Kedhø 22

Ciggi Col

1“Keløg dhɑnhø ókwɑ̈ddø ki wɑdh, wɑlɑ̀ órömø kɑ gø ngɑle, wɑlɑ̀ kɑ gø ngeewe wɑ̈g, cole wɑnhɑni ki dhög ɑ́bïj, o órömø col kɑ dyëg ɑ́ngwen. 2-4Cole gïn-ɑ ɑ́kwɑle ceth. De keløg e bong gïn nud kì yïe, ngeew wɑ̈g ɑ́ bɑ̈ng, o ngyënyyɑni cool gïn-ɑ ɑ́kwɑl yi en. Keløg gïg-ɑ ɑ́kwɑl yi en oyodø kì cinge, ying-ɑ́ wɑdh wɑlɑ̀ ɑderø, wɑlɑ̀ órömø ge onëënø, kej gïjø ɑ́kyel col kɑ ɑ́ryew.

“Keløg kur kedh-ɑ kɑl megø kì wɑ̈r, kɑ mɑg e ókwɑ̈ddø kɑ nɑ̈g, bong cönge kì cwɑggi ngɑn-ɑ ɑ́nɑ̈gii. De keløg møgɑni cwöb ɑ dicɑ̈ng, cwɑgge dɑ cögø.

5“Keløg dhɑnhø jɑmme køøle pwödhe be cɑm, kɑ jɑmme kedh-ɑ pwödhi ngɑn megø, cud jɑl dhög kì ri jɑmm-ɑ døøj kì pwödhe wɑlɑ̀ kì bɑge.

6“Keløg dhɑnhø orɑ̈bø ki mɑc kì pwödhe, kɑ mɑnyɑni ködd-ɑ yij pwödhi ngɑn megø kɑ byel rɑ̈be, ying ge nudd ge ócungø wɑlɑ̀ ge ying-ɑ wïj pëm, byellɑni ceg kɑ colø yi ngɑn-ɑ ɑ́cwiny mɑc.

7“Keløg dhɑnhø wɑɑd gen kɑ̈nne’ ngyëny, kɑ ngyënyyɑni kwɑl kì gøl ngɑn-ɑ ɑ́kɑ̈nni, keløg kur óyod, col yi kurɑni gɑ kɑ̈jj ɑ́ryew. 8De keløg kur pɑ yod, kïdhi jɑlkɑl bøli Jwøk be köngø kinni, jɑmmi wɑɑd gen nuti kwɑl-ɑ yi en.

9“Keløg ji ɑ́ryew opëmø kì kömi gïïpiny, ngɑn okööbø ce gø bɑ mee, ying-ɑ́ kömi dhyɑng, ɑderø, dyel, ógudh, wɑlɑ̀ gïjø megø me wɑ̈ɑ̈nyø, kïdhi gen ryeet bøli Jwøk. Ngɑn-ɑ ókwøb yi Jwøk kinni bɑ en ɑ bɑ̈jjø, gïnɑni col en ɑ́ kɑ̈jj ɑ́ryew.

10“Keløg dhɑnhø kɑ̈nn-ɑ yï wɑɑd gen ki ɑderø, wɑlɑ̀ dhyɑng, wɑlɑ̀ dyel, kí lɑ̈yy-ɑ kyeelø bënn kinni o mɑ̈ggii, kɑ gïnɑni othøø, wɑlɑ̀ otorø, wɑlɑ̀ okɑ̈ɑ̈lø yi ngɑn me nuti lidhø, gïnɑni pɑ col yi ngɑn-ɑ ɑ́kɑ̈nni. 11Ngɑn-ɑ ɑ́kɑ̈nni ceg-ɑ köngø kì bøli Jwøk kinni gïn-ɑ ɑ́kɑ̈nnii yi wɑɑd gen nuti kwɑɑny en, kɑ ngeti gïnɑni yïëye ceth, ki köngi wɑɑd gen møg-ɑ ɑ́kwönge kì bøli Jwøk. O gïnɑni pɑ col. 12De keløg gïnɑni ocɑɑg kɑ kwɑlø kì yïe, gø ceg yi en kɑ culi wɑ̈n. 13De keløg e ócɑɑm-ɑ yi lɑ̈ɑ̈y pɑ̈l, kɑ̈ni jɑl-ɑ ɑ́kɑ̈nni ki thulli gïn-ɑ ɑ́cɑm, o gïn-ɑ ɑ́cɑm yi lɑ̈ɑ̈y pɑ̈l pɑ col.

14“Keløg dhɑnhø ówïdhø ki gïïpiny kì yï wɑɑd gen, kɑ dɑ gïn kedhi ree, wɑlɑ̀ othøø e wɑ̈n tøøk, ngeti gïnɑni ceg kɑ cudø yi ngɑn-ɑ ɑ́wïdhi. 15De keløg wïi lɑ̈yɑni nud kì bute, kì bøli kenyɑni, jɑl-ɑ ɑ́wïdhi pɑ cudø. Keløg lɑ̈yɑni ceg kɑ kïrø, ngyënyy-ɑ ɑ́kïrii ɑ cyëëg keje.

Ciggi Bëëndøj

16 # Jølø 22.28-29 “Ngɑn kedhi ri nyɑnɑjur me pɑ nywøm, kɑ óbuddø ki gøn, muuje kɑ̈nye kɑ gø nywøme ceth. 17De keløg wïyi nyɑnɑni óbɑ̈nyi ki nyömmii en, ngɑnɑni nudd e ceg-ɑ muujø ceth ki kɑ̈ɑ̈ny nyɑnɑjur.

18 # Jølø 18.10, 11 “Nɑ̈gu nyɑdheyɑdh, ko wëggi nënnø.

19 # Kwɑrr 18.23; 20.15-16; Jølø 27.21 “Nɑ̈gu ngɑn niin lɑ̈y.

20 # Jølø 17.2-7 “Ngɑn ngɑ̈ddi jwögg møøgø ki gëëdhi, nɑ̈gu en, nɑ̈g ceth keløg e pɑth ki yɑn ɑ ngɑ̈dde, yɑ Jwøng-ɑ Ácwɑ̈ɑ̈j.

21 # Kedhø 23.9; Kwɑrr 19.33-34; Jølø 24.17-18; 27.19 “Wëdh ko göggí ki gïnrɑj, wɑlɑ̀ ko ruj, mɑ́ yï ɑ́bëëd yï bɑ wëdh kì piny Rïp. 22Thwöm wɑlɑ̀ kïj, ko göggí ki gïnrɑj. 23Keløg e ógöggi yi yïn ki gïnrɑj, kɑ ywöög-ɑ köörɑ, ywøge lïngɑ’ lïngø, 24kɑ pyëwɑ órënyø ki wun, kɑ wu nɑ̈gɑ ki pilø, o mɑ̈nni wun döng gen gɑ thwömm, o wɑ̈ddi wun göög gen ki kïj.

25 # Kwɑrr 25.35-38; Jølø 15.7-11; 23.19-20 “Keløg jiɑ, tyëng-ɑ jɑdø møg-ɑ bëëdø kì butí ge ówïdhø ki ngyëny kì yïí, ko di møg nywøl yi ngyënyyɑni møg pir yi yïn keny-ɑ ódwöög gen. 26#Jølø 24.10-13 Keløg lɑni wɑɑd wun omɑgø yi yïn kipe kwör me ying cwɑgge, döggií keny-ɑ óbuddi cɑ̈ng. 27Mɑ́ bene ógønhɑni ɑ nyi kume ree, ke pɑ döggií en, ree ókum yi en kɑ ngø? Keløg e ódi ywöög köörɑ, cwɑgge lïngɑ’ lïngø, mɑ́ pyëwɑ nyii lɑ̈ɑ̈mø.

28 # Gwøg 23.5 “Yï ko kööb ki kwøb mø rijjø kì ri Jwøk, kɑ jɑngi tyëng pödhi wun ko lɑɑm ki lɑm mø rijjø.

29“Yɑ ko mɑ̈ɑ̈n ki gëëdhi kì ri mwölli byellí geki møgi oløg.

“Kɑ wɑ̈dí, wɑ̈n-ɑ kɑyø mëggí yɑn. 30Mëggí yɑn kɑyyi dyëgí geki kɑyyi dhögí. Wiy kɑy-ɑ jɑlø bëëde ki meye ki cyɑ̈ng ɑ́bïryew, kɑ muuj yɑn kì bïdɑ̈ɑ̈g cyɑ̈ng.

31 # Kwɑrr 17.15 “Yï ko cyɑ̈ɑ̈m ki kwɑ̈ɑ̈l me dööngø kì bɑng lɑ̈ɑ̈y pɑ̈l; de mëggí gwögg.

Currently Selected:

Kedhø 22: shkDCB

Highlight

Copy

Compare