Kuen 12

Gëw Mir-yam kɛnɛ Ä-ron kɛ Muthɛ

1Cu Mir-yam kɛnɛ Ä-ron ruac kɛ kui̱ Muthɛ, kɛ ɣöö cɛ kuɛɛn kɛ ciek mi nya Kuc. 2Kä cukɛ wee i̱, “Ɛn Kuoth Nhial ruacɛ kɛ Muthɛ kä rɔa inu? A /cɛ ruac kɛ kɔ bä inu?” Kä cu Kuoth Nhial ɛ liŋ. 3Kä Muthɛ ɛ ram mi kɔ̱c kɔ̱c, kɔ̱c ni jɛn kä nɛy diaal tin te wi̱i̱ muɔ̱ɔ̱n. 4Kä cu Kuoth Nhial Muthɛ kɛnɛ Ä-ron kɛ Mir-yam pärikä jiök ɛ kɛ i̱, “Bia raar yɛn da̱ŋ diɔ̱k kä awiaa kä kɛmɛkä ro̱mä.” Kä cu kɛ ben raar kɛn da̱ŋ diɔ̱k. 5Kä cu Kuoth Nhial ben piny kɛ wuɔ̱n puɔ̱rä, kä cuɛ cuɔ̱ŋ thok kɛmɛkä, kä cuɛ Ä-ron kɛn Mir-yam cɔl, kä cu kɛn da̱ŋ rɛw ben raar. 6Kä cuɛ wee i̱,

“Liɛŋɛ ruacdä, mi tëë

kɛ gök mia̱a̱ rɛydun,

ɣän Kuoth Nhial bä rɔ nyuɔ̱th

jɛ kɛ nyuuth,

bä ruac kɛ jɛ kɛ la̱k.

7Kä ŋäc ni jɛ i̱, ja̱ŋdä ni Muthɛ

/cɛ tëë nɔ.

Luɔ̱th kɛ ni jɛ dhɔɔrä kɛɛliw.

8Kɔnɛ jɛ ca̱kɔ ruac kɛ thuk kɔ

a liɛŋ kɛ jɛ,

a /ci mɔ a ruac rɛy muɔ̱th,

kä cɛ ta̱a̱ Kuɔth Nhial nɛn.

Kuɛ la ŋu /ci yɛn dual kɛ ruac kɛ kui̱ jäŋädä ni Muthɛ mɔ?”

9Kä cu kɛ̈c Kuɔth Nhial di̱t kä kɛ, kä cuɛ kɛ ba̱ny piny. 10Kä nɛ̈n ɛ jɛ min ci wuɔ̱n jiɛɛn wi̱i̱ kɛmɛkä, cu Mir-yam tekɛ dhɔp mi buɔy ce̱tnikɛ kën, kä cu Ä-ron rɔ riet Mir-yam, kä cuɛ nɛn tëë kɛ dhɔp. 11Kä cu Ä-ron Muthɛ jiök i̱, “Aɣ, kuäärä, cu kɔ moc duer kɛ ɣöö cakɔ lät dɔ̱ɔ̱rä kä cakɔ duer. 12Kä a /ci li̱w ce̱tkɛ ram mi ci tha̱a̱ŋ ri̱eŋdɛ rɔ cam, mëë bëë raar ji̱ man.” 13Kä cu Muthɛ Kuoth Nhial pal i̱, “Aɣ, Kuoth la̱ŋä ni ji̱, jak ni jɛ kä gɔaa.” 14Duundɛ ɣöö cu Kuoth Nhial Muthɛ jiök i̱, “Mi ci gua̱n ruɛy ŋuɔl waaŋdɛ, /cɛ dëë pöc kɛ ni̱n bärɔw? Läth ni jɛ raar rɛy wec kɛ nin da̱ŋ bärɔw, kɛ kɔrɛ bia cu luɔ̱ɔ̱c wi̱c.” 15Inɔ cua Mir-yam la̱th raar rɛy wec kɛ ni̱n bärɔw. Kä /ken naath ɣöth ɛ ni̱ni tɔ̱tɔ̱ amäni mëë ca Mir-yam luɔ̱ɔ̱c wi̱c 16Kɛ kɔrɛ cu naath ɣöth kä Ɣä-dhe-rot, kä cukɛ wä pua̱t däärdɔaar Pa-ran.

Currently Selected:

Kuen 12: nusNHB

Highlight

Copy

Compare