ge gwøøg gɑ bɑkur, me bɑ ɑyöl ki døøji cingø, e thøø yi gwirø kidøøj ɑ́ ɑkwër. 36Guur kwëe ɑ́ búr, kɑ kwëe cïb bøli Sɑnduug Cigg kì yij Kemi Kwër, keny-ɑ nyi yïddi wɑ. Bëëd bɑkurɑni ceth ɑ́ gïi kwër me pere teg kì yï wun. 37De keny-ɑ ógwøøg bɑkur menɑni, ri wun ko göggi wun ki men ni en, bëëde ɑ́ ɑkwër ceth kì yï wun, ɑ́ mi Jwøng-ɑ Ácwɑ̈ɑ̈j. 38Ngɑn-ɑ ógöögø ki men ni en, ngøl wɑ̈g kì kelli jie.”

Currently Selected:

Kedhø 30: shkDCB

Highlight

Copy

Compare