Röm Riet in nhiam
Riet in nhiam
Ɛn warɛgak Puɔl in cɛ gɔ̱a̱r ji̱ Röm, gɔ̱a̱rkɛ jɛ kɛ ɣöö bɛ duɔ̱ɔ̱p rialikä kɛ kui̱ ja̱l in go̱o̱r Puɔl wä thi̱n dueel Kuɔth kä Röm. Kä jɛn go̱o̱rɛ ni ɣöö bɛ lät rɛy Krith-cini kɛ gua̱a̱th mi tɔt, kä kɛ luäkdiɛn derɛ wä räth kä Thɛ-peen. Jɛn cuɛ gɔ̱a̱r latdɛ ŋäcdɛ kɛ kui̱ ŋäthä kɛ Yecu Kritho kɛnɛ latdɛ kɛ ta̱a̱ ciɛɛŋä Krith-cini rɛy ŋäthä. Ɛn bok te ri̱w ruaacni thukni Puɔl thi̱n.
Kä kɛ kɔr kä min cɛ thuɔ̱k kɛ ner ji̱ Luaak Kuɔth kä Röm kɛnɛ läriɛn palɛ kɛ kui̱diɛn, la Puɔl min latdɛ cua̱ lar i̱, “Ci thuk tin gɔw ɛ nyoth ɛn ɣöö ci Kuoth naath la̱th rɛy cuŋni kɛ jɛ kɛɛl. Cɛ jɛ la̱t kɛ ŋa̱th ni tukädɛ cu mäni guutdɛ” (1:17).
Kä cu Puɔl min latdɛ cu rialikä. Nɛy diaal ji̱ Juudh kɛnɛ Jur, görkɛ ɣöö bi Kuoth kɛ la̱th rɛy cuŋni kɛ jɛ kɛɛl, kɛ ɣöö kɛn diaal tekɛ piny bumä dui̱rä. Ca naath moc cuɔ̱ɔ̱ŋ ɛ Kuoth kɛ ŋa̱th Yecu Kritho. Kɛ kɔrɛ cu Puɔl tëk in pay tuɔɔk lat kɛ mat kɛ Kritho min ku la luɔt maarä min pay jek kɛ Kuoth. Te ji̱ ŋäthä kɛ mal kɛ Kuoth, kä cɛ kɛ lony kɛ Yiëë in Rɛl Gɔɔydɛ rɔ kä buɔ̱m dui̱rä kɛnɛ lia̱a̱. Kä cio̱o̱k kä 5-8 ci Puɔl luɔt ŋuɔ̱tni Kuɔth kɛ buɔ̱m Yieekä Kuɔth rɛy teekä ji̱ ŋäthä lat. Kä cua jääk kueer kɛ thiec kä ɣöö dee ji̱ Juudh kɛnɛ jur ben kɛɛl i̱di rɛy Kuäärä Kuɔth. Kä cuɛ jɛ gok kɛ ɣöö lo̱k ji̱ Juudh kɛ Yecu ɛ tha̱a̱ŋ cärä Kuɔth kɛ ɣöö bɛ nɛy diaal nööŋ kä puɔ̱th Kuɔth kɛ Yecu Kritho. Kä cuɛ tekɛ ŋa̱th ɛn ɣöö /ci ji̱ Juudh Yecu bi lo̱k gua̱thni diaal. Kä kɛ jɔak cu Puɔl gɔ̱a̱r kɛ ɣöö dee Krith-cini tëkdiɛn ciɛŋ i̱di, ce̱tkɛ duɔ̱ɔ̱p nho̱kä maarä kɛ nɛy tin kɔ̱ŋ. Cuɛ kɛn ti̱ti̱ la̱t kɛ kui̱ lätni Kuɔth, kɛ lät Krith-cini kɛ kumɛ kɛnɛ nɛy tin kɔ̱kiɛn kɛ thiec kɛ kui̱ tiitdä. Kä cuɛ warɛgak gok kɛ mi la ruacdɛ kɛnɛ rieet ti liakɛ ni Kuɔth.
Tin te rɛy buɔk
1. Riet in nhiam kɛnɛ luɔt ruac 1:1-17
2. Gör ran kɛ ka̱n 1:18—3:20
3. Dup Kuɔth kɛ kui̱ känä 3:21—4:25
4. Tëk in pay tuɔɔk kä Kritho 5:1—8:39
5. I-thɛ-rɛl rɛy cärä Kuɔth 9:1—11:36
6. Ciaaŋ teekä Krith-cini 12:1—15:13
7. Guk ruac kɛnɛ ner Puɔl 15:14—16:27
Currently Selected:
Röm Riet in nhiam: nusNHB
Highlight
Copy
Compare
Share
Want to have your highlights saved across all your devices? Sign up or sign in
Nuer Bible © Bible Society in South Sudan 1998,2012.